Pathau mikva saong taong abih gauk! Nao tapa dom mbang mesruh metak, taneh ia drei hu ralo urang lin lac thương binh. Yaom lac rup thaik hu thương tích, min ngak tui panuac pato di Wa Hồ “Thương binh jaoh jo min oh klaak saoh”, hu biak ralo thương bệnh binh kham merat yam tagok ngak mbang, salih barau rai diuk,  daong dak padang taneh ia palei negar. Tuk pahadar 70 thun harei thương binh liệt sĩ (27/7/1947-27/7/2017), kol dahlak hu ndom tal ong Sơn Lộc - thương binh urang bangsa  Khmer,  daok di xã Long Phú, huyện Long Phú, tỉnh Sóc Trăng, sa dalam dom kreih camin hadah krah:    

Thun 1987, ong Sơn Lộc tabiak truh bol lin mai veik palei. Hadei di nan, tok diuk. Yaom lac rup thaik hu thương tích di bruk mesruh metak, dalam nan, sa gah meta njauk tagloh, hu jabat chức năng giám định saong brei harak lac thương binh hạng 4/4, min, ong Sơn Lộc kham merat bac daa saong ngak tui panuac pato di Wa Hồ lac “Thương binh jaoh jo min oh klak saoh”. Yaom lac tuk camereip, ong gaok biak ralo kan kandah, abih di nyu lac tuk langik tasik salih bilan, labik laka angaok rup ngak ka ong pandik harao:

“Ngak bruk gaok tuk nyu pandik ngak ka drei oh daok pren ngak bruk hu. Min melam mai saneng meyah drei oh ngak ye anek kamuan drei thei raong…”

 Oh taduan lah eik lipa, tui jalan di bộ đội cụ hồ lac “bruk halei jeng ngak siam, kan kandah halei jeng yam tapa” nyu pachreih thương binh Sơn Lộc yam tagok. Meng nan, ong  ramik pasiam taneh riya, salih jalan ngak mbang, tui mô hình đa canh, đa con, patak pataom. Kham merat yam tapa kan kandah, patagok kinh tế di thương binh Sơn Lộc hu ba mai bingu pahe, baoh yamen, baoh sang hu rai diuk trei sil.

Ndom meyai saong dahlak, ong Lộc brei thau: tuk tok diuk tabiak daok karei, ong hu 6 công taneh hamu. Meng hatai kham merat  yam tagok, ong padang mô hình 2 phun pagam sa drei piah patagok kinh tế. Nan lac phun padai, njam patam saong raong pabui, ngak tui jalan abih takik phun jien, patak pataom jien blei taneh peih praong bruk ngak mbang. Ong Sơn Lộc khan: 

 “6 công meyah ngak oh labaih hagait rilo, bloh drei pala pabak njam patam saong raong kabau limo. Patak pataom harei hasit…”

Urak ini, ong Lộc hu labik ngak mbang biak tani tanat, dalam nan, hu 20 công hamu. Kein laba mek tame yaok thun labaih 200 triệu đồng, dalam sang hu ginup pandap hu yaom. Piah hu rai diuk trei sil, jalan ngak di ong lac, kham merat ngak mbang, duah thau darak pasar piah pandap ngak tabiak hu labik pablei. Ndom ka thương binh kham merat yam tapa kan kandah di ong Sơn Lộc, ong Thạch Thanh Tâm,  phaok akaok kapul urang dahlau daih ngak bol lin huyện Long Phú lac:

 “Thương binh Sơn Lốc lac sa kreih camin jaoh jo min oh klak saoh. Nao lin bloh mai palei kham merat ngak mbang oh cang maong hagaih, yam tagok meng pren di drei. Ini jeng lac baoh sang thau patak pataom, nan ye tani tanat raidiuk…”

Meng dom kham merat di drei, ong Sơn Lộc ralo thun gam hu karja palei pok meyaom, dalam nan hu angan: “urang dahlau daih ngak bol lin daong gauk patrun kan kathaot, ngak kinh tế joi”, “Urang dahlau daih ngak bol lin hadah krah”… abih di nyu nan lac, akaok mintri lao động – thương binh saong XH pok meyaom alin brei bằng khen thương binh mek hu thành tích xuất sắc dalam bruk ngak mbang, bac megru saong ngak bruk.

Sóc Trăng hu jaik 6000 thương binh saong yaok ribau liệt sĩ; dalam nan hu ralo kreih camin yau thương binh Sơn Lộc daok di xã Long Phú, huyện Long Phú tuk halei jeng paglaong phẩm giá saai bộ đội cụ hồ, tari tarieng ngak mbang, patak pataom hu drap ar, ngak ka rai diuk di rup drei saong baoh sang hu trei sil, rik daong dak padang puk palei  dak harei dak kaya meda siam mekre./.