Palei Bưng Triết, xã Liêu Tú, huyện Trần Đề lac labik hadah ka bruk padang ngak palei pala bahrau tui jalan “Karja song bhap bini BA gauk ngak”. Tui bhap bini daok pak ni, karja ngak jalan prong tame palei, dok bhap bini dong padang ngak dom jalan đal sit nao tal yaok boh sang di mik va.   Ong Tăng Chốt, daok di  khu 2 dalam palei  Bưng Triết brei thau, bhap bini pak ni biak thau jum pataom gauk, sa hatung hatai haong gauk, ba gauk padang ngak jalan dalam puk palei, urang hu takik ye rik dong takik, hu rilo dong rilo, tapa nan tal urak ni dalam khóm 2 ni, sang halei jeng hu jalan  đal nao tal pabah mbang sang.

Dalam palei di hulin mik va jum pataom gauk lo, tal dom adei sit jeng khin rik dong pren song khol hulin. Biak sa hatung hatian haong gauk. Meyah ngak jalan, ye hu urang ni tanek lisei, urang karei ngak pandap mbang brei piah duh ka bruk mbang menyum ka urang likei, dam dara nao ngak, jien ndua ye jak gauk rik patom tame. Hu yau nan meng hu bruk sa hatung hatian haong gauk, ngak bruk hagait ye khol hulin jeng ginum biai hong bhap bini, njauk gauk  dahlau di tuk ngak.

Ong Trần Liêu, urang hu angan je dalam bhap bini bangsa takik di palei  Bưng Triết jeng lac urang hu rik dong rilo jien ndua song pren yava dalam bruk jak ba bhap bini tame padang puk palei. Ong Liêu khan lac, piah paglaong rai duik di mik va dalam palei ye  cơ sở hạ tầng lac bruk biak prong, kayua yau nan ye, dom thun tapa, ong kham merat jak ba mik va, diuk nek, adei sa-ai, urang ngak pahla ngak hu yaok ribau mét jalan đal, pasiam veik song ngak hu labaih 12 boh tatua dalam phum sóc, tui yaom jien lac yaok rituh  triệu đồng piah dong ka bhap bini nao mai, pajeng ba pandap panda mbuan lagaih. Ong dok jak ba hu pok jien labaih 100 triệu đồng piah ngak jalan tathuak ia khik caga palei pala oh ka dauh ia song oh nerak alam môi trường tuk hu hajan khang. Lingiu di nan, ong jak ba rik dong kadung jien truac hadah gom angaok jalan dalam  puk palei di tuk melam, gam duh ka bruk nao mai, gam khik caga siam mekre dalam palei. Ong Trần Liêu brei thau:

Padang ngak ka anek bhik di drei nao bac, ka mik va nao mai mbuan lagaih, urak ni lac radeih 4 kon, 7 kon peih  tame tal palei. Bloh sa boh tatua jeng bahrau hu padang ngak bloh, oh ka peih pakak Hulin jak ba dom urang ngak pahla hu labaih 67 triệu đồng, dok veik mik va dalam palei rik dong, abih tih jeng labaih  100 triệu đồng. Urak ni dok kuhria peih prong jalan bê tông tame palei .

Nao angaok dom jalan bê tông dalam palei  Bưng Triết, khol hulin mboh hu bruk salih bahrau mboak meta di bhum palei pala pak ni. Meng dom jalan hu tuh bê tông pambuak pagam dom  khu dân cư song gauk, mbiah tal dom baoh gom truac hadah grauk puk palei tuk melam mai. Tong abih jeng lac bruk  rik daong pren yava di bhap bini, bruk salih bahrau nan hu dong ngak ka bhum palei Bưng Triết oh padeih salih bahrau, patagok,,, rai duik di bhap bini jeng dak harei dak hu tagok mboh di anak meta. Saai  Lâm Quang, Bí thư chi bộ, gam ngak Trưởng ban bhap bini palei Bưng Triết brei thaut,  palei hu labaih  570 sang song jiak  abih menuac, lac urang  Khmer, hu neh tabiak JENG 3 khu dân cư lac khu 1, khu 2 song  khu 3. Urak ni jalan mbak nao mai hu pambuak pagam gauk biak siam, jeng hu yau nan meng hu njauk gauk, sa hatung hatian haong gauk dalam bruk padang ngak palei pala di mik va pak ni. 

Bruk ngak jalan bê tông hu makna biak prong, lagaih ka bruk nao mai di mik va, anek saih nao bac jeng hu mbuan lagaih. Bloh mik va jeng thau bruk ba gauk padang ngak  jalan lagaih haong ý Đảng, karja nan ye mik va abih hatai ngak .

Ong Dương Minh Mẫn, Phó chủ tịch Ủy ban nhân dân xã Liêu Tú, huyện Trần Đề brei thau, padang ngak cơ sở hạ tầng palei pala, abih di nyu nan lac ngak tatua, ngak jalan, hu bhap bini kham merat ba gauk tame ngak. Kurhia taeng meng akaok thun tal ni, bhap bini dalam xã rik  pataom hu  188 triệu đồng piah ngak 70m jalan bê tông praong meng  1-2 mét song 3 baoh tatua palei pala. Langiu di nan, mik va dok rik pataom hu 30 triệu đồng piah ngak paga pacang mblang hareik piah  nyaik ngak brei nerak môi trường

-  Meng bloh, bruk padang ngak palei pala bahrau  di xã Liêu Tú hu  ngak biak siam, abih di nyu nan lac bruk jak ba bhap bini hu mbaok tame song karja pak ni. Siam di abih nan lac jak ba mik va rik dong padang ngak dom jalan palei, pala bingu rah tui dom jalan, ngak paga, dalam nan hu palei Bưng Triết ngak biak siam bruk ini. Pak ni jak ba jien di bhap bini, bloh bhap bini daok ba gauk rik pren  song karja. Meng nan bo dom jalan palei di xã hu ngak salah bloh, mboak meta palei pala dak harei dak siam jang. Anak tal xã daok jak ba  mik  va ba tangin tame song karja dalam bruk padang ngak palei pala bahrau piah ngak yau habar mek hu tanut di  huyện ủy Trần Đề hu jao ka xã.

 Meng ngak siam bruk pathau khan, ngak brei salih bahrau hatai sahaneng di bhap bini, xã Liêu Tú, huyện Trần Đề, tỉnh Sóc Trăng daok ieu pataom hu bruk rik dong di bhap bini  piah pambuak song dom phun jien dong b, peih ngak hu rilo bruk di danak dak pakat negar padang ngak palei pala bahrau di pak ni, dong ka bhum palei pala oh padeih cakroh patagok./.