Dahlau diah, bhap bani Mông pak Yên Bái bhian mbang Tết karei di bangsa drei di puac bilan 12 saka aia harei, hadei di tuk tamat bilan pala drak. Tết dui atah dalam sa bilan, biak praong, meng sang ini tapa sang diah, taong abih bruk ngak mbang, pala drak, bac da-a, ngak bruk jeng padeih abih. Hadei meng Tết bloh lac bruk eik lipa dui atah grauk abih dom palei urang Mông… Meng tuk peih ngak jalan ba di Tỉnh ủy Yên Bái ka bruk jak ba bhap bani Mông mbang sa Tết Nguyên đán haong gauk piah khik kajap bruk bac da-a di anek saih saong mbuan lagaih ka bruk pala drak, patagok bruk gul pataom bangsa; bhap bani Mông di Yên Bái hu mbang sa Tết haong gauk. Ralo adat cambat klak oh daok lagaih hu mikva klaak nao, bruk ngak mbang pala drak hu iek prong, rai diuk meng nan hu salih bahrau jang dahlau biak ralo. Trei sil daok mai tal yaok puk palei labik ini.

Ong Giàng A Phông, Bí thư Đảng ủy xã Bản Mù, huyện Trạm Tấu brei thau, akaok mereip, bruk jak ba mikva mbang sa Tết haong gauk di Bản Mù gaok biak ralo kan kandah. Urang dang akaok huyện Trạm Tấu tuk nan njauk trun hu mbaok tapak tame nyaom biai dom palei di Bản Mù piah thau ka hatai saneng, hatai caong  di bhap saong puac di abih jeng jak ba hu mikva. Tal urak ini, taong abih dom baoh sang bhap bani Mông dalam huyện thau hu dom kadha siam mekre ngan haong rai diuk di drei dalam bruk mbang sa Tết haong gauk.

Palei Khấu Ly, xã Bản Mù, huyện Trạm Tấu, hu labaih 500 urang. Meng tuk ngak tui dom jalan ngak bahrau, rai diuk di mikva urang bangsa Mông labik ini yau yam tapa sa blah bahrau. Saa Giàng A Vàng, Akaok palei Khấu Ly brei thau, sa-ai saong jaik 100 baoh sang dalam palei urak ini jeng thau hu bruk njauk pataom tame patagok kinh tế baoh sang, piah yam tagok patruh eik, patrun kathaot. Oh mbang Tết dui atah piah ngak vụ đông - xuân, ngak ralo padai jang, pala ralo tangeiy jang, patagok tapon athur, menuk ada. Gam haong nan, ba gauk dak padang rai diuk ilamo bahrau, klaak dom adat cambat tanarakun klak oh daok lagaih piah paglaong rai diuk baoh sang… Di Khấu Ly jeng daok ralo urang katahot, min meng tuk ngak tui jalan ba baharu di Đảng saong Karja, padai tangeiy dalam yaok baoh sang hu ralo jang, limo kubao dalam van jeng hu ralo jang. Rai diuk di urang Mông dalam palei Khấu Ly daok salih bahrau.

Di palei Suối Giao, xã Xà Hồ, rai diuk di urang Mông pak ini jeng tani tanat jang dahlau mai meng bruk salih jalan saneng, jalan ngak. Labaih 60 baoh sang urang Mông dalam palei hu brei bruk khik iek labaih 150 ha táo mèo; daong ka mikva di ini  hu pabak jien mek tame meng 10 - 20 triệu đồng sa thun. Ong Thào A Chểnh, akaok palei Suối Giao brei thau, rai diuk bahrau, abih menuac dalam palei thei jeng sambai, thei jeng kham merat ngak mbang nan ye oh daok huac eil lipa tra. Ralo sang dalam palei blei hu radaih patuh, ti vi. Ralo sang daok yam tagok piah tabiak truh kathaot saong ngak kaya meda.

Rai diuk di dom puk palei bhap bani Mông pak Yên Bái daok salih bahrau yaok harei. Piah patagok dom bruk ngak hu saong  ngak brei salih bahrau biak biai rai diuk di mikva, tỉnh Yên Bái daok brei jhul pakhang bruk dân vận, kham merat pathau kkhan piah ngak ka hatai saneng di mikva hu salih bahrau biak biai. Gam haong nan, tỉnh peih ngak siam dom chế độ, sarak ka urang kathaot bhum urang bangsa takik; pambak prong dom mô hình, dom kareih camin naih gheih dalam bruk ngak mbang pala drak; jhul pakhang dom danak dak patruh eik patrun kathaot tui jalan khang kajap.