Mboh lac oh ngak kaya meda hu meng phun padai aia, dalam tuk taneh riya di baoh sang jeng oh ka ngak hu kein laba, thun 2012, sa-ai Châu Văn Năng lac urang akaok meti di xã An Hải khang hatai buh jien tabiak yaok rituh triệu đồng  piah ba công nghệ pruh aia patak pataom tame pala dom janih phun yau: cà rốt, akaok sabei, akaok lasun hala… Urak ini, meng 2,5 ha taneh pala njam patam tui jalan pruh aia patak pataom hu ba mai ka sa-ai jien mek tame jaik 200 triệu đồng yaok thun. Sa-ai Châu Văn Năng, xã An Hải, huyện Ninh Phước, tỉnh Ninh Thuận brei thau: Tuk camereip, buh pren tabiak ngak, blei limo kubao piah ngak min. Dom thun hadei di nan drei ngak mbang hu meng pah menuac ngak. Hadei di ini hu mac li-ua ginup abih drei meng pah rilo hamu taneh tal harei ini meng hu yau nan.

Oh lac urang ngak nong naih gheih dalam bruk ngak mbang yam tagok ngak meda ka baoh sang, sa-ai Châu Văn Năng daok kham merat hu mbaok tame bruk xã hội, abih hatai klah rabha ilamu, daong ka dom baoh sang kan kandah yam tagok ngak mbang. Urak ini, sang di sa-ai daok ba bruk ngak ka jaik 20  urang ngak ngan haong yaom jien bilan meng 2 tal 2 triệu meteh. Sa-ai daok hu daong ka ralo baoh sang kathaot nyim pajaih, jru khik caga phun pala, khak drak piah pala drak. Sang sa-ai Kiều Thị Thảo daok dalam xã haong gauk, dahlau diah jeng lac sang kathaot, hu sa-ai Châu Văn Năng brei nyim phun jien saong tacei pato jalan ngak mbang urak ini yam tapa truh kan kathaot. Sa-ai Thảo lac: Jien nan sa-ai Năng daong piah blei limo, daong min oh mek jian jhung, pajaih jeng mek jien yau nan oh mek jian jhung, khak drak jeng oh hu mek jien jhung. Urak ini sa-ai Năng jeng daok daong ka mikva kathaot yaok harei dom janih yau: khak drak, limo pajaih… bruk hagait jeng daong abih. Sa-ai Năng oh daong ye oh tapa truh kan kathaot hu.

Tal urak ini, sa-ai Châu Văn Lăng padang hu ka drei bruk ngak mbang praong bo urang daok pak ini thei mboh jeng mehu. Meng 8 ha taneh, sa-ai ngak 4 ha padai aia, 2 ha pala njam patam, mblang taneh daok veik sa-ai pala phun lavik thun gam haong dua sruh mac li-ua pah ka mikva saong sang mac xay padai hu ba mai ka sang sa-ai yaok thun labaih 400 triệu đồng. Kadha njauk bui sambai nan lac hu biak ralo mikva dalam palei Craoh Patuh  Tuấn Tú hu bac megru, ngak tui jalan ngak mbang di sa-ai piah yam tagok ngak kaya meda angaok bhum taneh cuah mbong patih. Ong Lộ Trung Tài, Akaok dhar kapul urang nong palei Tuấn Tú, xã An Hải ndom lac: Sa-ai Năng ngak ralo bruk di palei Tuấn Tú, sa nan lac pruh aia patak pataom; dua tra sa-ai Năng thau salih jalan thâm canh, luân canh phun pala, yau ye bilan pala akaok lasun bloh bilan hadei pala ritak Lo, pala traong ndhe, amariak, gam gam pala salih yau nan.. Sa-ai Năng lac urang tari taring ngak mbang naih jioy nan ye mikva pak ini bac megru jalan ngak mbang di sa-ai biak ralo.

Meng dom kham merat oh thau glaih glar, sa-ai Châu Văn Năng hu Kapul urang ngak nong pakat negar Việt Nam pok brei harak meyaom “Urang nong ngak mbang naih jioy, gul pataom daong ba gauk patruh eik patrun kathaot saong daong ba gauk ngak kaya meda”, Ủy ban bhap bani tỉnh Ninh Thuận pok brei harak meyaom điển hình tiên tiến ka bruk ngak mbang naih jioy thun 2014./.