Tỉnh Bình Phước hu padang bilai pasang iek labik tapen negar piah pacang caga jit Covid-19

Jala pandiak 17/6, Mentri Y tế brei thau, dalam 6 tuk tapa, dalam negar hu 220 urang birau njom Covid-19, dalam nan hu 8 urang tame negar hu brei daok karei chip saong 212 urang dalam negar di Bắc Giang, TPHCM, Tiền Giang, Hà Tĩnh saong Nghệ An. Ta-eng Ban raya HCM, dalam 12 tuk tapa hu 45 urang njom Covid-19 hu Mentri Y tế brei thau, dalam nan hu tal 24 urang dahlau daih dut iek mboh am tinh mbang 1.

Sở Y tế TP.HCM bahrau brei salih bruk ngak di sang iek ruak Trưng Vương jeng sang iek ruak piah taduan raok saong taong ruak ka urang ruak Covid-19, hu 1.000 papan ndih. Yau nan urak ini dom labik taong ruak Covid-19 di TP.HCM hu 9 sang iek ruak. Tui Sở Y tế ban raya, kayua ruak njaom mbak glaong nan ye urang ruak Covid-19 brei hu taong ruak di dom sang iek ruak caik karei ka urang ruak Covid-19, oh brei daok meluk gauk dalam sa sang iek ruak hu rilo janih ruak, lingiu di labik hu ginup prein pacang jeng dua, meng labik taong ruak tal urang y tế.

Harei 17/6, UB bhap bini Ban Biên Hòa ginum samar saong Sở Y tế, Pasak Pasang iek ruak kik Đồng Nai pambuak tal bruk urang njom Covid-19 di Binh Duong mai blei pamdap, mbang menyum di Big C Đồng Nai. Tapa duah thau urang taom gaok, hu 7 urang F1 taom gaok jaik, labaih 500 urang ngak bruk di Big C Đồng Nai taom gaok atah. Ban Biên Hòa brei pacang, padeih bruk pablei salih abih di siêu thị Big C Đồng Nai, kuan phở Hương Lan saong kuan pablei pandap taphia nan.

Tui UBND tỉnh Bình Phước, dalam tỉnh urak ini hu 72 bilai pasang iek labik tapen negar saong dalam taneh ia piah pacang caga jit Covid-19. Tui nan, 65 bilai pasang iek bhum tapen negar daok di 3 huyện: Lộc Ninh, Bù Đốp, Bù Gia Mập, kayua bộ đội Biên phòng tỉnh Bình Phước pan akaok; 7 bilai daok di dom jalan praong dalam dom huyện: Đồng Phú, Bù Đăng, Chơn Thành, Hớn Quản, kayua Công an tỉnh Bình Phước pan akaok. Dom bilai daok ngak siam bruk pambuak gauk haong gah y tế pasang iek menuac nao mai, mek mẫu dut iek, khai báo y tế.

So Pato megru Bình Thuận brei thau tỉnh ini njauk gauk ka bruk pakacah tamat THPT 2021 hu peih veik labik pakacah di Sang bac THPT Ngô Quyền, di huyện kaoh pulao Phú Quý. Ni lac sa bhum palei dalam negar meng dahlau mai brei anek saih tagok baoh taneh piah pakacah. Piah pajeng ba đề pakacah saong kadha pakacah meng baoh taneh tabiak kaoh pulao saong mai gilac veik, Sở daok kuhria pah kapal haok pajeng abih jaik 700 trieu dong nao saong mai. Mbang pakacah thun ini dalam tỉnh hu labaih 12.000 anek saih tut angan pakacah.

Hadei di tuk gah Y tế Dunya (WHO) brei pandar 2 janih vaccine Covid-19 kayua Trung Quốc ngak tabiak, Hàn Quốc lac taneh ia camereip abih oh daok dut iek dom urang hu klauk blaoh vaccine di Sinopharm haong Sinovac meng harei 1/7. Bruk nan hu pandar ka dom urang hu klauk blaoh 1 dalam dom janih vaccine hu WHO brei pandar, dalam tuk tuai jeng daok brei dut iek dahlau saong hadei di tuk mai tal Hàn Quốc. Min sarak bahrau ini oh kuhria gam tuai mai meng dom taneh ia bo Hàn Quốc mboh lac hu sruh jit praong atau hu dom biến thể.

Harei ini, Australia hu ba tame panuac kakei ngan saong bruk pandar vaccine pacang Covid-19 di hãng AstraZeneca, patagok umo brei klauk jru vaccine meng 50 tal 60 thun. Ngan saong dom urang umo ala 60 thun hu klauk blaoh mbang 1 vaccine AstraZeneca, dom urang ilamu y tế Australia kakei lac brei patui klauk veik jru mbang 2 kayua dom urang ruak khan darah trun tiểu cầu hadei tuk klauk jru mbang 2 nan biak takik.

Asar intan praong ka 3 di dunya daok hu parang iek di Botswana, trak 1.098 ca-rat kayua Cty Debswana duah mboh. Ini lac asar intan praong abih bo Cty duah mboh hu dalam sajarah 50 thun ngak bruk. Asar intan praong abih di dunya trak 3 rabau 106 carat hu duah mboh di Nam Phi thun 1905; asar praong ka 2 trak 1.109 carat, hu duah mboh di Bốt-xoa-na thun 2015. Akaok Mintrin Khoáng sản dom lac, bruk duah mboh asar intan biak hu yaom glaong ini njauk di tuk jit praong nan ye ngak ka jien mek tame meng pablei intan trun rilo di thun blaoh./.

Urang lang: Hani Pha – M.P – 17/06 17:04:20