Hu rilo panuac tangi sua ka danak dak 

UB bầu cử tỉnh Bình Thuận hu tabiak sarak brei thau ka hadom labik pilih ruah, angan dom labik pilih ruah saong dom urang hu pilih ruah ka HĐ bhap bini tỉnh Bình Thuận, vaktu 2021-2026 hu pilih ruah di yaok labik. Tui nan, Bình Thuận hu 14 labik pilih ruah urang ka HĐ bhap bini tỉnh. Dalam nan, 1 labik lac huyện Phú Quý hu pilih ruah 1 urang, 6 labik pilih ruah 3 urang, 1 labik pilih ruah 4 urang saong 6 labik pilih ruah 5 urang. Abih tih dom urang hu pilih ruah ka HĐ bhap bini tỉnh, vaktu 2021 - 2026 lac 53 urang.

    Sở KH-ĐT tỉnh Bạc Liêu brei thau, akaok UBND tỉnh njauk gauk brei mek veik sarak buh jien tame ngak danak dak sang iek ruak Đa khoa du lịch – padeih padei pakat dunya Phương Đông (di phường Nhà Mát, ban Bạc Liêu). Makna njauk mek veik danak dak ini,lac kayua gah buh jien tame ngak, lac Cty CP dunya Phương Đông peih ngak danak dak biak suai damuai dut saong sarak di UBND tỉnh Bạc Liêu, oh brei mboh hu prein khang gah jien padai tui panuac sanya, caik brei palai pajoa tài nguyên. Hu thau, danak dak sang iek ruak Đa khoa du lịch – padeih padei pakat dunya Phương Đông hu taneh praong labaih 9ha, kayua Cty Phương Đông ngak po buh jien tame, praong 800 manieng ndik ngan haong phun jien buh tame ngak tui kuhria abih tih lac 4.500 tỷ đồng.

Thun ini, ban sit Cần Thơ daok kuhria buh tabiak jaik 704 tỷ đồng piah ngak danak dak bruk ngak negar patrun kan kathaot khang kajap. Ban sit ieu peih bruk brei saoh thẻ BH y tế ka 3.090 urang kathaot, urang bangsa takik bhum kan kandah, urang daok dalam labik biak kan kandah saong 34.729 urang sang jaik kan kathaot, peih ngak ginup sarak daong bruk bac da-a ka anek saih, SV kan kathaot; padang 500 baoh sang jum pataom, daong meneing jien điện yaok quý ka 831 sang kan kathaot saong labaih 1.046 baoh sang sarak karja. Gam haong nan, danak dak pato bruk ngak ka urang kan kathaot, jaik kan kathaot, urang bangsa takik hu pambuak haong dom danak dak ba brei bruk ngak, pablak danak dak pachreih ngak nong haong bruk pato pasram ilamu bahrau, tacei pato sang kan kathaot, sang jaik si kan kathaot jalan ngak mbang, peih ngak sarak karei piah daong patagok KTXH labik hu rilo bhap bini bangsa takik, pambak praong dom bruk ngak mbang patrun kathaot khang kajap, siam lagaih.

Pambuak tal sruh jit njom mbak COVID-19 sarau kadhau di ban Hải Dương, jabat pasang iek hu brei langyah tui hukum bruk ngak brei njom mbak jit  kan kandah ka anek manuac. Hu thau, harei 15/2, Công an ban Hải Dương taduan hu panuac khan ka bruk muk Nguyễn Thị Th., ndik tapui thun 1969, daok di phường Hải Tân, ban Hải Dương njom Covid-19. Tapa pasang iek, duah thau, Công an ban Hải Dương gaok biak rilo kan kandah, kayua muk Th. Oh ndem biak, nan ye bruk duah thau asal ngak brei njom mbak hu tuk mboh yau lahik, oh duah mboh. Tapa pataom iek hu, meng harei 1/2 tal harei 15/2, tuk ni muk Th lac urang medil lac njom Covid-19 oh hu nao pathau khan y tế saong oh ngak tui dom jalan pacang caga jit. Urang ni ngak brei njom mbak jit ruak ka pasang, ka anek saong muk daong bruk di sang, ngak ka labik muk daok di dom urang nan njauk pacang cakak, brei daok karei.

Tui Tổng cục jalan mbak Việt Nam, thun ini, dom Cục khik ramik jalan mbak haong Sở jalan mbak pajeng ba dom tỉnh ban meda pala labaih 10 rabau phun hijao rah tui dom jalan roya piah khik siam mekre, salamat, patrun dom bala kayua radaih peih angaok jalan. Tui kuhria, dalam bilan 2 ini meda pala hu labaih 10 rabau phun hijao.

Dah page ni (23/2), Mintri Y tế Campuchia brei thau lac hu 25 urang njom Covid-19 bahrau, dalam nan hu 3 urang njom biến chủng virus SARS-CoV-2 bahrau. Yau nan, abih tih dom urang njom Covid-19 pambuak tal “bruk pataom rilo menuac di harei 20/02” di Campuchia tagok tal 99 urang, rilo meng lac dom urang Trung Quốc. harei kabroi, Thủ tướng Hun Sen hu mbaoh tangin tame harak brei pateok tabiak truh negar saong pakauk tame negar veik dom  urang negar langiu oh ngak njauk bruk pacang caga jit, nduac klaak labik brei daok karei. Daok rahra Campuchia meda njauk langyah tui hukum.

Tapa yaok pataom, Mỹ urak ini hu labaih 28 triệu urang njom Covid-19 saong labaih meteh  triệu urang metai kayua jit ruak ini. Yaom lac menuac sia di Mỹ samu 4% abih tih menuac sia dunya, min dom menuac metai kayua Covid-19 di Mỹ hu tal 20% dom menuac metai kayua jit ruak ini di dunya. Dalam mbang javap jalei tangi sua di Roi-tơ (Reuters) harei 22/02, Tiến sỹ Anthony Fauci, Yam ndok Viện Dị ứng saong ruak njom mbak negar Mỹ brei thau, jit ruak Covid-19 tamuh tabiak di Mỹ dalam tuk neh rabha chính trị ngak ka bruk pandar pataih pacang mbaok jeng sa bruk chính trị salih ka bruk y tế công cộng.

Harei ni, Thủ tướng Hàn Quốc Chung Sye-kyun brei thau dom kapul nyaom, menuac urang ngak suan dom adat ka bruk paatah di gauk meda oh hu taduan bruk daong samar drak meng jien dalam tukvak anak tal. panuac nan hu ba tabiak dalam tuk negar Hàn Quốc mboh dom bruk ngak suan ka bruk paatah di gauk di dom labik pablei pandap, quan mbang saong doanh nghiệp dalam negar./.

Urang lang: Thu Thảo -Mousaphuong -23/2