Labaih 20 thun padang mbang ngui, langiu di taneh sit raong raong hadang ikan oh hu laba ye jien mek tame di sang ong  Tuyết Văn Lái daok di puk Giồng Me, Phường 2, ban sit Vĩnh Châu lac meng bruk nao  ngak mbang apah luac thun bilan. Bruk glaih glar nduac duah jien blei brah mbang lac bruk yaok harei di sang ong, yaom lac kham merat ngak mbang min kan kathaot jeng daok tui miat. Biak patuah lac, thun 2015, sang ong hu daong sa drei limo pajaih, yau ye gai vah piah ong hu jalan ngak mbang tani tanat.

Meng kham merat iek glang saong hu bruk daong di bộ đội Đồn Biên phòng Vĩnh Châu, urak ini, limo di ong Lái menek hu 4 drei. Ong Kim Rương, daok di puk Cà Lăng A Biển, Phường 2, ban sit Vĩnh Châu jeng lac sa dalam dom baoh sang urang Khmer hu palih ruah brei limo piah raong. Ong Rương khan lac, limo ini lac drap ar praong dalam sang. Ong Rương jeng lac sang kan kathaot, hu rilo anek, ngak mbang pah, hu meteh cong taneh pala njam patam, nan ye raidiuk meng lavik mai oh hu tani tanat. Ong Rương brei thau, hu daong sa drei limo lac jalan piah sang ong yam tagok salih birau raidiuk:

“ Mboh drei rambah lô, kurang sap janih,bloh daok  raong anek mbang bac, nan ye karja pasang eik daong brei sa drei limo. Dahlak jeng kham merat ngak mbang. Limo ini dahlak caong nyu praong siam, dahlak kham raong ka limo menek hu jeng tapol.”

Ong La Tích, jeng lac sang kan kathaot daok di palei Prey Chop B, xã Lai Hòa, ban sit Vĩnh Châu hu daong limo pajaih meng bruk “ ba gauk daong ka urang kan kathaot, oh caik ka thei daok veik gah likuh” di Bộ đội Biên phòng Sóc Trăng. Ong Tích khan lac, sang kan kathaot, raidiuk tok maong tame jien nao ngak mbang pah di ong nan ye harei halei hu urang apah meng hu jien. Sang ong kham iek glang siam drei limo birau taduan hu piah nyu menek hu rilo anek jang, yam tagok tabiak truh kan kathaot. 

          “ Hu daong brei limo, dahlak biak bui sambai,urak ini kham merat ngak mbang oh sahaneng tal glaih glan. Caong khin samar hu drei la-oi piah patagok tapon, bloh tabiak truh kan kathaot, hu jien kuhria ka naek nao bac, bloh peih kuan pablei salih duah jien tame tabiak.”

          Tukvak tapa, dom đồn biên phòng di Bộ Chỉ huy Bộ đội Biên phòng Sóc Trăng hu padang ngak saong khik hu 8 bruk ngak kinh tế daong ka 167 baoh sang kan kathaot, jaih si kan kathaot ngan saongyaom jien abih tih jaik 2 tỉ đồng. Meng tacei pato bruk ngak kinh tế, bhian tui iek saong daong sumu chip, gah bien phong hu daong brei gai vah, peih tabiak jalan daong ka ralo sang kan kathaot tabiak truh kan kathaot khang kjap. Birau ini, Bộ đội Biên phòng Sóc Trăng hu jao brei 50 drei limo pajaih, yaok drei yaom 15 trieu dong ka sang urang kan kathaot di huyen Trần Đề, huyện Cù Lao Dung saong ban sit Vĩnh Châu, kuhria tui jien abih tih 750 trieu dong. Langiu di nan, dom đồn biên phòng  jeng daok roh duah dom jalan ngak birau piah salih janih phun pala athur raong, rik daong haong karja palei sangka raidiuk bhap bini bhum tasik.

           Tui thượng tá Nguyễn Trìu Mến, Phó Chính ủy Bộ đội Biên phòng Sóc Trăng, dalam tỉnh hu takai tasik atah 72 km daok di huyện Cù Lao Dung, huyện Trần Đề saong ban sit Vĩnh Châu, lagaih ka bruk ngak kinh te jeng yau quốc phòng, an ninh di tỉnh. Mikva daok di bhum taphia tasik ralo meng lac urang bangsa Khmer kan kandah.  Dom thun tapa, bruk an ninh chính trị di tỉnh jeng yau bhum biên phòng hu tani tanat, min dalm nyu jeng mbuan hu kan kandah kayua kol kanjak jhak tuk halei jeng duah jalan pacuh pajarak, ngak sraw kadau. Meng bruk di drei, Bộ đội Biên phòng Sóc Trăng hu kuhria caga dahlau bruk khik caga quyền ngak po bhum tasik saong daok kham merat daong ka bhap bini ngak mbang, rik pren daong padang ngak palei pala birau, daong padang ngak sang brei ka urang kan kathaot labik taphia negar, tasik pulao…Tapa nan, rik daong pakhang pakajap hatai jia di bhap bini ngan saong Đảng, Karja, bol bala, dak padang “thế trận lòng dân” pambuak pagam saong bruk khik kajap quốc phòng, an ninh bhum tasik./.