Sang sa-ai Thị Nhơ dahlau daih daok di đội 6 palei Tân Lập, xã Phú Nghĩa, huyện Bù Gia Mập, tỉnh Bình Phước lac sa dalam dom palei bhian njauk ia dauk di bilan hajan ia sua. Oh hu điện, oh hu jalan, oh hu sang bac, oh hu bilai iek ruak, sang sa-ai diuk rai pagam pambak tame ceik glai. Meng tuk glai kreik pabah mbang, taneh dự án hu peih tabiak, dom baoh sang yau sang sa-ai Thị Nhơ  dak kan kandah jang. Thau hu bruk nan, karja labik ini brei padang khu tái định cư ka 40 baoh sang bhap bini S’tiêng palei Tân Lập daok di sóc Hai Căn, xã Phú Nghĩa. Hadei di jaik 2 thun mai daok di labik daok bahrau, rai diuk sang sa-ai dak harei dak tani tanat: " Dahlau deih daok dalam glai, eik lipa lô bloh daok hu ruak kik tra. Urak ini mai daok di labik bahrau ini mboh bui sambai lô. Karja ngak sang bloh dui điện, ia, sang bac, bilai iek ruak hu ginup abih, mikva thei jeng uan tabuan. Bui sambai lô, urak ini kuhria ngak mbang min."

 Dalam baoh sang bahrau praong jaik 50m², sang sa-ai Điểu So daok di sóc Hai Căn, xã Phú Nghĩa jeng oh padauk hu bui sambai. Sa-ai brei thau, meyah oh hu bruk sangka di Đảng, Karja ye baoh sang praong, siam ngan saong sa-ai lac bruk dalam lipei. Sa-ai Điểu So brei thau:

 "Sang kan kandah, ngak oh ginup mbang bo hu daong padang sang ye uan tabuan lô. Urak ini oh daok duh hatai tra. Oh lac brei drei limo, Karja daok hu brei tivi, gaok lisei điệntra, ndua dhar phor lô."

Meng tuk mai daok di labik tái định cư di sóc Hai Căn ini, raidiuk di diuk pasang Điểu So hu mbuan lagaih jang biak rilo. Lingiu bruk iek glang 1 ha phun pa-ok blait saong tangei, diuk pasang sa-ai daok mek asar pa-ok blait mai ngak tuk lahaiy. Mblang taneh klaak saoh gah likuk sang, sa-ai pala phun bơ saong njam patam, baoh kraoh. Dua urang anek di sa-ai hu nao bac da-a, oh daok njauk gùi anek tagok puh yau dahlau deih. Maong dom baoh sangbahrau, praong, siam tamuh tagok di labik tái định cư ini, thei jeng mboh hu pren diukrai bahrau di labik ini. Ong Đặng Sỹ Oánh – Chủ tịch Ủy ban bhap bini xã Phú Nghĩa, huyện Bù Gia Mập, tỉnh Bình Phước brei thau:

 "Meng tuk ba hu mikva urang bangsa takik di palei Tân Lập tabiak khu định cư bahrau ye raidiuk mikva hu ginup meda jang. Di labik daok klak jalan nao mai kan kandah, oh hu điện, oh hu ia, sang danaok taik tahak. Urak ini tabiak daok di labik bahrau, hu sang kiak praong, hu jalan bê-tông, jalan randaih, bloh daok hu điện, hu ia. Đoàn Kinh tế Quốc phòng 778 ngak sang bloh daok brei tivi, kandik điện, goak lisei điện. Meng tabiak daok di labik bahrau ini, raidiuk mikva hu hadah hadai tagok."

Bruk bui sambai oh lac mai ka sa-ai Thị Nhơ, sa-ai Điểu So bo daok mai tal rilo baoh sang kan kathaot bangsa S’tiêng daok di đội 6, palei Tân Lập. Nan lac 15 baoh sang bahrau, yaok sang yaom labaih 60 triệu đồng kayua Đoàn Kinh tế Quốc phòng 778 ngak pô đầu tư daok padang ngak, saong hu ngak salah bloh jao ka bhap bini di puac thun 2016 ini. Bruk daong pren, daong drap ar di  Đoàn Kinh tế Quốc phòng 778 – đơn vị đóng di labik biên giới Bù Gia Mập, tỉnh Bình Phước ngan saong mikva biak hu makna. Ong Đặng Công Bầu – Akaok Đoàn Kinh tế Quốc phòng 778 brei thau:  "Da-a urang mai daok di labik bahrau ye brei daong ka urang hu mbuan lagaih di labik daok bahrau. Daong ka urang thau pala drak, raong glang, tacei ka urang thau pacang caga jit ruak, piah ngak habar ka labik daok bahrau siam jang labik daok klak. Urak ini bhap bini thau pala njam paje. Bahrau ini, kol dahlak saong  Cty Hải Vương hu daong pajaih phun bơ ka mikva pala, yaok sang hu 5 – 7 phun."

Lingiu dự án tái định cư di sóc Hai Căn (tiểu khu 119), xã Phú Nghĩa, huyện Bù Gia Mập, tỉnh Bình Phước jeng ngak hu bloh 9 dự án định canh, định cư ka bhap bini bangsa takik, daong brei 681 sang tani tanat raidiuk di bhum dự án.Dom palei daok hu daong phun pajaih, anek pajaih, khak drak ka bhap bini labik định canh, định cư patagok bruk ngak mbang, pala drak, tani tanat raidiuk. Danak dak định canh, định cư hu daong patrun kathaot khang kajap dalam bhum bhap bini bangsa takik. 

Tỉnh Bình Phước hu labaih 14.600 baoh sang kathaot, dalam nan sang kathaot urang bangsa takik hu labaih 44%, ralo meng lac bhap bini S’tiêng, M’nông saong Khmer. Dalam nan hu biak rilo sang daok caong hu sang daok. Kayua yau nan ye, anak tal, dom pakat karja labik ini daok pataom pren yava, jak ba dom urang ngak pahala dalam saong liniu tỉnh piah kuhria labik daok ka bhap bini./.