Sa urang đảng yam tagok ngak meda saong kham merat ngak bruk xã hội.

Umo 63 thun min ông Nguyễn Tấn Thanh jeng daok jar var saong bruk ngak yaok harei. Ông urak ini ndua nong rilo bruk, lac akaok Hội đồng thành viên – gam ngak Tổng giám đốc công ty  TNHH- Thương mại- Dịch vụ Hoan Vinh, akaok kapul doanh nghiệp urang dahlau dhiah ngak bol lin tỉnh saong lac thành viên di rilo gah karei di huyện Châu Thành saong tỉnh Tiền Giang.

Ông Thanh brei thau, dalam mesruh metak ông lac du kích di xã Mỹ Tịnh An, huyện Chợ Gạo. Tuk taneh ia hu hòa bình, ông hu tukvak suai livik ngak bruk gah công an. Thun  2007,  ông padheih bruk mai sang tame ngak mbang pablei salih dom pandap jhik pet. Tuk akaok mereip, cơ sở ngak biak sit tok hu 5 tal 7 urang ngak, tal thun 2012, ông Nguyễn Tấn Thanh khang hatai pah taneh mbaok jalan roya 1A piah peih praong bruk ngak mbang, padang công ty  Hoan Vinh ngak ao đầm thời trang cao cấp piah pablei tabiak taneh ia lingiu. Meng salih barau mẫu mã, paglaong chất lượng, njauk saong hatai caong khin di urang blei lingiu taneh ia yau nan ye dalam tukvak katut, ao đầm thời trang di công ty Hoan Vinh hu mintri thương mại Hoa Kỳ brei thau ginup điều kiện pablei tapa darak pasal kan si tame ini.

Tal urak ini, công ty hu labaih 600 menuac ngak, ngak ao đầm pablei tapa Hoa Kỳ labaih 1 triệu pandap sa thun. Tui ông Nguyễn Tấn Thanh piah khik hu darak pasal kan si tame yau Hoa Kỳ ye chất lượng pandap tuk halei jeng lac bruk sangka dang akaok saong njauk khik “chữ tín” dalam ngak mbang:  Jalan ba tal jak jengdahlau di abih lac angan je di công ty, ka dua lac khik ka pahu chất lượng. Ngak bruk saong đối tác taneh ia lingiu di gah pablei pandap tabiak taneh ia lingiu njauk khik hu chất lượng lac bruk praong, hadei nan lac angan je dalam saong lingiu taneh ia. Tabhia nan, khik talei pambuak bruk, pasang iek raidiuk ka công nhân, urang ngak, ngak siam bruk ngak pahla .

-Tuk bruk ngak mbang pablei salih hu jak jeng, ông Nguyễn Tấn Thanh hu mbuan lagaih pataom mbaok tame bruk an sinh xã hội. meng trách nhiệm di sa urang đảng, urang dahlau dhaih ngak bol lin, ong saong karja palei pasang iek ka urang kathaot, sang kan kandah. Dalam dom urang daok ngak bruk ye hu labaih 20% urang dahlau dhaih sang oh patuah jamo ye: gaok jaoh jo, dam dara suai praong saong urang  nghiện ma túy…Meng hatai anit ranam, pasang iek saong daong, pato bruk ngak, rilo dam dara meng “ tangin saoh” urak ini jeng dom kỹ thuật, thợ ngak kheih bruk ngan saong jien bilan meng 6-7 triệu đồng/sa bilan. 

Adei Hồ Minh Trí, urang daok ngak bruk di công ty TNHH- pablei salih- Dịch vụ Hoan Vinh khan lac: Adei tame công ty ngak jaik 10 thun paje. Tuk barau tame oh thau ngak bruk hagait, tame dalam ini Ban Giám đốc pato bruk, sangka hu jien bilan tani tanat. Raidiuk di dahlak biak tani tanat, urang jakar khik ramik saong cei Thanh biak sangka tal raidiuk adei saai di ini. Tukvak tal, dahlak kham merat ngak bruk abih drei piah rik daong ka công ty dak harei dak praong khang jang.

Piah pachreih saong khik takai urang ngak, tukvak tapa, ông Nguyễn Tấn Thanh saong Ban giám đốc công ty tuk halei jeng hu sarak siam ka urang ngak. Abih di nyu nan lac bruk alin ameh yaok thun 2 mbang di harei lễ 2-9 saong Tết cổ truyền ka dom urang ngak hu tukvak ngak bruk suai livik saong ngak bruk siam. Urak ini, công ty Hoan Vinh hu 6 thun hamiet alin ameh ka urang ngak ngan saong abih tih jaik 1.500 chỉ ameh 4 baoh 9. 

-Meng dom bruk ngak hu dalam pasang iek raidiuk ka urang ngak di Công ty  TNHH- pablei salih - Dịch vụ Hoan Vinh  hu uy mban bhapbini tỉnh alin hala dok pakacah doanh nghiệp hadah trah, xuất sắc 4 thun hamiet saong hu Thủ tướng rajaei alin harak meyaom. Daok ông Nguyễn Tấn Thanh hu Trung ương kapul urang dahlau dhaih ngak bol lin Việt Nam alin harak meyaom urang dahlau dhaih ngak bol lin ngak mbang pablei salih naih joi.

-Ông Trịnh Văn Ba, Bí thư Đảng ủy xã Tân Lý Tây, huyện Châu Thành, brei thau, tukvak tapa ông Nguyễn Tấn Thanh tuk halei jeng sangka daong dom urang dalam kapul urang dahlau dhaih ngak bol lin kathaot; tabhia nan, daong pakat uy, karja puk palei pasang iek raidiuk sang kathaot, sang sarak saong dom urang đảng sang ngak mbang kinh te kan kandah. Yaok thun, ông caik tabiak yaok ratuh trieu dong piah ngak bruk xã hội. 

-Yaom lac thun jeng glaong, min tuk ndom tal bruk ngak mbang pablei salih jeng ye bruk ngak xã hội, ba bruk ngak ka rairaih ranaih umo ye urang đảng Nguyễn Tấn Thanh biak chreih chrai. Ông Nguyễn Tấn Thanh brei thau, bruk siam abih di doanh nghiep Hoan Vinh lac ba bruk ngak tani tanat ka dam dara. Kayua yau nan ye tukvak tal, ông kham merat ngak siam bruk ini.

Meng hatung hatian siam mekre yau nan, jia lac ông Nguyễn Tấn Thanh daok dang akaok, ba công ty Hoan Vinh tagok glaong jang dalam ngak mbang pablei salih saong bruk pahla xã hội,  njauk lac sa urang dahlau dhaih ngak bol lin, sa urang đảng hadah trah./.

Thúy Linh