Dom gru ju daok iek ruak di tuyến angaok 

Ngan haong hatai saneng mong iek pren yava saong tính mạng anek manuac nan lac prong abih, dahlau di abih, TBT, akaok negar Nguyễn Phú Trọng hu panuac iew taong abih bhap bani, ayut sahabat saong bol lin dalam negar, bhap bani drei daok pak negar langiu njauk gul pataom sa hatung hatai saong peih khang, ngak siam dom jalan ba di Đảng, Karja, bruk tacei pato, pal kaok ba jalan di Rajaei, Thủ tướng Raja-ei. Yaok rahra lac sa urang lin mesruh pacang jit ruak...". 

Kuhria tal harei 22/4, dom urang dương tính haong virus SARS COV2 di negar drei jeng daok lac 268 urang. Dalam nan, 160 urang mai meng negar langiu saong 108 urang njaom mbak dalam bol bhap rah ra. Dalam negar hu 216 urang ruak COVID-19 brei thau lac abih ruak.

Tal tukvak ini, khaol drei jeng daok mboh lac jit ruak daok dui atah saong kadha prong di abih nan lac oh iek lap, oh pacadu. Bruk brei daok atah di gauk jeng daok hu ngak di yaok puk palei ngan haong dom jalan ngak lagaih.

Mong veik jalan tapa blaoh piah mboh lac, khaol drei pasang iek hu biak siam jit ruak. Nan lac kayua Đảng, bol lin saong bhap bani drei hu patagok bruk gul pataom, sa hatung hatai dalam bruk mesruh pacang glaih glar ini.

Tui bác sĩ Trần Văn Khanh – Akaok Sang iek ruak Quận 2, TPHCM panuac di Tổng Bí thư, akaok negar Nguyễn Phú Trọng yau sa panuac iew pataom taong abih Đảng, taong abih bhap bani, dom bộ ngành, kapul nyaom, jeng yau hệ thống chính trị tame bruk pacang caga Covid-19. Kadha ini brei mboh bruk kham merat glaong abih di Đảng, Karja drei dalam bruk mesruh haong jit ruak daok tamuh khang angaok dunya, jeng lac daok rah tabiak khang dalam negar drei; brei mboh bruk sangka di Đảng, Karja ngan haong pren yava di bhap  bani: Tapa panuac iew pataom nan, khaol dahlak saneng lac, ngan haong bhap bani lac sa urang lin mesruh pacang caga jit. Khaol drei njauk hu hatai saneng dalam saong njauk brei mboh meng bruk ngak, meng bruk paglaong hatai sahneng, hu yau nan jit ruak meng samar hu pacang padam.

  Dalam bruk mesruh pacang Covid-19, bộ đội jeng yau biên phòng thei jeng kham merat abih hatai. Đại tá Nguyễn Duy Thắng – Chính ủy bộ đội Biên phòng TPHCM brei thau, biên phòng tuk halei jeng brei mboh bruk ba akaok nao dahlau. Gah biên phòng di bal raya HCM tuk halei jeng tui iek, pal kajap jalan tacei pato di Đảng, Karja, Raja-ei, Bộ Tư lệnh Biên phòng saong bal raya; peih ngak taong abih gah dom jalan ngak piah pacang caga jit hu siam mekre, yau peih ngak siam dom adat hukum ka bruk tame tabiak negar di pabah mbang negar, pabah lamnge piah pacang cakak bruk njaom mbak di jit ruak. Gam haong nan, gah biên phòng jeng peih ngak rilo jalan pacang caga piah ngak habar bol lin di drei oh njauk jit ruak njaom mbak tame. Đại tá Nguyễn Duy Thắng ndom lac, panuac ieu di Tổng Bí thư, akaok negar  Nguyễn Phú Trọng nan lac pren khang, pachreih hatai biak prong ka taong abih bhap bani, ka dom lực lượng dalam bruk mesruh pacang  jit Covid-19: Khaol dahlak hu pang panuac ieu di Tổng Bí thư, akaok negar Nguyễn Phú Trọng saong pathau khan tal taong abih urang jakar urang lin di drei. Khaol dahlak thau lac jalan ngak di Đảng, bhap bani drei lac pacang jit yau pacang kaol khamang kayua jit Covid mbuan ngak brei kan kandah khang tal pren yava, mbuan ba tal metai manuac. Kayua yau nan ye njauk hu bruk gul pataom sa hatung hatai haong gauk meng hatai saneng tal bruk ngak di Đảng, bhap bani, bol lin drei.

Lac urang jakar công an padeih hưu, Thiếu tá Lê Quý Ba ndom lac, panuac ieu di Tổng Bí thư, akaok negar hu ngak brei pamedeih, patagok hatai ranam taneh aia, bruk gul pataom sa hatung hatai oh lac tok hu di bhap bani dalam negar bo daok hu gam bhap bani drei daok pak negar langiu, dalam bruk msruh metak pacang caga jit. Ngan haong bruk jit ruak daok rah tabiak srau dhau yau urak ini, ye panuac ieu di Tổng Bí thư, akaok negar Nguyễn Phú Trọng hu makna biak prong: Bruk sangka pal akaok ba jalan di Đảng, tabiak panuac ieu taong abih bangsa pataom pren yava pandap panda tame piah pacang caga jit hu siam mekre. Dahlau di nan, ala bruk pal akaok di Đảng kaol khamang halei khaol drei jeng jayak. Saong harei ini dalam jit prong Covid-19, Đảngdaok pal akaok ba jalan bhap bani, taong abih bangsa gul pataom gauk piah samar padam jit.

Panuac ieu di Tổng Bí thư, Akaok negar Nguyễn Phú Trọng dalam tukvak tabung glaong di bruk musruh haong "khamang Covid-19" daok hu pabak pren khang jang piah ka Đảng, bol lin saong bhap bani drei paglaong hatai ranam taneh aia, gul pataom gauk, sa hatung hatai haong gauk piah pacang, caga jit hu siam mekre./.

Urang lang: Jasi-27/4