Rilo urang hu klauk dalam mbang ka 5 ni 

Di mbang ngak bruk haong urang dang akaok ban raya HCM di bier harei 11/7, Thủ tướng Phạm Minh Chính tacei lac dahlau di abih brei  25%  dalam abih tih vaccine Covid-19 di dalam negar ka ban raya HCM, kham marat tal puac bilan 7 thun ni klauk 2 triệu mbang ka bhap bini ban raya. Ini lac mbang ngak bruk tapak  ka 3 di Thủ tướng ngan haong ban raya HCM dalam labaih 3 bilan tapa, dalam tuk  ban raya HCM hu labaih 13.000 urang njom saong daok paatah di gauk tui sarak 16. Urang par akaok rajaei jao ka ban raya peih ngak siam sarak 68; pasang iek catang, daong dom urang lahik bruk ngak, urang njauk kan kandah...; peih dom sruh radaih pajeng pandap pablei tame dom jalan praong, jalan sit, dom labik kan kandah ka bruk pabak pandap panda piah daong ka bhap bini samar jang.

Sở Y tế ban raya HCM brei thau bruk klauk jru mbang ka 5 vaccine pacang Covid-19 song tui kuhria tuk camereip lac  1,1 triệu mbang vaccine hu peih ngak dalam  2-3 adit tal.Tui bruk batabiak, dalam mbang klauk ni , dom urang hu klauk dahlau langui di dom nyaom tui sarak 21 dok hu dom urang mbuan si njauk ruak dok di dom quận,  huyện. Tui kuhria ban raya peih  630 labik klauk , klauk ka labaih  120 urang/sa labik klauk/ sa harei

Bình Dương hu 195 urang njom bahrau Covid-19 saong 1 urang dương tính veik dalam harei 11/7. Kuhria meng tuk  tamuh jit di mbang ka 4 tal urak ni,  tỉnh hu 1.500 urang njom Covid-19 dalam rahra. Jit ruak rahtabiak di 48 công ty, xí nghiệp saong yaok pluh labik sang trọ di urang ngak. Urak ni Bình Dương hu 7 labik brei paatah di gauk tui sarak 16 di Thủ tướng rajaei. Tỉnh bahrau likau Mintri Y tế daong pandap panda, mac suak yava, manuac ngak, lang talaih dom kan kandah di danak dak blei mac bahrau, pandap dut iek piah khik tani tanat bruk pacang caga jit.

UBND tỉnh Long An brei thau tong abih  công ty, doanh nghiệp dalam tỉnh  njauk padeih ngak meng  mon 12 kreh melam 13/7. Dom bruk prong  piah pacang caga bala meng langik tasik, an ninh quốc phòng song bruk samar drah karei karei, brei khan ka Akaok  tỉnh piah likau panuac tacei pato. Long An hu  62 cụm  ngak công, 35 labik ngak cong  song labaih 230.000 urang ngak, dalam nan hu rilo urang ngak mai meng  dom tỉnh ban karei. UBND tỉnh Long An hu panuac khan tal dom tỉnh, ban dok jiak tapen yau TP.HCM, Tây Ninh, Tiền Giang, Đồng Tháp piah khan ka dom công ty, doanh nghiệp dok dalam tỉnh  song bhap bini thau, piah ngak catang tui.

Dah page ni (12/7),mbang pajeng pandap daong hu pajeng meng ban Phan Thiết (tỉnh Bình Thuận) tal Ủy ban MT negar Việt Nam ban raya HCM saong tỉnh Bình Dương, pajeng tui 7.200 lít ia lasin, 4 tấn ikan bóp that,4 tấn ikan hu pabu thu, 10 tấn thanh long that saong 500kg thanh long bluh thu... abih tih yaom jien lac labaih 2 tỷ đồng, piah ba nao tal labik brei daok karei, labik njauk pacang veik. UBND tỉnh Bình Thuận brei thau ini lac bruk rik daong di dom doanh nghiệp di Bình Thuận daong ka ban raya HCM saong Bình Dương anak bruk jit ruak daok rahtabiak sarau kadhau di 2 tinh, bal ni. Taeng di ban raya HCM tal urak ni hu taduan paok jien daong jaik 21 tỷ đồng meng dom tinh, bal karei, gam haong rilo pandap panda, kaya nong, pandap mbang.

Indonesia bahrau jeng negar  Đông Nam Á camereip yam tapa tanut  2 triệu 500 ribau urang njom Covid-19 meng di akaok jit prong  song dok dalam dom negar hu urang njom ruak yaok harei glong abih di dunya . Dom sang iek ruak di negar ni dok dang anak bruk kurang, takik,  hu labik oh daok  ô-xy. Rajaei negar ni hu panuac sinya khik ramik song pabak ô-xy song dok duah bruk pabak brei  meng dom negar karei .Ngan song bruk njom mbak samar di anek ruak Delta, Rajaei Indonesia hu khan lac negar ni meda dang anak bruk  lac meda hu  50.000 urang njom yaok harei.

Biến thể Delta jeng daok ngak ka rilo taneh ia di Đông Nam Á biak glaih ghar piah pacang caga. Di Thái Lan, yaom lac hu ngak iek bruk peih pambang Phuket ka tuai damuai hu klauk vắc xin Covid-19, Phuket jeng hu mboh sa urang njom biến thể Delta camriep di harei 10/7.Campuchia rilo harei hu jaik 1.000 urang njom saong yaok pluh urang metai. Daok di Hàn Quốc, mbang camriep  mboh manuac njom ruak dalam harei glaong labaih 1.300 dalam 3 harei gam (meng harei 9/7 tal urak ni) kuhria meng di tuk tamuh jit, dalam nan hu dom urang njom biến thể Delta tagok samar; 80% dom urang dương tính dalam umo meng 20-30 thun, ka oh hu klauk tiêm vaccine.

Rilo labik di gah timun negar Mỹ meda dang anak langik pandiak glong di abih dalam dom harei tal , dalam tuk vak labaih   31 triệu urang dok dalam dom labik hu panuac khan lac pandiak biak glong.Di Thung lũng chết (Death Valley) di bang California, panidka tagok tal tanut 54,4 độ C dalam harei  9 song  10/7. Langik pandiak glong ngak ka bruk pasang iek khuah glai kan kandah jang, langik thu pandiak tal tanut ia hu palao meng kapan haoh piah padam khuah njauk thu abih dahlau di tuk gaok mbaok haluk./. 

Urang lang: Thu Thảo -Hanipha- 12/7