Menek tabiak saong prong tagok di bhum kathaot palei Yang Mau, xã Hàm Trí, huyện Hàm Thuận Bắc, tỉnh Bình Thuận, sa-ai Thông Thị Hà hu thau cambaih dom kan kandah di palei Cam ini. Luac thun dang di pandiak riak di hajan min kan kathaot jeng ndam gam miat haong baoh sang sa-ai. Tal tuk dak padang mbang angui, diuk pasang sa-ai jeng oh hu hagait langiu di 2.800m² taneh hamu. Dua diuk pasang gam raong anek sit gam ngak padai, gam nao ngak pah duah jien mbang tapa harei, thei iew hagait ngak nan.

        Thun 2000, diuk pasang sa-ai mesre hu 6 triệu đồng meng phun jien Gilang pariak Sarak karja buh blei  5 sào taneh saong pala 700 got thanh long. Yaom lac phun thanh long hu mikva di labik ini pala meng lavik mai, min ngan haong diuk pasang sa-ai  jeng oh ka hu ilamu piah iek mong janih phun pala ini. Kayua yau nan ye, gam nao ngak pah sa-ai gam haong pasang hu mbaok tame tal pasram ngak thanh long piah ba ilamu kỹ thuật tame bruk pala drak. “taneh oh phụ công manuac”, tal urak ini, bein thanh long di diuk pasang sa-ai brei jien laba jaik 100 triệu đồng yaok thun. Meng yaom jien mek hu meng phun thanh long, sa-ai blei limo menek, urak ini tapol limo jeng hu 5 drei. Meng sa baoh sang kathaot, baoh sang sa-ai yam tagok jeng baoh sang kaya meda saong blei taneh padang ngak sa baoh sang karei.

       Lac urang hadiuk, urang amaik dalam baoh sang, harei harei, yaom lac jan van haong bruk ngak hamu ngak apuh min sa-ai jeng caik tabiak tukvak piah raong pato anek bhik, iek glang baoh sang drei…Ngan haong baoh sang sa-ai, oh lac likei atau kumei, diuk pasang tuk halei jeng bình đẳng, sangka iek glang daong ba gauk, gam gauk ngak mbang saong pato pakai anek bhik. Mai meng nan bo dua urang anek prong di sa-ai hu bruk ngak tani tanat.

       Tuk hu labaih drap ar, sa-ai hu daong jien phun ka dom adei sa-ai kathaot dalam palei. Taphia di nan, sa-ai daok abih hatai hu mbaok tame dom bruk kayua puk palei peih ngak, abih di nyu lac bruk pakacah gauk padang ngak palei pala bahrau. Sa-ai hu nao jak ba baoh sang drei alin brei 800m² taneh daok pala bei plom piah ngak jalan bo oh caong mek jien bayar... Sa-ai Thông Thị Hà brei thau:

       Anak bruk ngak siam mekre nan, thun 2013, sa-ai Hà hu Ủy Ban bhap bani huyện Hàm Thuận Bắc saong Ủy Ban bhap bani xã Hàm Trí pok meyaom. Sa-ai Bùi Ngọc Tuấn – Akaok Ủy ban bhap bani xã Hàm Trí, huyện Hàm Thuận Bắc, tỉnh Bình Thuận lac: Dalam tukvak padang ngak palei pala bahrau ye mikva Cam labik ini thei jeng pachreih tui. Hu dom baoh sang yau amuk Thông Thị Hà alin brei 800 mét vuông taneh piah ngak jalan, blaoh amuk Mã Thị Ngân alin brei tal  2.500 mét vuông taneh piah peih prong taneh kabo di palei yang mau.   

     Oh lac thau ngak mbang patagok kinh tế baoh sang, sa-ai Thông Thị Hà daok kham merat hu mbaok tame dalam bruk ngak di kapul urang kamei. Sa-ai tuk halei jeng abih hatai saong nao dahlau dalam dom bruk ngak, bruk pakacah, bruk jak ba di kapul urang kamei yau hu mbaok tame “Tổ urang kamei jak ba pasang, anek saong gauk gar oh ngak suan hukum nao mai angaok jalan”; daong dom adei sa-ai dalam Chi hội Urang kamei palei Yang Mau tuk gaok kan kandah dalam rai diuk; pathau khan, jak ba ralo adei sa-ai  kumei Cam hu mbaok tame bruk ngak di kapul. Sa-ai Nguyễn Thị Hiền – Akaok kapul urang kamei huyện Hàm Thuận Bắc, tỉnh Bình Thuận brei thau: Dom pakat hội jeng hu peih bruk jak ba dak padang baoh sang 5 oh, 3 hacih. 8 tiêu chí di bruk jak ba ini jeng daok dalam  19 tiêu chí padang ngak palei pala bahrau. Tapa nan  hu mboh ralo kareih camin hadah yau sa-ai Thông Thị Hà daok di Hàm Trí, sa-ai Nguyễn Thị Hờ daok di Thuận Minh, sa-ai Nguyễn Thị Sương daok di Hàm Hiệp…)

        Meng dom bruk ngak siam di drei, baoh sang sa-ai Thông Thị Hà ralo thun gam hu pok brei angan lac baoh sang ilamo, daok rup sa-ai hu pok brei ralo  phần thưởng di karja, kapul urang kamei... Thun 2015, pak Nyaom roya pakacah gauk anit ranam taneh aia kayua Kapul urang kamei Việt Nam peih ngak, sa-ai taduan mek hu harak meyaom di Thủ tướng raja-ei./.