Saai Basiroh – urang tổ trưởng abih hatai saong bruk kapul urang kumei

***

        Labaih 15 thun kak kajap saong bruk kapul urang kumei, saai Basiroh, akaok Tổ urang kumei Cam khu phố 1, phường 17, quận Phú Nhuận, ban raya Hồ Chí Minh tuk halei jeng sahanneg duah bruk daong hội viên kathaot yam tagok dalam raidiuk. Ái Nghiêm, urang vak di rayo sap ndom VN daok di ban raya HCM hu kadha vak ndom ka kreih camin ini:

      Saai Basiroh tagok pan akaok Tổ urang kumei Cam khu phố 1, phường 17, quận Phú Nhuận, ban raya Hồ Chí Minh tuk nan bahrau hu 10 hội viên. Saai hu nao tal yaok sang ravang me-in, duah thau hatai caong khin di dom hội viên kan kandah piah hu jalan daong saong jak ba dom saai tame kapul. Tuk hội viên dak harei dak rilo, saai khang hatai ba tabiak bruk padang Kadung jien patak pataom kayua urang kumei kathoat piah dong hội viên patagok bruk ngak mbang dua jien. Ngan saong yaok hội viên, saai ba tabiak jalan pathau khan, jak ba ka nyu lagaih, meng di nan taong abih hội viên njauk gauk hu mbaok tame padang kadung jien, tui yaom jien rik tame  50.000 đồng yaok urang sa thun. Kadung jien rik pataom hu, saai saong tổ njauk gauk caik dahlau ka dom hội viên kan kandah hu mesraiy dalam tukvak sa thun, blaoh brei ka hội viên karei mesraiy. Meng paok jien ini, rilo hội viên dalam tổ hu tabiak truh kathaot. Thun 2002, daok 13 hội viên kathaot dalam abih tih 35 hội viên di tổ min urak ini tok daok 2 sang. Kadung jien patak pataom kayua urang kumei kathaot hadei di rilo thun jeng daok hu tổ khik labaih 100 triệu đồng saong daok brei ka 11 hội viên mesraiy patagok bruk ngak mbang.

       Meng hatai anit menuac sia saong meng angan je di drei, saai Basiroh hu jak ba mikva dalam khu phố rik pataom daong ka urang kathaot. Dalam khu phố hu sang saai  Rokigiah, oh hu bruk ngak tani tanat nan ye raidiuk 5 anek maik saai Rokigiah dalam baoh sang sit sup palup labik ka 111/12A Huỳnh Văn Bánh, phường 17, Quận Phú Nhuận tuk halei jeng kurang anak, kurang likuk. Thau hu bruk kan kandah di sang ini, saai Basiroh nao tal yaok sang rik pataom hu 40 triệu đồng daong ka saai Rokigiah ramik pasiam baok sang piah pacang pandiak, pacang hajan. Taphia di nan, saai jeng hu pok panuac tagok phường, quận brei angan sang saai Rokigiah lac sang kathaot piah hu mbang tui sarak daong sang kan kandah. Saai Basiroh daok hu ba saai Rokigiah nao ngak pah di quán mbang piah hu jien tame. Saai Rokigiah drut droi ndom lac : "Saai Basiroh mboh thei kan kandah saai jeng daong. Sang dahlak kan kandah, saai likau phường, quận, mikva khu phố daong baok sang ini barau ramik pasiam blaoh."

        Tổ urang kumei Cam khu phố 1 urak ini hu labaih 100 hội viên, dom saai jeng kham merat ngak mbang, jien mek tame tani tanat, paglaong raidiuk. Ndom ka dom rik daong di saai Basiroh dalam bruk urang kumei, saai Ngô Như Thảo, akaok kapul urang kumei phường 17, Quận Phú Nhuận brei thau : “Dahlau thiah, adei saai kumei Cam takik hu mbaok tame kapul, nyaom. Meng tuk hu saai Basiroh, dom adei saai kumei Cam tame kapul gam gam saong rilo jang. Ini jeng lac dom urang daong ba dom asal kadha ka adat hukum di karja nao tal bhapbini Cam hu siam, lagaih.

        Meng abih hatung hatai ka bruk kapul urang kumei di saai Basiroh, rilo thun hamiet, Tổ urang kumei Cam khu phố 1 tuk halei jeng mek hu angan khang kajap. Daok rup saai jeng hu kapul urang kumei quận saong kapul urang kumei ban raya alin harak meyaom. Oh lac joi bruk taneh ia, saai Basiroh daok lac urang diuk, urang amaik naih bruk sang, raong dom urang anek jeng menuac, jeng urang. Ini jeng lac pren khang daong ka saai kajap hatai dalam raidiuk saong ba abih pren yava di drei brei ka bruk kapul urang kumei./.

Thúy Linh