Bruk ngak ni hu khi ramik ka jit ruak patrun 

Mentri Y tế pasang iek, brei adat hu dieu kien ka vaccine Vero Cell di Trung Quốc piah pabak ka bruk khin hu jru samar chip pacang caga Covid-19 di Việt Nam. Bruk roh duah saong ngak iek vaktu ka 3 hu ba tagok Tạp chí Hiệp hội Y khoa Mỹ brei mboh vaccine pacang hu ruak ka dom urang Covid-19 siam hu tal 78,1% saong 73,5% ka dom urang oh mboh hagait brei thau lac ruak. Kuhria tal akaok bilan 5, hu takik abih  42 taneh ia saong bhum taneh di dunya pandar vaccine Vero Cell di Sinopharm abih tih lac 200 trieu mbang.

Anak bruk njom mbak di jit ruak Covid-19 daok rahtabiak sarau kadhau, Cục pablei salih điện tử saong Kinh tế số - Mintri Công thương hu panuac caong urang pablei salih, kapul pabak dịch vụ pablei salih điện tử daong saong brei mboh dahlau di abih dom pandap pandar pacang caga jit saong pandap pandar yaok harei piah ka bhap binihu thau saong blei pandar. Dom gah chức năng meda pasang iek dom bruk bleik saleik yau ye: khik padauk pandap piah tagok yaom pablei, tagok yaom pajeng, urang pablei njauk urang klaak blei glaong atau njauk mayai tal chất lượng, asal pandap panda (abih di nyu nan lac đơn hàng pambuak tal dom pandap panda caga jit). 

Sở Pato megru Bình Thuận brei thau mbang pakacah tamat THPT thun 2021 meda hu peih labik pakacah di huyen pulao Phú Qúy. Thun ini, dalam tỉnh hu 12.090 anek saih tut angan pakacah tame THPT. Tỉnh kuhria brei 516 duk bilik pakacah di 27 labik pakacah. Ta-eng thun ini, gah pato megru peih veik 1 labik pakacah di Sang bac THPT Ngô Quyền, huyện pulao Phú Quý, salih ka bruk ba anek saih di labik pulao kaoh tagok taneh pakacah yau yaok thun. Langiu dom jalan khik brei ginup pandap panda, gah pato megru jeng padang ngak  dom jalan pacang caga jit Covid-19.

UBND ban Bà Rịa, tỉnh Bà Rịa – Vũng Tàu brei thau, hadei di tuk rayo sap ndem VN brei thau bruk rilo quan dalam ban jeng daok pablei duh ka tuai pak di labik hadei di tuk hu adat pakauk, bal hu pato tacei dom phường daa dom sang pablei salih tagok ngak bruk, langyah tui adat. UBND dom phường hu ngak biên bản bruk nan saong saong pandar 8 baoh sang sanya lac oh ngak suan veik. Tui dom po pablei salih, bruk pabak tuai daok veik lac kayua ka oh taduan hu panuac khan di karja pak ni.

Ub bhap bini tỉnh An Giang birau brei tabiak bruk samar drah ka glut jaleih takai kraong Ông Chưởng di huyện Chợ Mới; gam jao bruk ka Sở Tài nguyên Môi trường tỉnh samar pacang labik glut jaleih, oh brei menuac nao jaik, ngak paga pacang piah khik salamat saong tui iek bruk glut jaleih, samar ba tabiak jalan ngak  khan brei ka UB bhap bini tỉnh thau. Dahlau di nan, labik kraong ini gam gam rah tabiak rilo mbang glut jaleih, birau di abih lac harei 2/6, rah tabiak bruk glut jaleih taneh takai kraong Ông Chưởng labik tapa tổ 17, puk Long Định, xã Long Kiến atah labaih 20m.

Nga Daok cak rok patagok sa janih vaccine bahrau meda pacang veik Covid-19 ngan haong dom biến thể halei. Jabat Y sinh Liên bang Nga brei thau meda ngak salah dom roh duah dahlau di lâm sàng ngan haong vaccine bahrau dalam bilan 6, dom bruk ngak iek dahlau di abih meda hu peih ngak di dalam bilan 7. Hu thau vaccine ni meda hu prein pacang cakak haong jit tế bào, meda pacang cakak haong yaok biến thể di vi rút SARS-CoV-2. Dahlau di nan, Nga hu pak janih vắc xin hu pandar lac Sputnik-V, EpiVacCorona, Covivac saong Sputnik Ligh.

Rumani daok peih tabiak bruk brei pandar vaccine Covid-19 ka dam dara umo meng 12 thun tal 15 thun hadei di tuk jabat jru tavao Châu Âu brei pandar vaccine Phai-dơ (Pfizer) ka nyaom urang umo thun angaok nan. Meng tuk peih tabiak bruk klauk jru, Rumani hu pabak jaik 8 trieu mbang vaccine. Barau ini, dom jru vaccine hu pandar yaok harei di Rumani daok  trun khang, ngak haduh hatai ka bruk klauk jru caga ruak di taneh ia Đông Âu hu labaih 30.000 urang metai kayua  ruak Covid -19.

Yaok triệu bhap bini di Syria meda dang anak bala praong mayah Liên Hợp quốc oh brei tapa bruk dui atah dom bruk ngak daong pahla tapa jalan tapen negar di bilan anak tal. Hu labaih 3 triệu urang njauk nao tal labik jaik jalan tapen negar haong Thổ Nhĩ Kỳ kayua mesuh matak dui atah yaok piluh thun tapa di Syria. Urak ni yaok bilan hu labaih 1.000 radaih tải di Liên Hợp Quốc tame Syria di sa labik canah cakak lac Bát An Ha-oa (Bab al-Hawa) piah pajeng pandap mbang, pandap panda y tế saong daong pahla, kham maray pabak hu ka 4/5 bhap bini di tây bắc Syria./.

Urang lang: Ái Nghiêm -Thu Thảo -5/6