Phó Thủ tướng rajaei Lê Văn Thành brei panuac di var ginum meyai

Phó Thủ tướng rajaei Lê Văn Thành bahrau mbaoh tangin brei tabiak sarak ka 27 harei 3/10/2021 di Thủ tướng rajaei ka pasiam veik bruk ngak di dom labik ngak cong dalam tuk vak pacang caga jit ruak COVID-19. Sarak tacei lac, jit COVID-19 tamuh tabiak ngak kan kandah tal bruk ngak mbang  pablei salih  di dom doanh nghiệp, pren yava, bruk metai lahik di bhap bini. Meng bruk ba tangin tame di tong abih gah chính trị, di dom doanh nghiệp song bhap bini, tal urak ni, jit ruak daok pasang iek hu saong daok hu jhul kadun likuh. Sarak hu batabiak 7 tacei pato di  Thủ tướng rajaei ngan song dom mintri, dom  gah, dom tỉnh ban  piah samar langyah talaik kan kandah ka dom doanh nghiệp tui jalan la ngak brei salamad, salamat piah ngak.

Urak ini, jit ruak di Bình Dương daok pasang iek hu saong dom doanh nghiệp daok peih ngak veik, min jeng biak huac lac mbuan tamuh veik jit ruak. Kayua yau nan yhe, doanh nghiệp caong khin Bình Dương brei klauk dahlau vaccine mbang klauk ka 2 ka urang ngak, gam haong nan brei pacadu bruk pa-atah di gauk, ba mbuan lagaih dalam bruk pajeng ba pandap, salih karei bruk “3 hijao” (lac sang mac hijao, nhà trọ hijao haong urang ngak hijao) ka doanh nghiệp pandar tui piah patrun jien kuhria bruk mbang huak, labik daok ka urang ngak...

Tui mban tacei jalan pacang caga  Covid-19 tỉnh An Giang, kuhria tal 12 tuk  harei  3/10, bhap bini rahra eng drei mai palei meng meng radaih di drei lac labaih  18.000 urang. Tapa  test samar Covid-19, hu  30 urang dương tính song  Covid-19. Ong Nguyễn Thanh Bình, Chủ tịch UBND tỉnh brei thau, bruk langyah ka rahra eng drei mai palei  pdok hu tỉnh peih ngak tui jalan daong abih drei, bak hatai anit ranam. Dalam tuk cang  piah dut iek song ba tal dom labik brei dok karei di dom puk palei, tỉnh An Giang hu ba rahra  tame labik  taduan raok di anak meta; oh caik ka bhap bini eik lipa…Urak ni, tỉnh An Giang dok samar padang dom  Tiểu ban taduan urang ngak bruk tự do, saong padang jalan peih bruk taduan raok ka nyu lagaih.

Quận Phú Nhuận hu jeng quận camereip abih di TP.HCM ngak hu salah bruk klauk vaccine caga COVID-19 mbang klauk ka 2 ka dom urang umo meng 18 thun tagok ngan saong 99%. Daok 1% daok veik oh ka tal harei klauk mbang ka 2 saong hu quận rami ramik brei klauk di sa labik dalam tukvak anak tal. Tui Pasak pasang iek ruak kik TP.HCM, urak ini ban Thủ Đức haong dom quận huyện karei daok klauk brei abih dom urang ka oh klauk mbang 1 saong klauk mbang 2 ka dom menuac ginup tukvak piah klauk.

Hu sa urang metai dalam mbang khauh di melam kabroi (3/10) di  2 boh sang ka  735 song 737 jalan Lũy Bán Bích, phường Phú Thọ Hòa, quận Tân Phú, TP.HCM.  Tui gah chức năng, pui mbang meng boh sang ka 735  pablei takhaok dep spong rilo janih pandap panda karei hu dung môi, hóa chất song aceton lac janih mbuan khauh. Cảnh sát pacang pandam khuah song dong duah Công an quận Tân Phú ba 10 radaih padam pui song 60 urang jakar, urang lin hu mbaok piah padam pui, daong menuac njauk bala. Mbiah tal  mon 10 meteh melam,  pui meng padam hu. Dalam dom urang patuah oh metai hu 2 urang njauk rambuac hajual. Pui khuah ngak ka rilo drap ar dalam 2 boh sang khuah ralai abih.

Dalam tuk menuac njom Covid-19 hu rilo di abih, meng 1.000 urang di bilan blaoh, tagok labaih 12.000 urang bahrau yaok harei, harei 3/10, labaih 5.000 menuac trun jalan di ban ine Bucharest di Romania piah tah klaak dom bruk brei takik ngak di karja meda hu ba tabiak ngak dalam dom harei tal piah pacang veik bruk njom mbak Covid-19. Bruk trun jalan ngak brei gar radaih di dom jalan praong dalam ban ine Bucharest. Urak ini, Romania bahrau klauk hu ka labaih 33% dom menuac praong thun saong taneh ia ini daok jeng taneh ia hu menuac klauk vaccine biar abih dalam dom taneh ia di EU, patui di nan lac Bulgaria.

        Hãng kapan haoh  Air New Zealand harei kabroi khan lac, Urang hu panuac ieu tuai angaok dom mbang par dunya di hãng brei klauk ginip vắc-xin Covid-19. Ni hu mong lac sa dalam dom sarak  hàng không catang  abih di dunya caik ka tuai du lịch.

Gah Taliban di Afghanixtan harei kabroi khan lac, sa mbang taong mbom tame sa baoh sang megik Islam di ban ine Kabul ngak brei rilo menuac metai saong bruk ini hu maong lac bruk khủng bố trak damak abih di Kabul kuhria meng di tuk dom taneh ia phương Tây ba lin tabiak abih. Urak ini oh ka hu gah halei taduan lac drei dang tabiak ngak bruk nan, min mboh lac bruk ini meda kayua kol IS hu dhar daok di Afghanixtan ngak. Ini lac sa dalam dom kan kandah praong bo gah Taliban daok dang anak, taphia di bruk srau kadau gah kinh tế, gah iek ruak kik saong pandap mbang menyum./.

Urang lang: H.Pha - M.Phương 04/10/2021