Kayua sang kan kandah, sa-ai Sa Ky Na bangsa Cam daok di khu phố 4, phường 17, quận Bình Thạnh, ban raya Hồ Chí Minh oh bac tagok Đại học hu hadei di tuk bac tamat Trung học phổ thông.  Sa Ky Na tame ngak bruk Đoàn saong hatai caong khin ngak hu bruk hagait nan piah daong ka menuac sia, abih di nyu nan lac daong ka dam dara Cam daok di ban raya  Hồ Chí Minh.

 Daok dalam puk Cam di khu phố 4, phường 17, quận Bình Thạnh, Sa Ky Na thau hu bruk bac da-a di dom adei sit pak ini takik hu sangka kayua dom sang di labik ini rilo meng kan kandah. Dom melam pato kèm ka adei di drei, Sa Ky Na sahneng tal dom adei sit oh hu sa-ai di drei pato kèm ye gaok biak rilo kan kandah tuk eng drei bac sap Yuan. Bloh Sa Ky Na peih tal pato sap Yuan ka dom adei sit urang Cam daok dalam puk. Oh lac pato bac saoh, Sa Ky Na daok hu tacei pato dom adei sinh hoạt dalam dom tuk hu padeih bac. Meng thau daoh tamia bo Sa Ky Na dui pachreih hu dom dam dara Cam tame sinh hoạt chi đoàn khu phố. Yaok mbang di phường atau di quận peih bruk daoh tamia, Sa Ky Na jeng urang tacei pato, gam pasram daoh, gam pasram tamia ka dom ayut. Kapul daoh tamia di khu phố tuk halei jeng mek hu giải glaong dalam dom mbang pakacah. Khu phố labik Sa Ky Na daok, nyu daok tapen ribaong, jeng daok hu menuac klaak nerak di jalan, nan ye anai jak ba mikva saong dam dara dalam khu phố pachreih tui dom harei adit hijao, tabiak puh ramik haci hacih khu phố...  Piah ka dam dara ba drei tame dom bruk xã hội, Sa Ky Na hu giới thiệu dom ayut tame đoàn, gam haong  Đoàn phường daong ka dom ayut nao bac bruk ngak, duah bruk ngak...

Thau cambaih trách nhiệm di urang đoàn, Sa Ky Na tuk halei jeng ba akaok nao dahlau dalam dom bruk di khu phố, bruk di đoàn phường. Thun 2014, Sa Ky Na hu Đảng ủy phường pok ngak Bí Thư Đoàn phường 17, quận Bình Thạnh. Meng kham merat dalam bruk ngak, Sa Ky Na hu ba tame Đảng Cộng sản Việt Nam. Ini jeng lac pren khang daong ka Sa Ky Na ba abih pren yava di drei, rik daong ka bruk  đoàn di puk palei. Urak ini, Sa Ky Na daok kham merat bac da-a, oh padeih paglaong ilamu. Sa-ai mboh lac, njauk paglaong jang bruk ba akaok nao dahlau, halan hatian, abih drei ka bruk ngak meng dom bruk yaok harei, daong hu rilo ka menuac sia saong ka puk palei. Sa-ai lac:  “Meng bruk ngak di đoàn adei mboh drei diuk rai hu siam mekre jang, hu makna jang tuk hu ba bui sambai mai ka urang karei”. 

Ndom ka urang dang akaok di drei, Châu Pharida, urang Đoàn dam dara Cộng Sản Hồ Chí Minh phường 17, quận Bình Thạnh, ban raya Hồ Chí Minh brei thau: “Lac urang dang akaok kapul dam dara, sa-ai Sa Ky Na tuk halei jeng thau hu trách nhiệm di drei, ba akaok nao dahlau dalam bruk ngak di Đoàn, daong ka urang đoàn, dam dara paglaong akaok sahneng, khik ramik saong patagok ilamu siam mekre di bangsa, meng nan ba abih pren yava saong hatung hatian tabiak dak padang đoàn phường khang kajap”.

 Meng bruk sami samar, hadah krah, Sa Ky Na hu ngak ka Đoàn phường 17, Quận Bình Thạnh cakrok patagok khang kajap, saong daok lac labik piah caik hatai jia, labik piah pambak tame di urang jakar, urang đoàn, dam dara dalam phường./.