Sang ông Đổng Văn Bóng – sang urang Cam hadah trah di tỉnh Ninh Thuan

 Panuc pandit lac “diuk pasangnjauk gauk thaic ia tasik jeng thu” yau mbang tame dalam glo akaok, dalam raidiuk di rilo sang urang Viet Nam, dalam nan hu urang Cam. Sang ông Đổng Văn Bóng daok di palei Hoài Trung, xa Phước Thái, huyen Ninh Phước, tinh Ninh Thuan jeng yau nan. Meng dua plak tangin saoh, min diuk pasang njauk hatai gauk, urak ini raidiuk sang ông jeng ginup , meda, dom urang anek hu jeng. Thúy Linh – urang vak di rayo sap ndom Viet Nam daok di ban raya Ho Chi Minh hu kadha vak ndom ka sang ông, daa mikva saong grauk yut tui pang:

Nao ravang sang ông Đổng Văn Bóng dalam dom harei puac di bilan 6 jeng lac tukvak padheih hè, yau nan ye anek, taco di ông hu pataom mai ravang ông, amuk. Anak bruk mein bui sambai, chreih chrai di dom adei sit, kol dahlak maong mboh cambuai klao haniem phuan angaok mbaok meta di diuk pasang ông. Khan brei kol dahlak thau ka sang drei, ông Bóng lac: diuk pasang ông hu 8 urang anek, dalam nan hu 4 urang anek likei saong 4 urang anek kumei, urak ini dom urang anek praong abih saong hu libik dang dalam xa hoi. Thau ka bruk glaih glan, kan kandah di amaik ame kham merat raong anek nao bac tal labik tal dhua, yau nan ye dom urang anek di ông tuk halei jeng kham merat, anit ranam amaik ame saong dom urang dalam sang. Yau nan ye, var huak dalam sang tuk halei jeng bui sambai, anit ranam gauk. Ông Bóng brei thau: " Mboh anek thau anit ameik ame, adei saai gam kham merat bac gam kham merat daong amaik ame. pagap ye nao hamu, saai thau nao ala hamu piah ka adei nao di angaok an. Mboh anek thau anit amaik ame, yau nan ye drei biak anit anek" 

  Piah hu raidiuk ginup meda saong haniem phuan yau harei ini, takik thei hu thau diuk pasang ông Bóng hu labaih 20 thun kan kandah, glaih glan, patak pataom meng hu. Hadar veik dom harei camereip tuk bahrau padang mbang ngui, amuk Đàng Thị Sáng – diuk ông Bóng brei thau: raidiuk di bhum palei pala hamu puh ngak mbang tuk hu tuk oh, min diuk pasang ông njauk raong tal 8 urang anek. Yau nan ye, diuk pasang njauk parabha bruk ngak dalam sang. Ông Bóng ngak bruk hamu puh, pato pakai anek bhik, daok amuk Sáng – diuk di ông nao pablei khan ao di dom tỉnh ye: Lâm Đồng, Dak Lak..2 adit atau 1 bilan mai sang sa mbang. Thau kham merat ngak mbang, patak pataom, pandar cai njauk, thau pandar mo hinh” 1 njauk, 5 trun” dalam pala padai,  hu mbaoktame dự án tam nong…yau nan ye sang ông meng oh daok glaih glan, hu jien padai raong anek nao bac abih, jeng sa dalam dom sang ilimo hadah trah di puk palei. Amuk Sáng brei thau: " Drei caong khin anek bhik hu greih gauk gar, oh meda oh daok min blei hu sa baok akaok piah ka anek thong minh harei hadei ngak mbang, xay dung ka diuk ka anek, ka xa hoi" 

  Oh lac thau sahaneng ngak ka raidiuk di baoh sang hu ginup meda,, haniem phuan, sang ông Đổng Văn Bóng daok kham merat hu mbaok tame bruk di puk palei, yau ye: bruk dak padang sang, but pajaih pachreih bac; bruk but pajaih tự quản ka an ninh trat tu di puk palei, pato pakai anek taco oh ngak suan adat hukum; ngak siam bruk jak ba “ bhapbini jum gauk dak padang raidiuk ilimo di libik daok”, bruk padang ngak palei pala barau. Meng di nan, hu rik tame daong xa Phuoc Thai patagok bruk pachreih bac, ngak siam bruk dak apdang xa hoi bac megru, jeng libik bhong dalam bruk pachreih bac di tinh Ninh Thuan; taphia nan lac sa dalam dom puk palei akaok meti di tinh Ninh Thuan mek hu chuan ka padang ngak palei pala barau. Rilo thun hamiet, sang ông Bóng hu karja puk palei, kpul pachreh bac huyen Ninh Phuoc pok meyaom. Ông Lưu Văn Nhạc – phaok akoak uy mban bhabini xa Phuoc Thai brei thau: " sang ông Đổng Văn Bóng lac sang ilimo hadah trah dom thun tapa, dalam sang diuk pasang njauk hatai gauk, kham merat brei ka anek nao bac tal libik tal dua. Tal harei ini dom urang anek hu thanh tai hu pataom tame bruk xa hoi, karja puk palei dalam tinh. Lac sa sang njuak pok meyaom.

   Sa sang ilimo njauk lac sang drei sir, bình Đẳng, tiến bộ, haniem phuan. Sang lac tế bào di xa hoi, sang siam xa hoi meng siam. Bruk ini hu sang ông Đổng Văn Bóng sahaneng mboh biak glaong saong daok patagok siam. Urak ini, sang ông Đổng Văn Bóng saong amuk Đàng Thị Sáng daok hu rilo sang urang Cam dalam puk palei bac megru saong ngak tui./.