Akaok mentri Ngak nong saong patagok palei pala Nguyễn Xuân Cường

Dalam sa mbang nao pasang iek bruk njaom mbak di tỉnh Sóc Trăng bahrau ini, Akaok mentri Ngak nong saong patagok palei pala Nguyễn Xuân Cường taong yaom glaong tỉnh hu ngak siam bruk caga pacang tua riya njaom mbak di bilan thu 2019-2020, daong ka rilo mblang taneh ngak nong plaih hu khat lahik kayua bala meng langik tasik.

Biak di nyu, dut haong yaok thun, bilan padai Đông Xuân thun ini tỉnh Sóc Trăng trun pajaih avar jang jaik 1 bilan piah yuak hu dahlau di tuk njauk tua riya pandiak bhang saong njaom mbak. Tui nan, tal urak ini hu labaih 81.000ha hu yuak bloh dalam abih tih 185.000 ha hu pala drak, ngan haong năng suất kuhria rah tapa hu labaih 6,3 tấn/ha. Sa-ai Huỳnh Thanh Phong, urang nong di xã Viên Bình, huyện Trần Đề khan lac, tui pathau khan di gah ngak nong, sang sa-ai hu pala drak avan jang 70 công taneh padai, tal urak ini hu yuak blaoh, tui kuhria laba hu meng 15-20 triệu đồng/ha. Năng suất jeng hu, kuhria tui công pak ini sa công (1.300m2) hu jaik 900kg, jeng hu urang ngak hu 1 tấn, hu urang 500kg, kayua kurang aia, jeng tui labik.

Angaok dom mblang hamu di huyện Trần Đề urak ini, padai jeng daok tathak saong daok hu yuak. Taphia di nan, tỉnh ini daok hu panuac kakei urang nong oh ngak padai vụ 3, abih di nyu lac dom labik takik hu ia. Sa-ai Dương Thanh Tùng, urang nong daok di ấp 4, bal sit Long Phú, brei thau, taong abih 25 công padai vụ Đông Xuân di sang jeng hu yuak dahlau di tuk Tết. Daok vụ 3, sa-ai jeng klaak thaoh, yaom lac thun dahlau, padai vụ 3 brei năng suất biak glaong, jaik 7-8 tấn/ha. Sa-ai Tùng lac: Meng akaok vụ, tabung aia sua yaok thun di angaok ye drei jeng hu thau paje, nan ye khaol dahlak pak ini lac urang nong daok jaik taphia gauk mong yau ayut sahabat haong gauk nan ye pathau khan jak ba gauk trun pajaih bilan Đông Xuân avan jang, brei yuak dahlau di tết Nguyên đán, nan ye siam jang. Kayua gah ngak nong saong karja palei biak sang ka tal kadha ini. Tui kuhria dalam bilan 11 atau 12 di thun 2019 meda hu mbak tame dalam mblang hamu.

Long Phú, sa dalam dom labik hu mblang taneh trun pajaih padai vụ 3 prong abih di tỉnh Sóc Trăng. Yau nan min kayua gaok tua riya pandiak bhang saong nyaom mbak, gam haong bruk kham merat kakei pahadar di gah ngak nong saong puk palei, dom mblang taneh pala drak di huyện ini trun labaih 4 mbang. Ong Lâm Văn Vũ, Akaok Duk ngak nong saong patagok palei pala huyện Long Phú brei thau, meyah thun dahlau padai vụ 3 di puk palei pala drak labaih 15.000 ha, ye thun ini trun daok 3.700ha. Meng akaok thun ye duk ngak nong jeng hu pok panuac ka ủy ban bhap bnai huyện kakei, pahadar mikva oh ngak padai vụ 3. Đài Truyền thanh jeng bhian patagok bruk pathau khan angaok rayo piah ka mikva thau lac thun ini, bruk nyaom mbak meda mai avan jang saong njaom tame dalam mblang hamu yau nan. Langiu di nan jeng pok panuac ka Ủy ban kuac kuah labaih 23 công trình thủy lợi piah padang aia duh ka bruk pala drak jeng yau aia pandar ka bhap bani. 

Tal urak ini, dom mblang taneh ngak padai tui bruk ba tabiak di tỉnh Sóc Trăng trun pajaih jeng khik hu siam mekre. Yau nan min, jeng hu jaik 1.000 ha padai vụ 3 gaok kan kandah meng tua riya pandiak bhang saong njaom mbak, ini lac mblang taneh kayua bhap bani eng drei pala drak, oh ngak njauk tui panuac kakei di gah ngak nong. Langiu di nan, daok hu jaik 600 ha padai di labik dự án Long Phú - Tiếp Nhựt, saong jaik 5000 ha phun mbang baoh, njam patam meda kurang aia meyah tua riya pandiak bhang saong njaom mbak dui atah yau urak ini. Ong Lương Minh Quyết, Akaok sở Ngak nong saong patagok palei pala tỉnh Sóc Trăng lac: Khan brei ka mikva thau, oh trun pajaih padai vụ 3 saong salih phun pala karei dalam tuk tua riya pandiak bhang dui atah yau ini. Min tapa bruk ngak khaol dahlak hu mboh, bruk pathau khan ini khaol dahlak tok duh ka phun padai. Daok dom janih phun pala anek athur raong karei ye njauk salih, kadha prong di abih nan lac peih bruk padang aia, patak pataom aia ngak habar duh hu ka abih bilan tua riya, njaom mbak oh ta-eng hagait bilan Đông Xuân angaok phun padai.

Ong Lương Minh Quyết daok brei thau lac, bruk tua riya pandiak bhang saong njaom mbak thun ini catang jang saong dui atah jang bilan thu thun 2015-2016. Urak ini, hadei di phun padai ye gah ngak nong daok kham merati ka bruk khik caga bhum phun mbang baoh saong njam patam di tỉnh./.

Urang lang: Jasi - 21/2