“ Sang bahrau ngak veik var pabe, pak ini tok hu dua diuk pasang patuah hu dom cei biên phòng mai daong ngak, yau nan ye bo hu yau ini. Lingiu di nan, dom cei biên phòng daok daong ngak hareik ka bein amariak kalu daok cang peik baoh hadei di Tết. Hu bein amariak  kalu yau ini jeng mai meng dom cei biên phòng daong”

Nan lac panuac khan di sa-ai Điểu Duy Khánh, bangsa S’tiêng daok pak ấp Vườn Bưởi, xã biên giới Lộc Thiện, huyện Lộc Ninh, tỉnh Bình Phước tuk khaol dahlak mai rivang sang sa-ai dalam dom harei puac thun Bính Thân 2016. Oh ta-eng hagait baoh sang sa-ai Điểu Duy Khánh, jaik abih dom baoh sang mikva bangsa takik di dom huyện, xã bhum tapen negar ini jeng kak kajap haong dom urang lin biên phòng yau gauk gar dalam sang. Tuk thun bahrau mai, grauk labik dalam bhum taneh tapen negar hu chreih chai tagok meng dom bruk ngak piah daong ka urang kathaot labik tapen negar bui sambai mbang Tết uan raok thun bahrau di dom urang lin biên phòng. Dom pok pandap Tết hu Bộ đội Biên phòng Bình Phước soang dom urang ngak pahla mai brei tal tangin ka dom baoh sang urang bangsa takik kan kathaot ngak bui hatai dom baoh sang kathaot rambah labik tapen negar…

Oh lac yau nan saoh, dom harei jaik si Tết, urang jakar, urang lin biên phòng daok trun tal puk palei, daong mikva puh ramik, pasiam veik sang danaok, pasiam veik van ro, ngak hareik di jalan mbak ka nyu hadah hadai caga raok thun bahrau. Kayua yau nan ye, rup binguk “Urang lin tuan quân hàm xanh” tuk halei jeng hadah hamiat dalam hatai mikva. Ong Lường Văn Vì, bangsa Tày daok pak ấp K54, xã biên giới Lộc Thiện, huyện Lộc Ninh, tỉnh Bình Phước brei thau:  

 “ Dahlak thau dhal phol urang jakar, bộ đội biên phòng 805, bộ đội biên phòng tỉnh Bình Phước. Sang dahlak biak kan kandah, hu bộ đội biên phòng daong padang ngak hu sa baoh sang gul pataom, blaoh dalam tuk Tết daok brei ka sang dahlak pok pandap dom pluh ký brah piah mbang Tết, biak thau dhal phol bộ đội biên phòng”

Langiu di bruk prong bo Đảng saong bhap bani jao brei nan lac khik caga chủ quyền an ninh tapen negar, daong padang bhum tapen negar khang kajap, dom urang lin biên phòng pak ini gam rambah rambup haong mikva bangsa takik. Harei tapa harei, gam ngak siam bruk khik iek bhum tapen negar, dom sa-ai oh van hu bruk sangka daong ka mikva labik ini tani tanat rai duik. Đại úy Đặng Đình Chuyển – Akaok Kapul jak ba bhap bani Đồn Biên phòng Tà Nốt brei thau:

“ Daong ka bhap bani cakrok patagok kinh tế nan lac sa bruk prong, mboh hu kadha nan urang jakar kapul jak ba bhap bani gam haong đồn biên phòng bhian nao pasang iek, duah thau raidiuk di yaok baoh sang. Tapa nan hu jalan daong, ba tabiak jalan ngak piah patagok  bruk ngak mbang kinh tế, tui pren yava, jalan ngak mbang di yaok baoh sang”

Hu mbaok piah mbang tết avan pak Đồn Biên phòng Tà Pét dalam dom harei puac thun Bính Thân, khaol dahlak meng thau cambaih dom kan kandah, kurang ralo janih di jabat. Daok angaok canah jalan tuần tra tapen negar jaik taphia haong tỉnh Tbongkhmum, Vương quốc Campuchia, sa labik chiến lược ka quốc phòng an ninh nan ye urang jakar, urang lin Đồn Biên phòng Tà Pét tuk halei jeng paglaong hatai sangka, nao pasang iek angaok jalan biên giới yaom lac harei pandiak atau hajan. Dalam kan kandah, dom sa-ai jeng harei melam kajap tangin phao, khik caga sron mbon ka palei negar, kayua dom sa-ai saneng lac “đồn nan lac sang, tapen negar lac bhummi,, bhap bani bangsa takik lac adei sa-ai tung pruac”. Chiến sĩ Nguyễn Ngọc Sơn, Đồn Biên phòng Tà Pét khan lac:

