Ông Ong Văn Soi, daok di ấp Cần Giờ, xã Tham Đôn, huyện Mỹ Xuyên, brei thau, meng 10 thun ini mai, bhum palei pala, abih di nyu nan lac bhum palei urang Khmer daok, raidiuk oh padeih patagok, rilo sang đúc hu padang tagok, anek bhik hu nao bac da-a. Bruk njauk biai nan lac, mikva thau jum pataom gauk, ba gauk ngak mbang, dak padang palei negar. Ong Soi lac: "Salih bahrau meng raidiuk tal bruk ngak mbang, pala drak, daong sang, daong  phum sóc patagok. Mikva thau jum pataom gauk, jak gauk dak padang puk palei, tệ nạn xã hội di phum sóc jeng oh daok hu."

Meng dom sarak bangsa, dom danak dak brei ka bhap bini hu peih ngak siam, hu kein laba, tal urak ini, baoh sang Khmer kan kathaot di Sóc Trăng trun daok jaik 20%; dom xã hu rilo bhap bini bangsa jeng hu Sang bac trung học cơ sở, hu bilai iek ruak saong hu jalan radaih peih tal pasak xã; labaih 96% dom baoh sang Khmer hu điện pandar, 97% urang daok di palei pala hu ia pandar hacih sa-at. Abih di nyu nan lac, mikva bangsa dalam tỉnh hu brei saoh thẻ bảo hiểm y tế tal 64% saong jaik 39 ribau sang hu daong sang daok. Lingiu di nan, dom adat cambat, dom bruk di agama, harei pataom ilamu meng kan jeng hu peih ngak, daong khik ramik ilamu bangsa, daong jhul patagok saong pasiam raidiuk, pabak hatai bruk di sư sãi saong hatai caong di phật tử Khmer dalam tỉnh. Ong Thạch Sen, daok di khóm 5, phường 9, ban sit Sóc Trăng khan lac: "Đảng, Karja drei sangka daong biak rilo, abih di nyu nan lac daong khik ramik ilamu, adat cambat. Dalam dom harei Chol - Chnam - Thmay, Đol – ta, Đảng, Karja drei tuk halei jeng hu nao tal dom baoh baha piah rivang phật tử bhap bini Khmer, dom sư sãi. Abih di nyu nan lac tuk  rah tabiak Óc Om Bóc – pakacah ghe Ngo bahrau  ini, hu daong rilo jien piah ngak, tapa nan nyu ngak ka mikva, phật tử Khmer dak harei dak jia tame Đảng, Karja."

 Ong Lý Sóc Kha, Phó akaok mBan Bangsa tỉnh Sóc Trăng brei thau, piah ngak siam, ngak hu kein laba dom sarak bangsa, paglaong raidiuk di mikva bangsa Khmer, mBan Bangsa daok hu pathau khan, peih ngak siam dom sarak di Đảng saong Karja di bhum urang bangsa takik dalam tỉnh, abih di nyu nan lac peih ngak siam Quyết định di Thủ tướng Rajaei ka bruk patrun kathaot khang kajap, dalam nan pataom tame peih ngak Danak dak 135. Nan lac buh phun jien tame piah patui bruk padang ngak cơ sở hạ tầng bhum palei pala yau ye ngak jalan, ngak sang bac, bilai iek ruak, daong tapak bruk pala drak, ngak habar piah paglaong raidiuk bhap bini Khmer khang kajap saong samar di abih. "Jeng caong lac, bruk patruh eik patrun kathaot di bhum urang Khmer kol drei hu siam mekre jang. Kayua urak ini Đảng saong Rajaei daok hu rilo sarak bahrau brei ka bhum urang Khmer. Pagap yau urak ini drei hu bruk daong taneh daok,  njauk hu jalan daong padang ngak sang, điện, ia, nan lac daong tập trung. Meyah hu yau nan, sang mikva hu jalan piah tabiak truh kan kathaot samar jang."

Di dom labik hu rilo urang Khmer daok di tỉnh Sóc Trăng urak ini jeng hu sangka padang ngak cơ sở hạ tầng, dom bruk duh ka bhap bini, daong phun jien piah patagok baoh sang. Meng nan, daong ka raidiuk di mikva dak harei dak salih bahrau, rilo sang yam tagok tabiak truh kan kathaot, tani tanat raidiuk./.