Urang daok karei di sang brei mbang menyum ginup, khik hacih sa-at rup pabhap

# Bruk mbuan njaom mbak ka bhap bini meng urang daok karei di sang yau habar, bác sĩ?

Bác sĩ Trương Hữu Khanh javap jalei: Brei hu duk bilik daok karei, pacang sir saong atah di labik daok, labik mbang huak di menuac dalam sang...Meyah tacei pato ginup saong urang ngak njauk tui lac: oh tabiak truh sang, oh taom gaok haong gah lingiu ye oh njaom mbak ka urang karei. Oh hu bruk anek virus par meng sang ini tapa sang karei. Taom gaok tapak meng hu jalan njaom mbak.

Kayua yau nan ye, meyah F0 daok karei, taong ruak di sang, ngak njauk tui tacei pato ye oh njaom mbak ka urang halei karei. Menuac dalam sang haong gauk jeng oh njaom mbak meyah kol drei tacei pato urang ngak habar piah khik salamat ka menuac dalam sang. Urang njaom COVID-19 daok karei di sang tok pambak tapa ka menuac dalam sang tuk mbang huak, ndih daok sa duk bilik haong gauk. Meyah F0 daok bilik karei atau tuk halei jeng daok atah 2 m, hu cuk pataih pacang mbaok, oh pandar pandap panda haong gauk yau ye khan ao...meda lac oh njaom mbak.

Hu menuac daok huac lac hu bruk kỳ thị tuk menuac dalam palei daok karei di sang. Dahlak mboh lac, njauk pathau khan ka rahra thau bruk njaom mbak yau dahlak hu ndom blaoh nan. Meyah F0 daok dalam sang, oh taom gaok haong puk paga ye oh pambak ruak ka puk paga. Daok nerak di urang daok karei di sang jeng langyah biak mbuan, neh rabha ka nyu tani tanat, pataom mek nerak yaok harei ka nyu haci hacih.

# Urak ini hu rilo menuac tangi sua lac, habar oh mboh kê đơn thuốc ngan saong dom F0 oh hu triệu chứng? Yau nan tuk F0 daok karei di sang, urang hu brei jru yau habar?

Bác sĩ Trương Hữu Khanh javap jalei: Anak meta mboh lac hu biak rilo urang dương tính saong abih eng nan ye urang oh thau lac rup drei njaom COVID-19. Yau nan hu makna lac urang oh menyum jru, oh cang taong ruak. Nan ye ngan saong dom urang daok karei di sang, abih di nyu lac urang oh hu triệu chứng ye oh cang menyum jru hagait.

Oh cang jru hagait saong urang daok karei di sang brei pabak dinh dưỡng, baoh kayau that, menyum rilo ia, atau pabak vitamin C. Meyah ruak rilo jang ye bhian mboh patuk, pandiak, sraiy ia dhung. Tuk nan meda menyum dom janih jru pandiak bo kol drei hu blei caik caga di sang. Dalam labik daok karei praong pataom rilo menuac taong ruak, dom F0 oh hu triệu chứng jeng oh cang menyum jru hagait. Praong abih lac tui iek prein yava, khik caga ka urang oh pambak ruak tabiak bhap bini.

Hu dom menuac daok ngak rilo bruk klung pabah meng ia sara. Kayua huac jit nan ye klung pabah meng ia sara, xịt tame tarakaong biak rilo mbang. Dom bruk ini meyah ngak rilo meda ba tal pandik tarakaong, tuk mboh pandik tarakaong ye sahneng lac drei njauk COVID-19. Nan oh ka ndom tal bruk klung pabah meng ia sara ba tal tagok darah, pandik akaok… Nan ye pacang caga njauk, mbiah, klung pabah meng ia sara sinh lý, ia pandao, ia jru pametai anek ruak di tarakaong... dom mbang ka nyu lagaih.

# Bác sĩ hu kaei hagait tuk iek glang prein yava ka urang daok karei di sang?

Bác sĩ Trương Hữu Khanh javap jalei: Urang daok karei di sang brei mbang menyum ginup, khik hacih sa-at rup pabhap. Abih di nyu lac jaman brei haci hacih. Urang daok karei di sang meda mboh ruak trak jang meyah njauk vi khuẩn, virus mbang tame. Kayua yau nan ye, brei mbang hacih, menyum hacih, sang danaok hacih sa-at laneng lahei, rao tangin gam gam ye oh mbuan njaom mbak. Daok jru bổ, thực phẩm chức năng meda pabak tame min jhui rilo, kayua nyu ba mai siam lagaih ka hatai sahneng rilo jang ./.

Urang lang: M. Phuong – 14/11