Dalam dom bilan daok thaoh cang trun pajaih bilan padai Đông – Xuân anak tal, sang sa-ai Nguyễn Văn Lâm daok pak phường 2, bal sit Ngã Năm thau mek pong meng 25 sào hamu bilan padai hè thu meng blaoh piah ba mai ngak bimao pong. Meng 400 kalaok meo pajaih blei mai pala, hadei di labaih 20 harei, bimao pon di sa-ai yaok harei paik hu jaik 100 kg. Tui yaom pablei 25.000 tal 28.000 đồng sa kg, kaoh abih phun jien buh tame, sang sa-ai daok laba hu jaik 15 triệu đồng. Sa-ai Lâm brei thau: Yuak padai bloh, mboh pon klaak damen ralo nan ye ba mai ngak; jien mek tame yaok thu jeng hu dom pluh triệu. Ngak bimao phon mboh bingi jang ngak padai vụ, kayua dalam labaih 1 bilan ye ngak blaoh. Daok padai vụ  glaih ralo, mboh ralo meng khat.

Kein laba meng bruk ngak ini hu pachreih ralo sang di bal sit  Ngã Năm ngak bimao pon luac thun. Yau ye sang ong Đào Văn Kiệt, kayua oh hu taneh pala drak nan ye ong palih ruah bruk ngak ini piah patagok kinh tế. Langiu di pon ong blei dalam palei ye sang ong daok nao duah blei di dom labik jaik taphia yau pak tỉnh Hậu Giang, Bạc Liêu saong Cà Mau. Tui nan, yaok mbang ngak meng 900 tal 1000 kalaok meo pajaih, mek hu jaik 2 tấn bimao, kaoh abih jien buh tame ong daok labaih 30 triệu đồng yaok vụ pala. Ong Kiệt lac: Khin pala hu laba brei hu 2 kadha praong, kasa palih ruah hamu, pon siam di dom labik drei randap nan ba mai ngak; ka dua lac tukvak iek glang pon, ủ phon saong tableik pon ka nyu siam blaoh ka meng tabiak mô, tabiak meo bimao jeng ngak ka nyu siam yau nan ka meng ba mai siam lagaih, saong năng suất glaong.

  Urak ini, ralo sang urang nong dalam bal sit Ngã Năm daok patagok mblang taneh pala bimao pon, abih di nyu nan lac dom bilan daok thaoh. Langik tasik bilan ini laghaih ka bruk pala bimao, daong ka mikva rami ramik mblang hamu, plaih bruk ngộ độc hữu cơ kayua pon dalam vụ anak tal, ba bruk ngak tuk daok thaoH saong hu jien mek tame tuk cang ngak bilan Đông – Xuân anak tal.  

Dalam bilan hè – thu thun ini, bal sit Ngã Năm hu 445 baoh sang ngak bimao pon, dalam nan hu jaik 150 baoh sang ngak luac thun, sản lượng hu jaik 800.000 tấn bimao. Duk Kinh tế hạ tầng puk palei brei thau, meng kein laba di bruk ngak ini, anak tal, jabat meda pachreih dom baoh sang patagok bruk ngak ini dalam tukvak anak tal, taphia di nan patagok bruk pato pathram dom ilamu kỹ thuật piah ka bhap bani pala hu năng suất saong kein laba jang. Abih di nyu nan lac pachreih bhap bini padang dom kapul pambuak bruk pala drak, ngak tabiak ralo bimao pon, piah mbuan pablei saong patagok kein laba. Ong Hồng Minh Nhật. Akaok duk Kinh tế bal sit Ngã Năm, tỉnh Sóc Trăng daok brei thau lac: Dut Kinh tế meda pambuak haong dom gilang pariak piah peih ngak siam Quyết định 68 di Thủ tướng Raja-ei ka sarak daong blei mac móc duh ka bruk ngak nong; ginum biai haong Gilang pariak Sarak karja pasang iek, daong meng Kadung jien negar duah bruk ngak piah daong ka mikva patagok bruk pala bimao phon.

Anak meta mboh lac, urang pala bimao tok buh pren tabiak mong iek, 1 sào pon dalam jaik 30 harei brei jien mek tame labaih 600.000 đồng. Phun jien takik min kein laba rilo jang dua mbang dut haong ngak padai. Kayua yau nan ye, meyah thau ba abih pon piah ngak bimao pon ye meda ba mai bruk ngak saong patagok jien mek tame ka bhap bani dom puk palei./.