“ Ini lac thun akaok mereip adei mbang Tết di đồn, Tết oh nao sang hu jeng uan amaik ame. Hu bruk sangka di pakat ủy, Ban chỉ huy đồn, adei biak sahanang hatai ngak bruk saong ngak siam bruk di drei. Tame thun bahrau likau payua panuac tadhau ayuh tal amaik ame adei sa-ai dalam sang, Tadhau ayuh dom urang jakar di đồn ngak bruk siam saong hu ralo pren yava, ralo bui sambai jang”.

Piah ba bui sambai saong pachreih hatai urang jakar urang lin, Đồn Biên phòng Tà Pét pambuak haong pakat ủy, karja puk palei saong dom jabat kết nghĩa peih ngak ralo bruk bui ma-in yau: daoh tamia, me-in thể thao, pachreih ralo urang jakar, urang lin saong bhap bani hu mbaok tame, ba chreih chai bui sambai saong bak hatai gul pataom. Tình đồng đội, tình quân dân nyu ngak van nao bruk uan sang, hadhar tal gauk gar di bhum palei dalam hatai yaok urang lin. Jeng dalam tukvak thun bahrau ini, Đồn Biên phòng Tà Pét jeng hu alin brei 200 pok pandap, tui yaom jien jaik 74 triệu đồng, dalam nan hu brah, mì gói, phui kamo saong dom janih pandap pandar karei brei ka mikva kathaot pak xã tapen negar Lộc Thành; tacei jalan pacang caga dom janih ruak bhian gaok ka mikva, abih di nyu lac tukvak dahlau, dalam saong hadei di Tết Nguyên đán. Thượng tá Hoàng Tất Thắng - Chính trị viên Đồn Biên phòng Tà Pét khan lac:

“ Meng harei 22/12 khaol dahlak hu kuhria caga blaoh. Jak ba dom jabat  kết nghĩa, dom công ty, doanh nghiệp, sang iek ruak tagok ini iek ruak, brei jru saong alin brei pandap Tết ka mikva. Langiu di nan, khaol dahlak daok hu đội chuyên trách jak ba bhp bani, dalam tukvak Tết daong harei ngak, daong dom urang daok sa drei, baoh sang sarak karja”

Oh lac tok hu urang jakar, urang lin pak Đồn Biên phòng Tà Pét, bo 14 đồn biên phòng karei dalam tỉnh Bình Phước daok rah angaok 260km jalan tapen negar jaik taphia haong Campuchia tuk halei jeng paglaong hatai sangka, caga mesruh  pacang kol tội phạm pagam pambak tame harei Tết di bangsa piah nao tame biên giới. Đại tá Nguyễn Văn Liên – Chỉ huy trưởng Bộ đội Biên phòng tỉnh Bình Phước lac:

“ Kasa peih ngak samar bruk khik caga labik tapen negar. Duah thau cambaih bruk ngak di địch saong dom đối tượng karei dalam tuk  Tết. Kadua nan brei hu ginup pandap panda ka bộ đội. Ka klau peih ngak ralo bruk ilamo daoh tamia, thể dục thể thao ngak jeng mblang ma-in khang kadang ka urang jakar urang lin. Ka pak, dalam tuk Tết langiu di bruk trực, khaol dahlak daok brei bruk ka dom urang dalam Bộ chỉ huy nao u mbaok tuk giao thừa pak dom đồn biên phòng”

Jalan tuần tra gam haong ralo glaih glar, min urang lin biên phòng jeng "takai khang patau liman" harei melam yam nao, sambo ao hijao jeng daok pasang hadah jalan tapen negar. Thun bahrau ini, yaom lac di labik biên giới atah bayah min harei Tết di dom urang lin jeng hu ginup abih rilo, limek, dưa hành, bánh chưng, pei nung saong praong di abih nan lac tình đồng đội, tình quân dân khang kajap. Nan jeng lac pren khang piah ka dom sa-ai harei melam kajap tangin phao, khik iek biên cương di Palei negar, daong ngak ka taneh aia chreih chai bui samai uan raok thun bahrau./.