Uranaih hu klauk jru pacang caga biak avar 

Bahrau ini uranaih angan N, 8 thun, daok di Tiền Giang hu amaik ba tame sang iak ruak tỉnh iek ruak kayua ala kang gah hanuk barah pandik rilo. Amaik di adei N brei thau, N khan lac nyu pandik di ala kang gah hanuk meng 2 harei dahlau, ala kang gah hanuk nyu barah prong, adei N mboh pandik tuk lameh, gam haong pandiak saong glaih dalam rup. Amaik pang tui mikva puk paga nan ye nao blei cao dán (jan tauk) mai tauk ka anek di drei. Tuk pasang iek ruak, BS mboh ala kang gah hanuk di adei nyu barah prong, kalik di labik tauk nyu bhong saong barah khang. Adei N hu brei thau lac nyauk ruak Quai bị.Yau nan Quai bị lac hagait?

Quai bị lac ruak kayua virus quai bị (paramyxovirus). Virus njaom mbak tapa jalan suak yava, nao tame dalam cambuai, idung, tarakom, caih menek pak nan dalam 15 - 21 harei, blaoh nyaom tame darah ngak brei pandiak, glaih glar. Meng darah, virus tame tuyến aia bah, bhian gaok di abih nan lac tuyến mang tai, ngak barah pandiak di ala kang, iew lac Viêm tuyến mang tai, atau ruak Quai bị.

Ruak ini kan kandah hagait halei oh?

Kayua ruak quai bị lac kayua virus nan ye nyu abih eng bo oh cang iek ruak meng jru. Bruk iek ruak, njauk ngak brei trun dom kadha yau: pandiak, mbang huak siam, kalung pabah meng aia sara 0,9%, ndih dhang glaih, takik nao mai dalam tukvak daok pandiak, daok barah ala kang (bhian di nyu meng 7-8 harei camereip) …

Ruak ini yaom lac oh trak min mbuan ba tal rilo biến chứng di dom mô saong dom labik karei dalam rup pabhap, pagap yau: viêm tinh hoàn (20-25% urang ruak), viêm buồng trứng , meda ba tal bruk oh daok caih menek hu…

Yau nan dom amaik ame njauk ngak hagait tuk uranaih njauk ruak quai bị? Tuk medhil lac njauk quai bị, amaik ame nyauk ba uranaih nao pasang iek ruak piah ka bác sĩ duah thau njauk ruak hagait, kayua lac di labik kang nyu daok hu rilo mô karei tra oh ta-eng hagait tuyến aia bah. Hadei di nan, amaik ame njauk ngak tui panuac tacei pato di BS saong tui iek anek bhik di drei, mbohg hu hagait di biến chứng halei oh, yau: pandik hatian, glaoh ta-aok rilo, pandik akaok, pandik di plah pha... Dom amaik ame juai pandar jru hagait yau jan tuak (cao dán), menyek, phun hala… piah tauk tagok, luk atau tauk di gah langiu kayua nyu oh siam hagait, gaok tuk mai nyu daok ngak ka ruak trak jang yau ngak ka labik kalik nan nyu katal, bhong, ndaih baoh aia, njaom mbak vi trùng …

Tukvak njaom mbak lac meng 6 harei dahlau di tuk barah di ala kang tal 2 adit hadei tuk hu tamuh ruak. Kayua yau nan ye, uranaih ruak brei daok karei dalam tukvak ini, kayua lac mbuan njaom mbak virus ka urang daok jaik taphia meyah dom urang nan oh ka kluak jru pacang caga.

Pacang caga quai bị yau habar?

Ruak mai meng virus, nan ye kadha prong di abih bo dom amaik ame njauk ngak nan lac ba anek bhik di drei nao klauk jru pacang caga. Vaccin pacang caga quai bị daok dalam vaccin pacang caga sởi saong Rubella, mbang klauk akaok mereip tuk uranaih hu 9 bilan atau bak sa thun. Saong dom amaik ame kanar hadar ba anek bhik di drei nao klauk jru pacang caga ka nyu ginup dom mbang nye!

Urang lang: Jasi -28/1