Sang plaih njaik ribuk rilo mục tiêu di phường Đông Hải, bal sit Phan Rang – Tháp Chàm

Lac sa dalam dom baoh sang hu panduan nao dalam mbang ribuk thun dahlau, amuk Nguyễn Thị Lu daok di khu phố 7, phường Đông Hải, ban sit Phan Rang – Tháp Chàm brei thau, sang amuk daok dalam angan kan kandah ka sang daok, diuk rai dalam baoh sang tauk tôn tạm bợ, oh hu siam mekre, mbuan jaleih tuk halei jeng oh thau. Piah plaih saong hu labik daok siam mekre, tuk rah tabiak bala meng langik tasik, ribuk aia sua ye amuk hu karja palei ba tame sang plaih njaik ribuk rilo mục tiêu hu padang ngak di puk palei. Ini lac công trình hu padang ngak meng thun 2017 kayua Gilang pariak dunya WB daong jien ngak ka dom puk palei bhian njuak bala meng langik tasik. Công trình hu padang ngak khang kajao, hacih sa-at, laneng lanoi meda tame daok hu meng 100 tal 200 urang nan ye tuk plaih njaik ribuk aia sua pak ini amuk jang yau rilo urang karei dalam khu phố biak sahnang hatai. Amuk Nguyễn Thị Lu brei thau: Baoh sang dahlak pak ini daok oh grap tanat. Langik hajan ribuk ye nduac tame sang palaih njaik ribuk. Meng blaoh ribuk jeng bahrau tuh tame ini, jeng mboh siam mekre ka bhap bani. Rilo baoh sang kathaot rambah, tuk hu ribuk ye urang nduac tame ini dahlau.

Lac palei bhum tasik, phường Đông Hải, bal sit Phan Rang – Tháp Chàm bhian gaok bala meng langik tasik, abih di nyu lac gaok kan kandah meng dom mbang ribuk. Tal urak ini, meng phun jien di Gilang pariak dunya WB, phường Đông Hải hu padang ngak 2 công trình plaih njaik ribuk taduan hu meng 300 tal 400 urang, taong abih phun jien buh tame ngak lac 1,8 tỷ đồng. Mboh hu kien laba anak meta di dom công trình plaih njaik ribuk, bhap bani bhum tasik Đông Hải ba gauk nao tame piah plaih njaik tuk hu ribuk mai, khik siam mekre ka tính mạng saong drap ar. Ong Trần Trí Thức, akaok khu phố 11, phường Đông Hải, Tp Phan Trang, Tháp Chàm, tỉnh Ninh Thuận, lac: Khu phố 11 njuak cakak meng 2 baoh kraong, tuk aia ndik glaong sraiy tame ye oh nao mai hu, kan kandah nao mai dalam tuk hajan ribuk. Nan ye karja sangka brei ka mikva hu sang plaih njaik ribuk, khik siam tính mạng di bhap bani.

Xã Phước Thuận jeng lac sa dalam dom labik mbuan njauk aia dauk di huyện Ninh Phước, tỉnh Ninh Thuận kayua nyu daok di labik dhaong. Piah ka bhap bani hu labik plaih njaik ribuk siam mekre tuk hu ribuk mai, thun 2017, xã Phước Thuận hu Gilang pariak dunya WB daong brei padang ngakcông trình sang plaih ribuk praong jaik 402 m2, ngan haong phun jien labaih 4 tỷ đồng, daong ka bhap bani bhum ribuk hu labik plaih njaik ribuk siam mekre. Ong Nguyễn Tiến Hưng, urang daok di thôn Thuận Hòa, xã Phước Thuận, huyện Ninh Phước, Ninh Thuận, lac: Yaok mbang ribuk mai, tok thau tame daok pambak di sang mikva hu gác glaong atau labik glaong piah gam daok. Ndom yau nan min ngak samu sang plaih njaik ribuk piah ka mikva daok pataom gauk ka sahnang hatai jang.

Tal tukvak ini, dalam tỉnh Ninh Thuận hu 7 sang cộng đồng gam ngak sang bac saong 9 sang plaih njaik ribuk rilo mục tiêu di rilo puk palei bhian njuak bala meng langik tasik. Tukvak tapa, hadei di tuk ba tame pandar, dom công trình ini patagok hu siam mekre dalam bruk pacang, caga bala meng langik tasik, khik hu siam mekre ka rilo baoh sang dalam bilan hajan ribuk. Ong Lê Xuân Toàn – Phaok akaok Ban quản lý dom dự án pacang caga bala meng langik tasik daok brei thau lac:  Langiu di bruk buh jien tame padang ngak dom sang plaih njaik ribuk ini, gah daong brei jeng biak sangka tal bruk pathram, pathau khan ka pacang caga ribuk aia sua, bala meng langik tasik. Urak ini taong abih bruk pacang caga hu rah tabiak di dom puk palei bhian rah hu ribuk aia sua)     

Hadei di dua thun ba tame pandar, dom công trình ini njauk hu karja puk palei hu jalan khik ramik, ngak pasiam veik, patui veik sangka, pabak dom pandap panda cứu hộ saong pathau khan ka bhap bani paglaong akaok saneng ka bruk pacang plaih bala meng langik tasik./.

Urang lang: Jasi - 29/10