Tây Nguyên bahrau abih pandiak bhang khang. Dom mbang hajan akaok bilan daok ba mai prenm yava bahrau ka bhum biên giới. Dom bein cao su daok tabiak hala hijao. Công nhân cao su di dom đội sản xuất, bhap bini dalam dom puk palei di xã biên giới Sa Loong, huyện Ngọc Hồi, tỉnh Kon Tum daok yam tame bilan kuah katak. Tuh dom panyin katak tame thùng, sa-ai A Huê, urang palei Giang Lố 1, xã Sa Loong, chreih chrai brei thau, gam saong Binh đoàn 15 ngak  cao su, mikva hu tabiak truh eik lipa kathaot rambah, hu labaih jien padai:

“Công ty 732 (Binh đoàn 15) hu daong mikva drei biak rilo. Mikva drei hu bruk hit ngak mbang, hu raidiuk siam mekre jang. Mikva chreih chrai lô, kham merat ngak mbang piah patagok jang”

          Xã Sa Loong (huyện Ngọc Hồi, tỉnh Kon Tum) hu 6 puk palei ye taong abih 6 puk palei nan jeng hu menuac ngak công nhân cao su haong Binh đoàn 15. Dalam nan hu 2 đội sản xuất hu taong abih menuac lac urang dalam palei. Taha A Sem, palei Giang Lố 2, xã Sa Loong brei thau, gam saong Binh đoàn 15 ngak cao su, Binh đoàn oh lac bayar jien bilan, tacei pato ilamu piah mikva ngak padai ia, bo daok hu daong ka puk palei rilo bruk praong, sit karei karei, ngak brei salih bharau raidiuk. Bahrau ini, tuk tame bilan hajan, Bộ đội Công ty 732, Binh đoàn 15 hu daong ka mikva ngak jalan bê tông atah labaih 3km tabiak labik pala drak, daong palagaih ka mikva nao mai. Taha A Sem lac:

           “Dahlau deih, jalan ini nao mai kan kandah. Công ty 732 mboh mikva glaih glar lô, hu urang labuh, hu urang njauk rambuas. Urak ini, Công ty sangka  tal mikva, blei pandap piah mikva ngak jalan ini, mikva uan tabuan lô, taha thau dhar phor lô”.

Rah tui biên giới Bắc Tây Nguyên, công nhân cao su di dom đội sản xuất, bhap bini dom puk palei dalam xã Ia Dom, huyện Đức Cơ, tỉnh Gia Lai jeng daok yam tame bilan kuah katak bahrau. Dalam mblang bein bak panyin katak daok hu ngak hacih, dom mbaik to kuah haluak daok hu ba tabiak radaih,  ông Siu Thêm, daok di palei Mok Đen, xã Ia Dom, brei thau, Binh đoàn 15 saong phun cao su hu ba mai dom salih bharau khang ka mikva puk palei:

          “Tame ngak cao su haong Công ty 72 (Binh đoàn 15) nan ye palei drei urak ini salih bahrau biak rilo. Hu jien padai, oh daok huac eik lipa. Rilo sang padang bharau, praong siam. Drei ndua dhar phor Đảng, Karja saong dom đơn vị quân đội hu sangka, daong ka mikva palei drei”.

          Dalam xã Ia Dom urak ini hu 6 đội sản xuất di Công ty 72, Binh đoàn 15, pambuak saong nan hu 6 palei urang bangsa takik tame ngak công nhân cao su. Meng kein laba di cao su ba mai, dom puk palei hu phun jien piah  pala amriak kalu, phun cà phê, ngak ka bhum biên giới Ia Dom hadah hadai. Dom jalan menyek pambuak dom puk palei, dom baoh sang praong siam daok tamuh tagok. Taha Siu Lim, palei Bi, xã Ia Dom, lac:

        “Meng tuk hu bộ đội mai ini, jak ba, tacei pato anek kamuan dalam palei nao ngak công nhân cao su, raidiuk bhap bini palei drei hu tagok. Urak ini mikva oh daok huac eik lipa. Taha uan tabuan lô”

          Puac thun 2015, xã Ia Dom hu Ub bhap bini tỉnh Gia Lai brei panuac lac mek hu chuẩn palei pala bahrau. Ini lac xã biên giới camereip abih di tỉnh Gia Lai saong di Tây Nguyên mek hu angan nan. Jien mek tame kuhrai tui akaok menuac di xã meng 7triệu đồng thun 2011 tagok labaih 23 triệu đồng thun 2015; jeng dalam 5 thun, sang kan kathaot yaok thun trun daok takik, meng  18% trun daok 6%. Ong Nguyễn Hữu Thiện, Chủ tịch UB bhap bini xã Ia Dom, huyện Đức Cơ, tỉnh Gia Lai brei thau, ini bahrau lac bruk ngak hu di tuk camereip, xã njauk pamaong tal dom bruk praong jang:

“Karja palei thau lac, njauk jak ba mikva salih bahrau jalan sahneng, jalan ngak, piah patagok kinh tế khang jang, piah salih bharau raidiuk bhap bini bhum biên giới ini”./.