Thung phiếu hu niêm phong song hala phiếu palih ruah urang ka Quốc hội mbang XV tagok jalan tabiak bhum tasik gah merong

Sở Y tế Hà Nội mesup 7/5 brei thau bruk dut iek 123 mẫu di sang iek ruak K labik Tân Triều, mboh hu 10 mẫu dương tính song nCoV. Tapa duah thau mboh lac, dalam 10 urang ni hu sa urang dahlau daih iek ruak sa bilan di sang iek ruak Bệnh Nhiệt đới Trung ương, mai sang iek ruak K njom mbak ka 5 urang karei song 4 urang dalam sang. Meng 5tuk meteh mesup 7/5, Sang iek ruak K padeih taduan urang ruak, oh brei urang tabiak sang iek ruak, brei dok karei yaok khoa, balik di abih 3 cơ sở. Meng harei 6 tal harei 8/5, labaih 2.000 urang y tế, urang ngak di sang iek ruak K hu mek mẫu duk dut drah pasang iek Covid-19.

Piah pacang caga jit Covid-19, Sở Pato megru Ban Cần Thơ saong Bình Thuận iew dom sang bac brei ngak salah bruk pakacah puac mbang bac II dahlau harei 15/5, avar jang bruk ba tabiak dahlau di nan. Sở Pato megru Bình Thuận caong khin dom đơn vị brei pasiam veik bruk pato pakai piah ngak brei salah danak dak suai abih lac di harei 20/5 saong tamat thun bac te abih lac harei 25/5. Sở Pato megru Ban Cần Thơ jeng brei thau tal dom jabat patao megru dom quận, huyện oh peih bruk tacei pato jalan palih ruah anek saih pakacah tame tal bac 10 thun bac 2021 -2022 tui yau bruk ba tabiak tuk camereip.

2 kapal pajeng pandap Trường Sa 04 song Trường Sa 19 di Lữ đoàn 125 (bhum 2 hải quân) bahrau tagok jalan tabiak bhum tasik gah merong, ba tui thung phiếu hu niêm phong song hala phiếu palih ruah urang ka Quốc hội mbang XV song urang ka HĐND dom pakat vaktu 2021-2026. Tui jalan nao, 2 sruh kapan nao tal tong abih dom nhà giàn DK1 angaok tasik gah merong piah urang lin hải quân peih ngak quyền rahra di drei. Vaktu peih bruk palih ruah angaok tasik di 2 sruh kapan nan tui kuhrai hu dui atah meng 15 tal 18 harei song pataok tame boh taneh dahlau di harei 23/5 piah dar pasang iek hala phiếu tui adat hukm.

Page ini 7/5, Mban Tacei ba pacang caga bala meng langik tasik saong Duah daong urang gaok bala tỉnh Bình Dương brei thau, hajan hangin khang harei kabroi ngak khut trak sang danaok, phun pala di bhap bini ban Thủ Dầu Một, ban sit Tân Uyên saong huyện Dầu Tiếng. Hu 3 urang njauk rambuac, 3 baoh sang jaleih, 249 baoh sang par tabung; labiah 45 ha cao su, njam patam, phun kayau jaleih…Urak ini, karja dom palei daok brei manuac nao daong ramik, saong pasang eik, taong yaom khat lahik piah daong ka bhap bini.

Sa pandap mekre di tuk pahadar 67 thun jayah Điện Biên Phủ (7/5/1954 – 7/5/2021) bahrau hu kapul họa sĩ ngakh bloh, nan lac blah rup cih daning 3.000 m2 brei mboh veik 4.500 urang dalam mbang mesruh praong 56 harei puac abih di Điện Biên Phủ, hu gah cih vak dalam negar tong yaom lac sa dalam dom kadha prong abih di dunya cih ka bruk mesruh metak. Akaok Kapul Mỹ thuật Việt Nam Lương Xuân Đoàn tong yaom ni lac "jakjeng bahrau di mỹ thuật Việt Nam" song brei thau Kapul Mỹ thuật Việt Nam hu brei ba tame hội dom họa sĩ ranaih umo hu mbaok tame danak dak.

Pandap daong di dunya mai meng labaih 40 taneh ia daok pataok tame mblang kapal haok Ân Độ, ba tui oxi, jru tavao, pataih pacang pabah saong pandap y tế. Dom kapal gilai pajeng oxi saong dom jamraih pambuak tal oxi jeng daok pataok tame, ba pandap tagok saong daok pajeng pandap mai veik rilo mbang. Dữ liệu di Mentri Y tế brei mboh abih tih urang njom ruak di taneh ia hu rilo bhap bini ka dua di dunya tagok tal 21 trieu mbang hadei di dom urang ruak tagok rilo di abih lac 412.262 urang dalam harei 6/5. Jeng dalam harei nan, urang metai jeng tagok galong, hu 3.980 urang, tui nan urang metai tagok 230.168 urang.

Dom harei tapa, labaih 100 negar song rilo urang ilamu hong dom kapul nyaom prong hu ngak harak pok tagok gah Y tế dunya ieu ba tangin tame bruk piah ka dom negar song dom hãng jru klaak bản quyền vaccine pacang Covid-19. Dom menuac pachreih tui bruk ni ndom lac karei jang bruk labaih vaccine di rilo negar phương Tây, biak rilo negar kan kathaot ka oh taduan hu vaccine halei. Bruk ini daok ngak ka bruk mesruh pacang caga jit Covid-19 di dunya dui atah. Tui WHO, tal abih bilan 4/2021, jeng hu 700 triệu mbang vắc-xin hu klauk ka dom negar dalam nan hu 0,2% lac dom negar kan kathaot.

Mentri Kinh tế saong Jien padai Campuchia hu tabiak harak brei thau bruk cakak meneing jien cai pandar di dom mintri, ban ngành piah pataom jien ndo tame ka bruk pacang caga Covid-19. Tui nan, Campuchia brei cakak trun meteh yaom jien thun 2021 ka dom bruk ngak oh ka sumu chip atau oh meda hagait tal bruk ngak di jabat. Dalam thun ini, Rajaei Campuchia caga labaih 7,5 tỉ USD, trun 1,9% dut saong thun 2020, bruk cakak trun jien pandar cai nan piah khik brei sumu gauk di gah kinh te saong xa hoi.

Urang lang: Ái Nghiêm – Hani Pha – 07/05 15:45:12