-Mai ravang xã N’Thol Hạ, huyện Đức Trọng, tỉnh Lâm Đồng dalam harei akaok thun barau, kol dahlak biak tatuak drei anak bruk salih barau di sa bhum palei hu rilo bhapbini lac urang bangsa K’ho ini. Sang danaok hu padang ngak praong, siam, hacih saat, điện, jalan, sang bac, balai iek ruak hu padang ngak barau, jalan nao mai dalam palei hu tuh bê tông samu jangaih… brei mboh raidiuk di bhapbini hu trei sir saong ginup meda.

  -Taduan raok kol dahlak dalam baoh sang praong saong hu ginup pandap panda, saai  Ka Thiều, sa urang bangsa K’ho, daok di palei Yang Ly, xã N’Thol Hạ, huyện Đức Trọng brei thau, 5 thun dahlau sang drei daok dalam angan sang kathaot. Meng paok jien mesraiy di gilang pariak sarak karja, lingiu di bruk buh jien tame pala veik 1,5ha cà phê taha, sang daok khang hatai salih taneh pala padai sa vụ tapa pala  dâu raong tằm saong njam hijao dom janih, taphia nan tari tarieng bac megru saong pandar alamu barau tame pala drak yau nan ye bruk ngak mbang kinh tế dak harei dak tagok. Urak ini sang oh lac tabiak truh kathaot bo daok yam tagok jeng sang hu jien mek tame rilo. Tui saai Ka Thiều, ngak mbang hu yau harei ini, lac meng thau salih bahrau jalan sahaneng, jalan ngak:         

 “Bruk ngak mbang ngak huak di mikva pak ini patagok jang dahlau biak rilo. Urak ini mikva jeng salih ngak padai sa vụ tapa pala njam dom janih, pala dâu raong tằm. Pala dâu raong tằm daok patagok rilo, rilo sang hu tabiak truh kathaot saong ngak meda meng bruk ini. Dahau diah sang drei jeng lac sang kathaot, hadei di tuk hu karja sangka daong, brei mesraiy jien di gilang pariak sarak karja piah sang salih phun pala, meng nan sang hu tabiak truh kathaot blaoh raidiuk dak harek dak nao tagok.”

Meng labik lac pala padai saong cà phê urak ini rilo bhapbini di xã N’Thol Hạ khang hatai ba dom janih phun pala hu yaom kinh te glaong tame ngak. Tui nan, dalam xã urak ini hu 100ha dâu raong tằm, jaik 1.200ha njam, labaih 60ha bingu, 65 ha phun mbang baoh…dalam nan hu jaik 400ha taneh ngak nong tui jalan công nghệ glaong ngan saong 36ha pala dalam sang camin –sang lưới, 340ha pandar hệ thống pruh ia tự động lingiu lingik. Meng nan, yaom pala drak kuhria angaok yaok hecta di xã N’Thol Hạ hu 153 triệu đồng/sa thun, jien mek tame kuhria tui akaok menuac hu 47 triệu đồng/sa thun. Meyah 10 thun dahlau, xã N’Thol Hạ hu tal 62% sang kathaot ye urak ini sang kathaot tok daok 2,8%.

 Maong mboh bruk salih barau biak siam, bruk ngak mbang kinh te oh padheih patagok di mikva dalam palei, taha palei K’Breo, daok di palei Đoàn Kết, xã N’Thol Hạ bui sambai brei thau, hatai sahneng pagam pambak tame bruk daong di urang karei meng dom rai ini mai hu tabiak truh yaok baoh sang, baoh ging. Sang halei jeng thau sahaneng barau, kham merat ngak mbang, kham merat yam tagok piah dak padang raidiuk ginup meda, văn minh. Bruk ngak hu ini meng hu bruk sangka di Đảng saong karja đầu tư di rilo gah, abih di nyu nan lac patagok bruk tacei pato jalan ngak mbang, pachreih bhapbini pataom tame ngak siam bruk padang ngak palei pala barau, daong gauk patagok kinh tế sang, dak padang raidiuk barau di libik daok…hu ba jalan patagok siam bruk jum pataom bangsa, ba gauk dak padang palei buôn patagok:         

  “Lingiu di bruk sangka di Đảng saong karja đầu tư brei yaok janih, hatai sahneng pagam pambak tame bruk daong di urang karei dalam mikva urak ini oh daok. Urak ini mikva thau pala dâu raong tằm, tari tarieng ngak mbang, kinh tế hu patagok siam jang. Drei lac taha palei mboh yau ini biak uan tabuan, tuk halei jeng jak ba mikva lac kham merat ngak mbang, oh pagam pambak tame bruk daong di urang karei, nan lac eng drei ngak mbang piah raidiuk dak harei dak ginup meda tagok.

-Oh lac kinh tế patagok, dom bruk gah y tế, ilimo, pato megru di N’Thol Hạ jeng ngak hu biak siam saong lac xã hu pok brei angan palei pala barau meng thun 2016. Tui ông Lê Bá Dương, Phó akaok uy mban bhapbini xã N’Thol Hạ, bruk patagok ngak mbang pala dark, khik kajap labik pablei tabiak kaya nong, tani tanat saong paglaong jien mek tame khang kajap ka bhabini tuk halei jeng lac bruk bo karja puk palei pamaong tal. Kayua yau nan ye, lingiu di bruk jak ba bhapbini kham merat patagok pala drak, palaong chất lượng saong yaom dom janih kaya nong, bruk duah labik pambuak bruk piah ngak mbang pala drak saong pablei pandap ka bhapbini tuk halei jeng hu xã sangka dahlau.

     “Tukvak tapa, kol dahlak hu patagok jak ba mikva salih hamu padai sa vụ atau dom beir cà phê taha tapa pala njam, bingu, pala dâu raong tằm ye mboh hu kein laba. Anak tal, kol dahlak kham merat ngak siam bruk ini piah ngak habal paglaong jien mek tame kuhria tui akaok menuac dak harei dak glaong. Bruk ngak anak tal di xã lac ngak habal ka mikva pala njam, bingu tui jalan ngak nong công nghệ cao lac pambuak bruk saong HTX atau dom  công ty piah ngak habal hu jalan pablei tabiak pandap ini”

Lac sa xã kan kandah, hu rilo bhapbino bangsa takik di huyện Đúc Trọng, min meng bruk saalih bahrau jalan sahaneng, jalan ngak,  N’Thol Hạ oh lac tabiak truh kan kathaot bo daok yam tagok dak padang radiuk ginup meda saong trei sir./.