Pathau mikva saong taong abih gauk!

Harei ini harei 6/6/2016, yaok rituh chức sắc urang Chăm Bà-ni daok di Ninh Thuận saong Bình Thuận yam tame sang megik ngak adat di bilan Ramưwan (bilan eik). Dahlau nan, di dom palei Chăm Bà-ni hu rah tabiak adat nao gul saong paling muk kei. Ramưwan hu jeng bruk taom gaok ka yaok urang chăm Bà-ni. Kadha vak “Taom gaok bilan Ramưwan” di Jasi – urang vak di rayo sap ndom VN daok di ban raya HCM hu daong ka kol drei thau bruk uan rok bilan Ramưwan di bhap bini Chăm Bà-ni tỉnh Bình Thuận:  

Saai Tôn Thất Định brei thau:

Sap Chăm 

Saai Định ndih tapui saong praong tagok di palei chăm Chăm xã Phan Hòa, huyện Bắc Bình, tỉnh Bình Thuận, min saai palih ruah ban raya HCM piah padang mbang ngui. Labaih 15 thun tapa, yaom lac thavi thavar haong bruk ngak mbang duah jien di ban raya min saai oh ka mbang halei klaak bilan Ramưwan. Kayua ini lac tuk brei mboh hatai thau dhar phor di drei ngan saong ong muk, ong kei.

Jeng hu hatai saneng yau saai Định, diuk pasang saai Bá Văn Minh - Lưu Thị Kim Tài daok ngak mbang di ban sit Buôn Ma Thuột, tỉnh Đắc lắc jeng ba dua anek sit mai palei rok Ramưwan. Saai Tài chreih chrai lac, kayua Ramưwan thun ini rah tabiak njauk dom harei puac adit nan ye jeng lagaih jang ka bruk mai palei. Saai Tài brei thau:

Sap Chăm

Oh ta-eng hagait saai Tôn Thất Định saong saai Lưu Thị Kim Tài bo nan lac hatai saneng di yaok ribau urang chăm Bà-ni daok diuk rai saong ngak mbang atah palei tuk tame bilan Ramưwan. Oh thei kakei thei,  tal bilan Ramưwan, urang ba gauk mai labik menek di drei. Kayua yau nan ye, dalam dom harei tapa, di dom palei Chăm Bà –ni chreih chrai bui sambai uan rok Ramưwan. Dahlau di nan, adei saai urang kamei blei sap janih, ngak har meneing saong blei khan ao barau ka uranaih. Daok ngan saong dom chức sắc chăm bà –ni jeng biak thar var, urang kuhria caga kinh kệ, khan ao saong dom pandap ngak adat. Ong Imum Sa – chức sắc chăm daok di palei Bình Thắng, xã Phan Hòa, huyện Bắc Bình tỉnh Bình Thuận brei thau:

Sap Chăm

Meda lac, kadha praong di bilan Ramưwan lac adat nao gul. Adat nao gul di urang chăm bà –ni bhian peih ngak tui yaok buat pajaih, yaok palei. Harei nao gul, urang cuk khan ao bahrau, siam tuh mai labik taneh kabo, dom urang likei glam jaleing, tangin pan cadi ia; daok dom urang kamei, dom amuk ndua dom talam paneng, hala, talam har, baoh kayau….Di labik ini, mikva chăm pasiam veik dom kabo. Dom ong Acar (urang ngak adat) saong dom trợ tế di buat pajaih cuk khan ao meng kan daok la jeng talei tui dom kabo, bac kinh, daa ong muk mai saong anek taco dalam bilan Ramưwan. Ong Bá Văn Cảnh daok di palei Bình Hòa, xã Phan Hòa, huyện Bắc Bình, tỉnh Bình Thuận brei thau:

Sap Chăm

Tuk adat nao gul salah bloh, urang ba gauk mai sang piah caga pandap paling muk kei. Oh lac kaya meda atau kan kathaot, yaok baoh sang jeng hu talam salao lisei piah daa ong muk, ong kei. Dalam dom harei ini, di yaok palei chăm bà-ni bhian hu dom bruk me-in bui sambai yau: caoh mbanh, daoh tamia…oh lac dui pachrei dom urang dalam palei bo daok hu dom urang di dom palei jaik taphia mai pataom mbaok.

Tamat adat paling muk kei, mboh dom palei chăm bà –ni biak trang nghiêm. Taong abih dom urang chăm bà-ni njauk ngak adat tẩy thể, oh sát sinh… Likei, kamei cuk khan ao meng kan sambo mbong patih tame sang megik piah likau hu jap kro dalam luac bilan Ramưwan siam mekre. Di labik ini, hatai menuac yau hu tathuak tabiak, bruk tham, sân, si yau ralai lihik, salih tame nan lac bruk thau dhar phon saong iek praong. Tuk sap hagar di sang megik yava tagok, yau brei thau bilan eik tal mai saong urang hu sanya gauk taom gaok veik di bilan Ramưwan thun anak./.