Pathau mikva saong grauk yut! Dom jalan bê tông hacih saat pambuak pagam dom mblang hamu haong puk palei ginup meda, dom baoh sang praong siam daok mblo tabiak dalam dom bein cà phê, amraik kalu, phun mbang baoh srai baoh…lac bruk daok hu mboh di xã  Hòa Xuân, ban sit Buôn Ma Thuột, tỉnh Đắk Lắk hadei 2 di thun ngak blaoh bruk padang ngak palei pala barau. Oh lac ia mbaok,  jak jeng di danakdak padang ngak palei pala barau di Hòa Xuân daok brei mboh tapa bruk bhapbini khang hatai jang dalam jalan ngak, jalan sahaneng…Kadha vak “ salih barau di bhum mek hu chuẩn palei pala barau” di Nam Trang, urang vak di rayo sap ndom VN daok di bhum Tây Nguyên hu ndom ka bruk ini, daa mikva saong taong baih gauk tui pang:

-Ông Phạm Mạnh Hùng daok di palei 1, xã Hòa Xuân ndom lac, palei pala barau nyu ngak brei salih bahrau raidiuk jeng ye jalan sahneng, jalan ngak di bhapbini. Meyah dahlau diah, pak Hòa Xuân meda lac tok hu phun cà phê, padai ia saong raong glang sit sot, ye urak ini mboh hu rilo gia trại, trang trại praong. Yau ye sang ông Hùng, dua héc ta pala cà phê saong amraik kalu, urak ini hu jeng trang trại tổng hợp, pala pablak durian, bơ, raong ikan, raong cim yến. Meng bruk pala, raong rilo janih yau urak ini, ông Hùng biak sahanang hatai ka jien mek tame di sang drei :“Dom thun ini, yaom cà phê, amraik kalu nyu bair,  nan ye sang dahlak salih tapa pala pablak phun bơ, durian, phun amraik kalu saong phun caphe piah hadei ini meyah caphe haong amriak kalu pala oh njauk ye drei daok baoh phun karei patui nan piah diukrai. Dua thun jaik ini, yaok bilan jeng hu 6, 7 triệu đồng ka yaok akaok menuac. Bruk palei pala barau lac raidiuk bhapbini hu glaong biak rilo, meyah oh hu danakdak ini lac raidiuk bhapbini ngak habar hu yau urak ini. Tal urak ini lac jak jeng biak praong di danakdak padang ngak palei pala barau.

-Gam saong bruk salih jalan patagok kinh te, pandar alamu tame ngak mbang pala drak, bhapbini xã Hòa Xuân daok drak samal dalam bruk duah bruk ngak dalam tuk lahaiy bruk ngak nong piah paglaong jien mek tame.

-Yau ye saai H’Don Ktul, buôn Drai Hling, lingiu 4 sào hamu, 7 sào apuh, daok bac hu bruk ngak jarum châm cứu, pasang saai ngak ka sa doanh nghiệp xây dựng. Saai H’Don brei thau, meng dom bruk ngak phụ ini, yaok bilan sang saai duah hu jaik 10 triệu đồng:“Kol dahlak bac megru bruk ngak jarum châm cứu, camereip oh thau ngak, min blaoh jeng ngak hu. Dahlak ngak di tuk padeih jala pandiak, ngak melam tuk nao hamu nao apuh mai. Bruk ini jeng biak lagaih, oh abih rilo pren yava. Raidiuk urak ini caong khin hu kaya meda yau urang oh lac mbuan min jeng hu tani tanat rilo paje.”

-Meda mboh lac, hadei di jaik dua thun mek hu chuẩn palei pala barau, ia mbaok di xã Hòa Xuân hu rilo salih barau, raidiuk bhapbini hu paglaong tapa yaok harei. Urak ini, sản lượng padai brah di xã mek hu labaih 12.000 tấn, rilo jang 2 rabau tấn duk saong thun 2011; sản lượng cà phê rilo jang labaih 5 tạ/ha; abih tih tapon kubao, limo, menuk ada rilo jang dua mbang duk saong thun 2011,sang kathaot daok ala 4%. Ông Y No Knul, phó buôn Drai Hling brei thau, dom salih barau nan mai meng danakdak padang ngak palei pala barau: “Bruk padang ngak palei pala barau ba mai bruk salih barau, bui sambai ka palei pala. Mikva thau pala pablak dom janih phun yau bơ, durian, amraik kalu…dalam bein cà phê piah paglaong jien mek tame. Duk saong dom thun dahlau diah hu bruk salih barau biak praong, mikva thau sahaneng oh brei alah ngak, njauk tari tarieng ngak mbang piah hu jien mek tame kuhria ka sang.

-Tui ông Nguyễn Đức Thuận, akaok ủy ban bhapbini xã Hòa Xuân, piah khik kajap angan xã chuẩn palei pala barau, pakat ủy, karja saong bhapbini xã Hòa Xuân tuk halei jeng thau cambaih bruk padang ngak palei pala barau lac bruk ngak hamiet, gam gam saong suai livik, kayua danakdak ba mai nan lac paglaong raidiuk mbang ngui, daok dang ka  bhapbini palei pala:“aglaong jien mek tame lac sa dalam dom tiêu chí hadei ini njauk dang akaok. Tuk hu paglaong bloh meng patagok hu  abih dom tiêu chí karei. Njauk pamaong tal 43 triệu blaoh 53 triệu saong meda glaong jang”

-Raidiuk trei sir daok mai tal gam saong bruk dak harei dak hu rilo dom mô hình kinh tế khang kajap di xã Hòa Xuân lac brei mboh ka kein laba bo dandak padang ngak palei pala barau ba mai./.