Urang Raglai palei Bạc Rây, xã Phước Bình, huyện Bác Ái, tỉnh Ninh Thuận 

Rilo bilan tapa oh hu hajan, taneh riya thu lagu, rilo taneh pala njam patam di palei Tà Dương, xã Phước Thái, huyện Ninh Phước, tỉnh Ninh Thuận  njauk klaak saoh. Lac bí thư chi bộ palei, bruk bo sa-ai Jaghe Thị Lễ sahaneng tal di abih urak ini lac ngak yau habar piah bhap bini Raglai yam tapa hu kan kandah piah tani tanat bruk bruk ngak mbang, pala drak, raong glang dalam bilan pandiak bhang. Sa-ai Jaghe Thị Lễ haong dom urang đảng hu caik tukvak nao tal hamu puh patahu khan mikva kham merat salih phun pala, patak pataom ia pruh. Ong La Vui Dương - palei Tà Dương, xã Phước Thái, huyện Ninh Phước, Ninh Thuận lac: Meng hu sa-ai Lễ lac Bí thư Chi bộ palei mai jak ba mikva ngak. Nilan ini pandiak bhang lô, drei rilo meng cang ia langik. Meng bilan 11 tal urak ini oh hu hajan. Limo tok mbang hareik thu, drei tok caong hu hajan mai. Meng hu sa-ai Lễ mai tal sang jak ba nan ye drei raok bingun kham merat raong limo, raong pabui.

Hadei di tuk hu sa-ai Jaghe Thị Lễ mai tal sang pathau khan, amuk Ra Đah Thị Hồng hu buh tabiak labaih 10 triệu đồng piah raok bingun khik piah ia, saong daok hu khik piah pandap mbang that haong pandap mbang thu ka tapon athur raong dalam bilan thu. Meng nan tal urak ini, tapon limo 12 drei di sang amuk Hồng jeng daok praong siam. Amuk Ra Đah Thị Hồng brei thau: Tuk Lễ mai tal sang jak ba ye drei raok bingun hu ia piah raong limo. Urak ini pandiak bhang jeng hu khik piah ka limo mbang. Pak ini drei pala hareik jeng oh hu ia pruh nan ye drei mek pong thu brei ka limo mbang min.

Palei Tà Dương urak ini hu 147 sang, hu 633 menuac lac urang bangsa Raglai. Raidiuk di bhap bini daok pagam pambak tame raong glang haong pala drak. Chi bộ ba tabiak sarak tacei ba urang nong ngak tui jalan “1 njauk, 5 trun” angaok phun padai di taneh praong 10 ha. Bruk ngak ini pachreih hu 60 sng urang nong pataom mbaok tame, padai yuak hu labaih 60 tạ/ha. Gam haong nan daok hu padang Kapul hu hatai takre raong limo pachreih hu 60 sang. Sa-ai Jaghe Thị Lễ -Bí thư Chi bộ palei Tà Dương, xã Phước Thái, huyện Ninh Phước, Ninh Thuận brei thau: Drei lac menuac dalam palei nan ye drei pathjau khan, jak ba ye hu mikva pang tui. Meng bruk ngak tapak drei tacei pato mikva ba gauk ngak. Drei hu nao mesraiy phun jien saong blei limo mai raong piah ka mikva mboh bloh ngak tui. Drei ngak hu kein laba ye mikva pachreih tui.

Urak ini palei Tà Dương daok hu 53 sang kathaot. Chi bộ palei Tà Dương haong dom kapul nyaom dalam palei daok ieu pataom dom prein khang dalam xã hội saong patagok bruk jum pataom, ba gauk daong dom sang kan kandah ngak mbang piah yam tagok dalam raidiuk. Saong daok hu panuac likau pakat angaok pasang iek, buh jien ngak ribaong ba ia meng danao Lanh Ra mai palei Tà Dương pruh ka labaih 60 ha taneh pala drak di bhum thu lagu, daong ka mikva hu jalan peih praong bruk raong glang, pala drak, yam tagok tabiak truh kan kathaot khang kajap. Sa-ai Thạch Thị Sơn Ca –urang dang akaokHội LHPN xã Phước Thái, huyện Ninh Phước, Ninh Thuận ndom ka sa-ai Jaghe Thị Lễ yau ini: Tapa bruk ngak di palei drei mboh sa-ai Lễ ngak bruk biak abih hatung hatian.

Meng dom rik daong di sa-ai Jaghe Thị Lễ, thun 2019, Chi bộ palei Tà Dương hu Đảng ủy xã Phước Thái, Huyện ủy Ninh Phước, tỉnh Ninh Thuận pok meyaom kayua ngak siam bruk dak padang Đảng. Yaom lac bahrau hu labaih 1 thun ngak Bí thư Chi bộ min sa-ai Jaghe Thị Lễ brei mboh lac 1 bí thư chi bộ daok ranaih min sami samar, thau sahneng duah, abih hatung hatian, hu urang jakar, urang đảng saong bhap bini anit ranam./.

Urang lang: Musa Phương – 8/3