Urang lin di Bộ Tư lệnh khik caga kalan Chủ tịch Hồ Chí Minh peih ngak adat tual dok

Salam uan 76 thun Harei negar 2/9, adat tual dok taneh ia hu peih ngak di mblang bein Ba Đình (Hà Nội). 5tuk50 minit mesup ini, 37 urang lin di Bộ Tư lệnh khik caga kalan Chủ tịch Hồ Chí Minh peih ngak adat tual dok. Ba akaok lac Quân kỳ quyết thắng, hadei di nan lac 34 urang lin yau ye rup binguk di 34 urang lin camereip abih di Kapul Việt Nam tuyên truyền giải phóng quân, angan ieu camereip di Bol bala bhap bini Việt Nam. Hatai sahneng ka bruk peih ngak adat di mblang bein hu Rajaei brei adat di harei 19/5/2001, di tuk pahadar 111 thun harei menek Chủ tịch Hồ Chí Minh. Thun 2021 lac thun ka 20 adat ini hu peih ngak. Mon 6h, tuk Quốc ca dane tagok, urang lin ba hala dok di taneh ia tabiak saong dui tagok gheng dok glaong 29 m. Yaok thun, di mesup harei 2/9, rahra dang tapak anak kalan Wa piah pamaong tame hala dok taneh ia. Thun ini, kayua jit praong, Mblang bein Ba Đình joa lange jang tuk karei. Hala dok bhong meriah patuk kanyik katam par par di mblang bein Ba Đình mbiah tal abih harei 2/9.

Ban raya HCM hu daong ka yaok xã, phường, ban sit 50 triệu đồng; yaok ấp khu phố 5 triệu đồng saong yaok urang jalar, công chức, oh chuyên trách di xã, ban sit 1 triệu đồng/ sa urang dalam tuk uan harei negar 2/9, piah pachreh ba kapul urang jakar paglaong bruk ngak di drei dalam pacang caga jit COVID-19. Ini lac bruk pachreih ba samar drah, hu makna piah daong ka dom urang jakar pgalong bruk ngak di drei, khik sambo hijao, iek glang, sangka tal raidiuk di bhap bini pamaong tal jayah jit praong COVID-19.

Harei 2/9 thun ini, tong abih pakat Đảng tỉnh Bến Tre hu 448 urang đảng hadah mbaok meta hu taduan Huy hiệu Đảng. Dalam nan hu 16 urang taduan hu Huy hiệu 60 thun Đảng, 10 urang taduan hu Huy hiệu 65 thun Đảng, 2 urang taduan hu Huy hiệu 70 thun Đảng, 1 urang taduan hu Huy hiệu 75 thun Đảng. Bruk alin brei Huy hiệu Đảng hu dom cơ sở Đảng peih ngak njauk adat, khik salamat bruk pacang caga jit ruak; piah mboh piah thau bruk rik daong oh padeih di dom urang đảng umo praong taha ngan saong puk paga, palei, negar.

Anak bruk jit ruak meda tamuh khang viek, abih di nyu nan lac dalam tuk padieh harei Negar 4 harei (meng harei 2/9 tal harei 5/9/2021), tỉnh Ninh Thuận ieu kakei bhap bini takik tabiak jalan. Dom cửa hàng, labik pablei salih njauk karieh pambang meng maong 7 melam harei dahlau tal maong 4 dah page harei hadei (langiu di dom labik pablei xăng manjek, jru tavao; dom bruk cấp cứu, kapul ngak bruk pacang caga jit ruak..). Công an tỉnh hu peih bruk pasang iek luac harei melam di dom jalan. Di Bình Thuận, UBND tỉnh ieu kakei dom sở ngành, bhum palei oh brei pataom rilo manuac, taom gaok gauk di dom urang brei daok karei dalam labik brei daok karei pataom gauk di dalam tỉnh.

Taduan bruk jao brei di Ban Bí thư Trung ương Đoàn, Ban Thường vụ Tỉnh đoàn Bình Dương, Ban Thường vụ Đoàn dom Jabat karja, Doanh nghiệp tỉnh Bình Dương birau mai rivang saong alin Huy hiệu Dam dara dũng cảm di Trung ương Đoàn ka sa-ai Dương Nguyễn Thùy Trinh. Dahlau di nan, sa-ai Thùy Trinh daok metian anek, lac muk mbuai di Sang iek ruak Đa khoa tỉnh. Dalam tuk ngak bruk, sa-ai Trinh njom virus SARS-CoV-2. Sa-ai plang lahik di harei 16/8. Bruk alin brei Huy hiệu Dam dara dũng cảm piak brei mboh bruk rik daong, var klak rup drei di sa-ai Dương Nguyễn Thùy Trinh dalam bruk pacang caga jit Cobid-19 di tỉnh Binh Duong.

Gah Y tế dunya (WHO) brei peih pakak Pasak brei thau dahlau ka jit praong di ban ine Berlin, Đức, hu mbaok di Thủ tướng Đức, amuk Angela Merkel. Tui danak dak samar drah di WHO, bruk padang pasak brei thau samar drah lac piah patagok bruk pabak khau tin samar, drah, tantu, cambaih laih ka dom jit praong saong jit ruak, jeng yau bruk mbuan rah tabiak jit praong piah ka dom rajaei meda ngak samar drah, hu siam lagaih meng tuk camereip. Rajaei Đức hu pabak 35 triệu USD piah daong ka pasak ini.

Rajaei Japon hu padang jabat kỹ thuật số piah jhul samar số hóa dom bruk ngak di karja palei haong trung ương hadei di tuk jit praong Covid-19 brei mboh bruk njauk salih bahrau. Dalam 600 urang di jabat, labaih 30% tabiak meng tư nhân, daok veik lac dom urang jakar meng Mintri ngak kong, brei thau saong dom urang daong bruk, menuac ngak dalam jabat dom mintri. Taphia bruk jhul patagok số hóa saong hatai caong lac tapa nan meda ngak ka rilo dịch vụ hu mbuan lagaih jang tuk pandar, jabat ini jeng hu bruk khik caga quyền riêng tư, kayua bruk số hóa nyu patagok bruk brei thau nao mai thông tin cá nhân.

Hãng kapar haoh Qatar Airways hu peih mbang par camriep tal mblang kapal haoh Hamid Kazai di ban ine Kabul, Ápganixtan, hadei di tuk Taliban pasang iek abih mblang kapar haoh ni. Mbang kapar ba tui 1 kapul kỹ thuật mai daong ka Ápganixtan ngak pasiam viek dom sruh kapar haoh dân sự khut, saong daong kỹ thuật piah ka mblang kapar haoh meda ba tame ngak veik yau dahlau. Tui urang jakar Cata, kapul kỹ thuật par mai tui panuac caong di Taliban, dalam tuk dom bruk ginum biai di 2 gah ka bruk ini jeng daok peih tabiak./.

Urang lang: Thu Thao – Ai Nghiem – 02/09 10:15:48