Chreih chrai tuk taduan urang ruak, bui sambai tuk iek ruak, abih hatai kakei tuk urang ruak tabiak nao sang, nan lac dom hagait bo kol dahlak mboh hu di bác sĩ Từ Huyến, khoa Hồi sức Cấp cứu - sang iek ruak Đa khoa khu vực Bắc Bình Thuận, tỉnh Bình Thuận. Klik jhuk, mbaok meta slut mbut, cambuai tuk halei jeng khim klau, urang gru jru bangsa chăm ini mboh biak jaik saong ngak brei urang ruak caik hatai jia tuk taom gaok.

Ndih tapui tabiak dalam sa baoh sang kan kathaot di palei Chăm Phước Nam, huyện Ninh Phước, tỉnh Ninh Thuận, hadei di tuk bac tamat sang bac Đại học Y Tây Nguyên thun 1996, bác sĩ Huyến mai ngak bruk di Khoa Nội, pasak Y tế Bắc Bình, tỉnh Bình Thuận (urak ini lac sang iek ruak Đa khoa khu vực Bắc Bình Thuận). Di labik ini, saai hu patagok abih pren di drei piah daong urang ruak. Yaom lac jien bilan oh hu hadom, rai diuk daok gaok ralo kan kandah min saai jeng kham merat daok veik di sang iek ruak ini, kayua saai saneng lac, ngak gru jru hu iek ruak ka urang ruak lac hanem phon. Tal urak ini, bác sĩ Từ Huyến ngak bruk hu 21 thun, dalam nan, labaih 11 thun lac akaok khoa Hồi sức Cấp cứu, sang iek ruak Đa khoa khu vực Bắc Bình Thuận. Meng kham merat bac megru, paglaong ilamu chuyên môn, pasram y đức piah ngak siam bruk ngak di drei, thun 1999 saai lac sa dalam takik bác sĩ urang Chăm hu ba tame Đảng Cộng sản Việt Nam. 

 Khoa hồi sức cấp cứu labik saai Huyến ngak bruk, lac labik gam taduan cấp cứu tuk camereip, gam hồi sức dom urang ruak trak. Kayua yau nan ye, yaok urang gru jru di khoa ini brei kham merat abih pren yava meng ngak siam bruk hu jao brei. Di tuk lễ tết, urang ruak ralo, dalam nan ralo meng lac njauk bala angaok jalan mbak, urang jakar, nhân viên di khoa dak glaih glar ralo jang. Bác sĩ Từ Huyến khan lac, hu dom urang tuk ba tame oh thau gauk gar, sang danaok daok labik halei, tok mboh radaih taxi pajeng mai, rup bak drah, mbau alak saong mbau ta-aok, kayua oh hu gauk gar  nan ye saai jeng daong hong urang peih radaih taxi ba urang tame duk cấp cứu. Ralo urang gauk gar oh thau huroh, tuk mek harak chuyển viện, atau kê đơn jru saai jeng abih hatai tacei pato, yaom lac biak jar var haong bruk cấp cứu. Bác sĩ Huyến khan lac:  

Sap Chăm

Dalam luac tukvak ngak bruk, bác sĩ Huyến oh caik rah tabiak sa tai biến halei ka gây mê hồi sức ka dom urang ruak, patakik hu bruk chuyển viện, patrun hu urang metai. Langiu bruk abih hatai jai iek ruak ka urang ruak, saai daok kham merat bac megru, ruah duah saong pandar khoa học tame chuyên môn piah duh ka urang ruak dak harei dak siam jang. Meng hatai anit urang ruak lac “oh hu rambah halei samu rambah ruak kik”, saai bhian pahadar rup drei saong kakei adei saai đồng nghiệp brei iek urang ruak yau gauk gar di drei piah ba abih hatai jai tabiak iek ruak”. Bác sĩ Nguyễn Tấn Ngà, akaok duk Kế hoạch, sang iek ruak Đa khoa khu vực Bắc Bình Thuận  brei thau: 

 “Bác sĩ Từ Huyến – akaok khoa Hồi sức Cấp cứu lac sa urang abih hatai jai ka bruk ngak, saai kham merat saong abih hatai dalam bruk ngak. Yaom lac daok ranaih umo min saai hu biak ralo sáng tạo dalam bruk ngak. Saai hu daong plaih di metai ka biak ralo urang di khoa cấp cứu jeng yau duk chạy thận nhân tạo”.

Bác sĩ Huyến brei thau: “Dalam rai diuk di drei, dahlak hu dua mbang ba tabiak panuac thề thiêng liêng. Nan lac panuac tuyên thệ tapak hatai saong bruk ngak, lý tưởng cách mạng tuk hu tame Đảng saong panuac thề “Hippocrates” di var tamat đại học ngành y. Kayua yau nan ye, dahlak tuk halei jeng pahadar rup drei brei iek urang ruak yau gauk gar di drei, bruk pandik pandua di urang ruak jeng lac bruk pandik pandua di rup drei. Meng nan, brei pasram megru, ngak njauk 12 paka quy định ka y đức, abih di nyu nan lac ngak siam panuac pato di Wa Hồ: "Lương y yau từ mẫu"./.