Tame daok dalam baoh sang birau, ông Trần Văn Cường daok di phường Thanh  Khê Tây, quận Thanh  Khê, Ban Đà Nẵng jeng oh ka jia lac drei hu yau nan. Ong Cường khan lac, dahlau diah, sang ong lac sang tauk tôn, mbleing mblang, raidiuk kan kandah. Harei harei, ong daong diuk pablei njam patam, baoh kayau saong ikan hadang di darak; jien duah hu tok ginup mbang tapa harei ka 5 urang dalam sang. Akaok thun ini, diuk pasang ong Cường hu ban Da Nang saong Gilang pariak Công Thương Việt Nam daong 50 triệu đồng, gam haong jien ong nyim pabak tame padang hu sang khang kajap:“ Dahlau diah, diuk pasang dahlak kan kandah ralo, lac sang kathaot, sang daok di labik dhaong hajan angin mai biak glaih glar. Hu Karja palei daong jien ngak sang danaok dahlak biak uan tabuan. Urak ini hu labik daok siam mekre, diuk pasang kham ngak mbang.”

Amuk Hà Thị Chỉ daok di phường Thanh Bình, quận Hải Châu, ban Da Nang, pasang plang lahik, taeng muk raong 6 urang nek sit. Raidiuk amuk kurang anak kurang likuk, oh khin sahaneng tal bruk ngak sang. Birau ini, amuk Chỉ hu UBMTTQ Việt Nam quận Hải Châu, ban Da Nang daong 60 triệu đồng piah padang sang birau. Amuk Hà Thị Chỉ brei thau: “Dahlak ini lac sang kathaot daok haong anek  taluac jaoh jo, hu karja saong dom kapol nyaom daong ka dahlak. Sang dahlak taik tahak, hajan oh hu labik ndih. Taong abih dom kapol nyaom daong ka dahlak hu 60 triệu đồng, dahlak ngak hu sang biak uan tabuan. Meng ini, dahlak hu sang daok birau,khang kajap, oh daok huac hajan hangin tra. Biak thau dhar phol karja, dom kapol nyaom.”

Tal urak  ini, ban Da Nang jak ba hu rilo đơn vị, urang ngak pahala rik daong 200 tỷ đồng brei Kadung jien ka urang kan kathaot. Meng yaom jien nan, UBMTTQVN ban Da Nang pambuak bruk saong karja palei padang ngak birau saong ramik pasiam veik labaih 10.000 baoh sang Jum pataom brei ka urang kan kathaot. Amuk Nguyễn Thị Kim Liên, Akok C.ty TNHH pablei salih tong hop Ân Điển, ban Đà Nẵng, tuk halei jeng nao gam haong danak dak padang ngak sang brei ka urang kan kathaot, brei thau C.ty hu daong labaih 1 tỷ đồng brei ka urang kan kathaot daok di ban Da Nang saong dom tỉnh Quảng Nam, Quảng Bình.

          Thun ini, jien daong padang ngak sang brei ka urang kan kathaot tagok glaong jang yaok thun. Meyah dahlau daih, daong 35 trieu đồng ka sa baoh sang ye urak ini tagok meng 50 tal 60 trieu dong. Langiu jien daong ngak sang, Mặt trận negar Việt Nam ban Đà Nẵng  daok hu daong phun jien ka sang kan kathaot piah ngak mbang pablei salih; alin brei jien bac ka anek saih kan kathaot kham merat yam tapa dom kan kandah bac da-a naih joi./.