Pathau mikva saong taong abih gauk! Tui bruk salih 1.200 ha padai tapa pala phun angaok thu, bilan Đông – Xuân 2016, hu 3 janih phun pala praong hu urang nông tỉnh Ninh Thuận ba tame pala nan lac tangei, ratak naih saong hareik brei athur raong mbang, dalam nan, phun ratak naih hu pala rilo di abih saong daok ba mai kein laba glaong dalam tuk  pandiak bhang yau urak ini. Kadha vak di urang pambuak bruk Văn Cảnh – Hữu Tầm brei thau ka bruk ini. Daa mikva saong taong abih gauk tui pang:

Daok dalam bhum hu mbang tui ia di danao Phước trung, min mboh ngak padai oh ba mai kein laba dalamtuk pandiak bhang, bilan Đông –Xuân 2016, saai Cao Vắc daok di palei Mĩ Hiệp, xã Mĩ Sơn, huyện Ninh Sơn hu salih 3 sào padai tapa pala ratak naih tui jalan thâm canh. Tapa nan, sang saai Vắc mek hu labaih 3 tạ asal ratak naih, urak ini sang saai daok paik ratak mbang ka 2, tui kuhria mek hu 60 kg sa sào. Meng yaom pablei 23.000 tal 25.000 đồng sa kg tui janih, 3 sào ratak naih hu ba jien tame ka saai Vắc jaik 10 triệu đồng. Saai Cao Vắc brei thau:

“Thun ini kayua kurang ia, vụ ini sa sào hu sa tạ meteh ratak naih, meyah ginup ia ye hu 2 tạ sa sào, ngak padai sa tấn jeng lah 2 tạ ratak”.

Di xã Nhị Hà, huyện Thuận Nam, bruk salih labaih 40 ha taneh ngak padai tapa pala ratak naih dalam vụ đông – xuân hu ba jien tame biak ralo ka urang nông. Ini lac mbang akaok meti peih bruk salih tapa pala ratak naih nan ye mikva daok pala tui jalan quảng canh, oh ka sangka tal pandar ilamu kỹ thuật, min năng suất jeng hu labaih 1 tạ sa sào. Amuk Võ Như Sơn, akaok UB bhap bini xã Nhị Hà – huyện Thuận Nam-tỉnh Ninh Thuận brei thau:

 “Tal tukvak ini bhum salih janih phun pala năng suất jeng oh ka glaong min langyah hu bruk kinh tế dalam tukvak pandiak bhang. Jeng caong khin hadei ini dơn vị jeng daong puk palei gah ilamu piah mikva iek glang, pala phun ratak naih ba mai kein laba glaong,  peih praong bruk pala ratak naih di angaok taneh ngak padai”.

Siam lagaih tuk camereip di bruk salih taneh ngak padai tapa pala ratak naih di dom puk palei brei mboh: ini lac janih phun pala diuk hu dalam pandiak bhang saong mbuan iek glang. Meyah pandar ilamu kỹ thuật, phun ratak naih meda mek hu năng suất 2,8 tạ sa sào. Taphia di nan ratak naih hu labik pablei tani tanat. Kayua yau nan ye, bruk salih taneh ngak padai tapa pala ratak naih dalam vụ đông – xuân hu maong lac lagaih haong lingik tasik, lagaih haong drak pasar. Ong Trần Quốc Nam, Phó akaok UB bhap bini tỉnh Ninh Thuận brei thau:

 “Ini lac vụ akaok meti mikva urang nông salih janih phun pala tui jalan pala phun diuk hu dalam pandiak bhang, patak pataom ia saong tuk camereip ba mai akaok saneng glaong di bhap bini. Meng kein laba tuk camereip yau ini, dalam dom vụ hadei kol dahlak pataom tame tacei pato mikva pachreih tui saong salih janih phun pala angaok thu, kein laba, năng suất hadei ini meda hu glaong jang”.

Pandiak bhang jeng daok rah tabiak khang dalam vụ hè – thu, kayua yau nan ye, dom puk palei dalam tỉnh Ninh Thuận daok kuhria pabak ia pruh ngan saong yaok bhum saong taneh ka yaok janih phun pala piah patrun patakik bruk klak taneh saoh./.