SA URANG DANG AKAOK KAPUL URANG KAMEI YAU KREIH CAMIN 

Di palei Cam Hiếu Thiện, xã Phước Ninh, huyện Thuận Nam, tỉnh Ninh Thuận thei jeng thau tal saai Thiên Thị Nên, akaok kapul urang kumei palei – sa urang kamei kak kajap saong dom bruk ngak di puk palei meng jaik 20 thun ini mai. Bruk abih hatung hatian di saai ka dom bruk xa hoi dalam palei hu daong jhul lahik dom te nan xa hoi, dak harei dak cakrok kinh te sang dalam dom talei pajaih, sang urang Cam dalam xa Phuoc Ninh. Kadha vak ala ini di Thuy Linh - urang vak di rayo sap ndom Biet Nam daok di ban raya Ho Chi Minh brei thau ka bruk nan.

 Thau lac bruk pacang caga kol toi pham saong te nan xa hoi nan lac sa dalam dom tanut dak padang sang trei sir, haniem phul saong binh dang tien bo, rilo thun ini mai saai Thien Thi Nen jak ba hu 30 adei sa-ai di palei Hiếu Thiện pataom mbaok tame padang kalup kapul “Urang dalam sang oh gaok dom te nan xa hoi”, padang ngak bruk “ sang lime oh, klau hacih“. Dom kalup kapul nan taom gaok gauk 3 bilan sa mbang piah ndom biai dom asal kadha ka bruk pacang caga HIV/AIDS; hacih saat moi truong; jhul khang bruk ilimo, daoh tamia, padhih…Saai Nguyen Thi Chinh, akaok kapul urang kamei xã Phước Ninh, huyện Thuận Nam, tỉnh Ninh Thuận brei thau :“ Bruk pambuak saong cong an jak ba dam dara urang daok ranaih dalam sang, dalam  talei pajaih, urang kumei pato pakai anek bhik, oh hu urang dalam sang gaok dom te nan xa hoi, kapul ini hu pilih ruah ngak iek dahlau, tacei jalan ka dom palei karei. Daok bruk njauk biai dalam bruk ngak di saai Nen nan lac Nai ngak biak siam dut saong dom labik karei, adei saai ngak bruk meng abih hatung hatai di drei”

Taphia di nan, saai daok pambuak bruk saong kapul urang kumei xa, kapul nyaom gam gam khan brei thau jalan padang sang ilamu, bruk likei kumei samu gauk, haniem phuan, iek glang pren yava urang kumei, uranaih ka jaik 200 urang kumei dalam kapul; pambuak bruk saong cong an xa, huyen jak ba yaok ratuh sang, talei pajaih urang Cam khik iek, pato pakai anek bhik oh gaok dom te nan xa hoi; peih tabiak bruk dak padang labik bhapbini daok an toan pagam saong dak padang raidiuk ilimo. Urak ini, dalam chi hoi urang kumei palei Hiếu Thiện hu 85% sang urang kumei mek hu tanut ilimo. Bruk kham merat abih hatung hatian di saai Thien Thi Nen hu daong pren ngak bruk ka dom adei saai karei saong saai hu dom adei saai kumei xa Phuoc Ninh anit ranam. Saai Thien Thi Nen khan lac:" Kayua bruk di bhapbini, caong habal ka bhapbini, abih di nyu nan lac urang kumei dak harei dak patagok, ta - eng drei tuk halei kham marat ba abih hatung hatian ka bruk ngak ka bhapbini, puk palei..."

Oh lac yau nan saoh, saai Nen daok hu daong ka adei saai kumei Cam thau patak pataom pandar cai meng bruk jak ba yaok urang kumei dalam kapul rik tame yaok bilan 50 rabau dong piah padang kadung jien patak pataom, patagok kadung jien patak pataom urak ini hu labaih 170 trieu dong; peih bruk brei ka adei saai kumei tame bac megru alamu, daoh tamia, taom gaok ndom biai nao mai saong dom kapul urang kumei ayut dalam harei 8/3, 20/10, dom harei rija, roya...piah paglaong akaok sahaneng ka adei saai. Saai Thiên Thị Đầy, daok di palei Hiếu Thiện, xã Phước Ninh, huyện Thuận Nam, tỉnh Ninh Thuận, lac :" Akaok kalup meng akaok mai biak abih hatung hatian, bruk hagait jeng ngak siam. Langiu nan, saai daok jaik taphia, bruk hagait saai jeng thau cambaih"

      Meng bruk kham merat di drei, abih hatung hatian brei ka bruk patagok di urang kumei, saai Thien Thi Nen daok harei melam pambuak saong dom adei saai kumei Cam di puk palei dalam bruk khik kajap trat tu an toan xa hoi di labik bhapbini daok, daong ka dom sang urang Cam cakrok bruk ngak mbang kinh te, dak padang raidiuk haniem phuan./.

Thúy Linh