Dom uranaih ni hu amaik umo biak sit 

Hoàng Thị Mai, bangsa Mông, ndih tapui thun 2000 daok di xóm Lũng Tu, xã Thượng Thôn, huyện Hà Quảng (t.Cao Bằng) urak ini lac amaik di 3 urang anek.

  Thun 2014, tuk umo bahrau 14 thun, Mai padeih bac piah tok pasang saong hu anek kumei kacoa. 2 urang anek patui di nan ndih tapui tabiak di thun 2018 saong thun 2020, taong abih 3 urang anek jeng lac kumei. Hoàng Thị Mai tok pasang tuk daok sit kayua amaik ame kateik greik atau atau kayua adat cambat tanarakun? Panuac javap jalei di Mai oh lac yau nan. Mai khan lac, adei thau pasang likei di drei tapa Facebook; hadei di sa tukvak ndom biai nao mai, mboh anit ranam gauk blaoh khin gauk.

"Adei duah thau blaoh khin gauk, urak ini hu 3 urang anek paje, dua diuk pasang adei jeng njauk gauk, pasang likei di adei nao ngak duah jien, adei daok di sang iek anek".

Amuk Hầu Thị Hoa – amaik di Hoàng Thị Mai tame me-in haong anek kumei, tuk hu tangi sua ka umo likhah caga, amuk Hoa khan lac:

"Rai di anai lac tok pasang suai jang, ginup 18 thun meng tok, daok anai umo 21 thun meng hu anek kacua, raidiuk jeng ginup mbang. Urak ini kol anek naih nyu eng drei duah thau gauk tapa phone tangin, blaoh takre gauk, khin gauk tuk daok sit, oh pacang hu".

Anak meta mboh lac, rilo thun mai ini, di bhum bhap bini bangsa takik saong bhum ceik hu buh jien tame ngak brei tagok khang gah công nghệ thông tin, internet. Công nghệ hu mai tal bhap bini bangsa takik; dom adei sit ikei, kumei hu nao bac jeng thau sap Việt, thau pandar công nghệ. Meng hu yau nan bo akaok sahneng, bruk hu thau jeng hu siam jang. Meng hu công nghệ bo dom adei sit likei, kumei thau hu bruk oh siam meng khin gauk dalam but pajaih, dom kanjah jhak tal prein yava di urang amaik, di anek naih saong chất lượng dân số, raidiuk.

Min dom bruk oh siam meng Internet jeng njom tame dom dam dara, rilo urang ranaih umo pakacah gauk tok diuk, tok pasang biak aval. Meyah dahlau daih rilo sang kateik greik anek lakhah aval ye urak ini rilo adei tok diuk tok pasang oh pang tui panuac pacang di amaik ame, pagap yau bruk di palei Lũng Tu. Rilo urang lac amaik, ame tuk daok sit di xã Thượng Thôn oh ngak hu harak khai sinh ka anek kayua tok gauk tuk oh ka ginup umo lakhah tui hukum karja. Sa-ai Hoàng Thị Ngoan, Chủ tịch MT negar xã Thượng Thôn, huyện Hà Quảng, tỉnh Cao Bằng brei thau, yaok thun, karja xã hu rilo kham merat dalam pathau khan, jak ba tapa dom mbang họp palei atau pablak tame dom danak dak y tế, dân số… Yau nan min, bruk khin likei, khin kumei tuk oh ka ginup umo thun tui hukum karja jeng daok rah tabiak kayua dom adei urak ini hu thau tal dom blah web biak aval, hu dom sang jeng daok tui jalan sahneng klak oh daok lagaih saong takik sangka tal anek bhik di drei.

"Dalam tukvak tapa, pakat uỷ, karja haong dom gah, dom kapul nyaom kham merat pathau khan ka bruk dân số, bruk tok diuk tok pasang tuk umo thun oh ka ginup tui hukum saong bruk khin gauk dalam but pajaih. Min kayua akaok sahneng di meneing mikva daok biar nan ye dom bruk tok gauk tuk daok sit saong khin gauk dalam but pajaih jeng daok mboh rilo. Anak tal, pakat uỷ, karja xã jeng daok jak ba mikva piah patrun patakik bruk nan".

Piah patrun patakik bruk lakhah caga tuk umo thun daok sit, oh ka ginup tui hukum saong khin gauk dalam but pajaih di bhum bhap bini bangsa takik, brei hu rilo jang dom danak dak paglaong prein pathau khan ka dom urang jakar daok ranaih umo piah ka dom adei sit likei kumei thau ginup ka Hukum lakhah caga saong baoh sang, ka prein yava urang ndih tapui./.

Urang lang: Mousaphuong -5/12