Thaik binguk urang brei darah ngak pahla (oh njauk sa-ai Đào Anh Hải)

  Thun 2004, sa-ai Đào Anh Hải, urang ngak dalam Công ty Xổ số kiến thiết tỉnh Lâm Đồng mbang camereip nao brei darah. Sa-ai khan lac, tuk bahrau brei darah sa-ai mboh biak huac lac nyu jhak tal pren yava. Hu dom y bác sĩ pathau khan saong tapa duah thau meng dom harak tài liệu, hadei di mbang  camereip brei darah, sa-ai thau lac bruk brei darah nyu siam ka pren yava rup drei bo daok daong hu ka rilo manuac. Meng nan nao thun halei sa-ai jeng nao brei darah 2 mbang. Sa-ai Đào Anh Hải khan lac: “Dahlak sahneng lac sa tanjaoh darah brei nao sa rai manuac daok veik, mboh darah di drei nao tal urang ruak, daong hu ka urang ruak ye dahlak biak bui sambai. Dahlak tuk halei jeng saneng lac daok pren yava ye daok brei darah daong manuac. Dahlak hu jak ba mikva jaik taphia, adei sa-ai dalam sang nao brei darah daong ka urang ruak”.

Bruk halar hatian brei darah di sa-ai hu pambak tal dom urang daok jaik taphia. Ong Nguyễn Đức Việt, akaok HĐQT Công ty xổ số kiến thiết Lâm Đồng brei thau, meng bruk ngak di sa-ai Hải hu ngak jeng bruk halar hatian di jabat: “Bruk brei darah ngak pahla di Công ty xổ số kiến thiết tỉnh Lâm Đồng hu meng lavik mai. Saong yaok thun hu meng 45 tal 50 mbang urang nao brei darah. Công ty bhian palaghaih tukvak piah ka adei sa-ai nao brei darah saong iek prong dom rik daong di dom urang hu rilo mbang nao brei darah”.

Tui ong Đỗ Hoàng Tuấn, akaok Hội Chữ thập đỏ tỉnh Lâm Đồng, dom urang halar hatian brei darah yau sa-ai Đào Anh Hải hu rik daong ka tỉnh padang hu bruk brei darah daong urang ruak. “Sa-ai Hải hu mbaok tame brei darah hu rik daong ka bruk brei darah di tỉnh, daong ka gah y tế hu ginup darah piah daong ka urang ruak. Sa-ai nan lac sa dalam dom kareih camin piah ka rilo urang karei bac megru tui”.

Bruk ngak siam gheih di sa-ai Đào Anh Hải – urang hu labaih 30 mbang halar hatian brei darah, biak njauk pok meyaom./.

Urang lang: Jasi-29/6