Sa urang likei dam ngak kaya meda meng bruk raong pabe

Jaik ini, bruk raong pabe piah pablei salih di dom tinh dalam bhum taneran kraong CL patagok khang, kayua phun jien takik, kien laba glaong. Dalam nan,bruk raong pabe trang trai di saai Đoàn Văn Hồng, daok di palei Giồng Lãnh II, xã Tăng Hòa, huyện Gò Công Đông, tỉnh Tiền Giang mek hu kein laba glaong di abih, rik daong ka bruk pabak pajaih pabe saong rilo pabe chat luong glaong ka abih bhum. Nhật Trường urang vak di rayo sap ndom VN hu kadha vak: Kiện tướng raong pabe palei Gò”       

Kol dahlak nao ravang trang trai raong pabe di saai Đoàn Thanh Hồng daok di palei Giồng Lãnh II, xã Tăng Hòa, huyện Gò Công Đông, tỉnh Tiền Giang tuk saai daok jar var saong bruk pablei jaik 20 drei pabe pajaih ka urang blei. Saai Hồng brei thau, tapol pabe di sang saai urak ini hu mbaok di grauk tỉnh, ban bhum taneran kraong CL. Angan pabe Tăng Hòa hu rilo urang thau tal.

Dahlau thiah, sang saai jeng ye rilo sang di xã Tăng Hòa gaok biak rilo kan kandah kayua hamu taneh takik, pala drak tok hu 1 tal 2 vụ yaok thun, nang suat bair. Meng di nan, saai khang hatai salih tapa raong pabe piah patagok kinh te sang.Tuk camereip saai raong iek sa drei pabe binai, min kayua kurang alamu, pajaih jhak nan ye tuk menek pabe nyu metai. Oh nản chí, saai kham merat duah thau, bac megru alamu meng tapuk, harak báo saong meng urang jakar gah ngak nong, bloh nao duah blei pajaih pabe siam piah raong. Meng nan, tapol pabe di saai dak harei dak rilo jang.

Thun 2009, hu bruk daong  alamu di urang jakar pasak pajaih ngak nong Tiền Giang, saai ngak iek bruk tạo pajaih pabe barau hu angan lac pabe ia tasau lai F1. Biak tatuak drei, dom drei pabe camereip saai phối pajaih, caih tabiak 7 drei pabe anek. Pajaih pabe lai ini siam jang dom janih pabe mengkan di puk palei ye : praong samal, brei ia tasau rilo saong thaik gheih, khang kadang, takik ruak. Hadei di sa bilan caih tabiak, pabe ia tasau lai trak meng 8 tal 10 kg, raong 3 bilan patui di nan trak meng 17 tal 20 kg. Tal urak ini, trang trai di saai  Đoàn Văn Hồng hu labaih 100 drei lac pabe ia tasau lai saong yaok bilan caih tabiak labaih 20 drei pabe anek.

Urak ini, yaok bilan saai pablei meng 15 tal 30 drei pabe pajaih, yaom pablei pabe tano pajaih labaih 200.000 đ/sa kg, pabe binai pajaih meng 300- 350.000 đ/sa kg. Abih di nyu nan lac pabe ia tasau saai pablei hu yaom glaong tal 700 rabau  đồng/sa kg. Daok ia tasau pabe, oh ginup pablei ka urang blei ngan saong yaom  60 rabau đồng/ sa kg.  Meng trang trại raong pabe, yaok thun saai Hồng mek mai jaik meteh tỷ đồng meng pablei pabe pajaih, kaoh bloh phun jien buh tame, saai daok laba hu jaik 300 triệu đồng/sa thun. Ndom ka bruk raong pabe, saai Đoàn Văn Hồng khan lac: Raong pabe piah jak jeng, camereip di abih njauk ruah pajaih siam. Ka dua lac urang barau raong njauk megru urang nao dahlau, piah hu alamu meng jak jeng. Ruah pajaih siam njauk ruah ngoại hình, talang praong, balau jangaih, drah samar, bộ phận sinh dục siam…hu yau nan pabe meng menek  siam.

Meng bruk raong pabe hu kein laba glaong di saai  Trần Văn Hồng  bo jaik 80%  sang di  xã Tăng Hòa saong yaok ratuh sang di dom xã jaik taphia jeng megru, blei pajaih đầu tư raong pabe. Dom sang raong pabe jeng patruh kan kathaot, jeng kaya meda. Saai Chu Hoàng Châu, urang daok di Quận Bình Thủy, ban sit Cần Thơ  nao ravang trang trai pabe di saai Đoàn Văn Hồng bloh khang hatai blei jaik 20 drei pabe pajaih mai raong. Saai Châu brei thau, biak pok meyaom bruk ngak di urang likei dam  ini : Drei duah thau mboh saai Hồng raong pabe rilo, drei bac megru alamu saai abih hatai tacei pato. Drei mboh trại ini biak praong, biak siam. Saai tacei pato drei biak rilo alamu, min drei oh ka dhar abih, drei njauk bac megru rilo jang.

Oh lac ngak meda ka rup drei, ka sang drei bo tukvak tapa saai Đoàn Văn Hồng daok hu daong anek pajaih, tacei alamu piah daong ka rilo dam dara, urang nong kan kathaot dalam palei raong pabe piah pasiam raidiuk. Saai lac urang dalam mBan chấp hành Kapul urang nong xã Tăng Hòa, rilo thun lac urang nong ngak mbang naih joi pakat huyen, pakat tinh.  Ông  Nguyễn Thế Hợp, akaok uy mban bhapbini xã Tăng Hòa, huyện Gò Công Đông, tỉnh Tiền Giang brei thau :Urak ini bruk ngak mbang di saai hu pambak praong, dom tỉnh jaik taphia hu mai blei. Sang saai Hồng hu daong jien ka bhapbini, tet ye alin pandap ka sang kan kathaot, abih di nyu nan lac di palei Giồng Lãnh II. Saai Hồng bac megru duah jalan ngak mbang, ba angan pabe xã Tăng Hòa ngak jeng angan di Tổ hợp tác daong ka bhapbini patruh kan kathaot.

Oh njauk hatai haong bruk di anak meta, saai Đoàn Văn Hồng daok kuhria peih praong bruk raong pabe tui jalan an toàn sinh học, abih di nyu nan lac raong angaok blah đệm lót sinh học; kham merat lai tạo tabiak pajaih pabe siam, dak padang angan pablei salih saong daong ka rilo urang raong pabe tabiak truh kan kathaot, yam tagok ngak kaya meda./.

Thúy Linh