Tame phường Phước Long A, quận 9, Ban raya Ho Chi Minh, tangi sang sa-ai U Mơ jaik abih mikva labik ini thei jeng thau. Langiu bruk ngak di Cty, sa-ai daok ngak rilo bruk daong palei, yau ngak Ủy viên Ủy ban Mặt trậnNegar di quận, phường, gam pan akok mban Quản trị Sang megik Islam quận 9. Langiu di nan, sa-ai daok lac urang di dhar kapul  Ilamu Cam Ban raya Ho Chi Minh. Yaom lac biak thuvi thuvar haong bruk ngak, min sa-ai lac sa urang pasang thau anit ranam diuk, urang ame thau sangka iek glang anek bik dalam sang. Hadar harei Baoh sang Viet Nam 28/6, khol drei nao rivang  sang sa-ai U Mơ tapa kadha vak di Hanipha, urang vak di rayo sap ndem Viet Nam daok ngak bruk di ban raya Ho Chi Minh: 

Phường Phước Long A hu 10 baoh sang Cam hu 65 urang, mikva Cam labik ini rilo meng pablei salih sit sot saong ngak bruk meng tangin takai yau nan ye raidiuk daok rilo kan kandah. Sang sa-ai U Mơ  jeng yau nan, langiu bruk  khik iek cong ty ia tasau Vinamilk, sa-ai peih kuan tạp hóa harei harei pablei pandap piah duah jien tame, yaom lac bruk hit glaih glar min tuk halei sa-ai jeng pambuak pagam haong dom bruk ngak di palei yau jak ba mikva Cam ngak siam dom sarak  di Đảng saong  Karja, jak ba mikva kaok taneh ngak jalan tui sarak Karja. 

Sa-ai U Mơ biak iek praong tukvak, kayua melam ngak bruk c.ty, harei daong pablei salih di sang. Tuk palei jak ba ngak bruk hagait ye sa-ai tuk halei jeng ba akaok nao dahlau, yau bilan 4 meng blaoh, sa-ai hu mbaok tame bruk văn nghệ dom bangsa takik pahadar harei ilamu dom bangsa Viet Nam 19/4 saong mek hu giải nhì ka Quận. Oh lac ngak siam bruk di palei, ngan saong mikva puk paga sa-ai bhian kakei, jak ba mikva daong gauk, klak rabha dom kan kandah saong gauk tuk ruak kik, pandik harao, jum pataom gauk diuk rai tui jalan “ siam ka dunya, mekre ka agama”. Jaik abih mikva di labik ini tuk halei jeng anit ranam sang sa-ai U Mơ, iek nan yau kareih camin hadah piah bac megru tui. Ong Trần Thanh Sang, AKok Ủy ban Mặt trận Negar phường Phước Long A, Quận 9, ban raya Hồ Chí Minh brei thau: 

 "Dalam tukvak tapa, sa-ai tuk halei jeng khik talei pambuak bruk khang kajap saong karja palei. Meng akok thun, hu pathau khan ka danak dak bruk ngak di Sangmegik ka Đảng ủy, Ủy ban piah daong. Ngan saong bhap bini Cam, jak ba mikva ngak siam dom sarak, jalan tacei ba di karja palei, rik daong dak padang baoh sang ilamu, ngak siam bruk jak ba taong abih bhap bini padang raidiuk ilamu di palei."

Lac sa urang dalam Mặt trận Negar Quận saong phường, sa-ai tuk halei jeng hu mbaok  dalam dom mbang ginum biai saong brei panuac meng hatai sahaneng di drei, piah rik daong haong Mặt trận phường saong kapul nyaom hu dom jalan ngak siam jang daong ka mikva urang Cam  di phương. Yaom lac, daok iek glang ka urang diuk ruak kik dalam tuk raidiuk kan kandah, min sa-ai kham merat yam tapa meng prein ayawa saong duah gah tangin di drei. Urak ini, anek kumei di sa-ai daok bac pak Malaysia hu Gilang pariak Dunya Islam daong.  Ini jeng lac bruk bui sambai pachreih ba sa-ai tuk halei ngak siam bruk ngak di drei. Sa-ai U Mơ lac:"Yam tapa kan kandah saong piah hu yau harei ini dahlak thau dhar phol dom ayut sahabat …..daong ka hulin ngak siam bruk daong puk paga saong xa hoi."

Dahlak tame rivang sang sa-ai U Mơ dalam dom ahrei puac bilan 6 ini, hu mboh  sa-ai daok chreih chrai taduan raok dom gah di phường, quận mai rivang saong alin brei pandap tuk tame bilan eik Ramadal. Angaok cambuai sa-ai tuk halei jeng khim lao kayua sa-ai thau lac, bui sambai harei ini di baoh sang drei mai meng bruk sa-ai kham ngak bruk daong ka xa hoi./.