Dom harei puac bilan 8, bruk jit ruak Covid-19 di dom tỉnh gah Maraong rah tabiak sraw kadau, di tỉnh Kon Tum hu 21 mbang urang mai meng bhum hu jit ruak dương tính saong SARS-CoV-2. Anak bruk jit ruak meda mbuan njom mbak dalam bhap bini, Taha palei A Bơ, Bí thư Chi bộ Palei  Tua Tem, xã Đăk Long, huyện Đăk Hà bhian nao tal yaok baoh sang pathau khan, tacei pato bhap bini puk ramik labik daok hacih, pandar ia sat khuan, cuh pataih pacang mbaok tuk tabiak jalan saong brei khan njauk tuk  hu anek kamuan atau gauk gar mai meng bhum jit. Yaok panuac ndem meyai di taha A Bơ, bhap  bini palei Tua Tem jeng kanal hadar saong ngak tui.

Tuk hu tangi sua “ilamu” ka bruk pathau khan, jak ba hu siam rilo, taha A Bơ klao sabai lac: “Oh hu hagait karei halei, drei sangka, kuhria ka mikva ye mikva thau hatung hatian di drei. Dahlak nao tal yaok baoh sang piah pathau khan ka mikva, abih di nyu lac jalan sahaneng, jalan ngak piah patagok bruk ngak mbang. Ngak habar padang raidiuk ilamu dalam palei, bhap bini thau ngak mbang, raong glang, pala drak, blaoh bac megru piah dak harei dak tagok.”

Thun ini yaom lac yam tapa umo 70 thun, min Taha palei, Bí thư Chi bộ A Bơ harei harei jeng daok hu mbaok, tuk mboh di puk angaok, tuk trun puk ala. Meng hatung hatian abih drei ka rahra, ye ilamu  di sa urang bhian lac gru pato, urang khik ramik sang bac jeng hu daong ka taha biak ralo. Hu ilamu pato pakai gam saong ndom puac, langyah gheih jalan ngak di Đảng, di Karja, taha A Bơ hu khan brei mikva thau biak samar, biak mbuan thau.

Yau bruk peih ngak sarak patagok parilo urang Đảng dalam bhap bini hu agama, Chi bộ palei Tua Tem bo taha ngak Bí thư hu 11 urang đảng ye 10 đảng lac urang hu agama. Dalam peih ngak Sarak 05 di Mentri Chính trị “ Ka Jhul khang bruk bac megru saong ngak tui jalan hadah krah siam mekre di Ho Chi Minh”, Chi bộ palei Tua Tem tuk halei jeng ba kok nao dahlau dalam 9 Chi bộ di Đảng bộ xã.

Patagok bruk ngak di drei, Taha palei, Bí thư Chi bộ palei Tua Tem A Bơ hu rilo rik daong ka bruk cak rok patagok di palei jeng yau di xã Đăk Long. Dahlau di ini 7 thun, tuk xã  Đăk Long hu padang tabiak, baoh sang iek lipa kathaot rambah meblah labaih 73%. Harei ini, baoh sang nan trun daok 37,2%. Dalam bruk cak rok patagok kinh te, taha palei A Bơ gam ba akaok nao dahlau, gam klah rabha ilamu, tacei pato mikva ilamu pala, iek sangka phun caphe, cao su; caga ruak ka limo kubao, patagopk taphon pabui hlai…Ong A Sự, Akok UBMT Negar Việt Nam xã Đăk Long brei thau, palei Tua Tem hu 125 baoh sang urang bangsa  Xơ đăng, taha A Bơ lac urang ba akaok dalam patagok bruk jum pataom, ieu pataom bhap bini, lac kareih camin hadah di baoh sang saong bhap bini.

Gam saong raidiuk bhap bini dak harei dak hu salih birau, dom thun jaik di ini, di xã Đăk Long, huyện Đăk Hà, tỉnh Kon Tum, meng hu dom urang ba akaok yau taha A Bơ, rilo ilamu siam gheih meng kan di urang bangsa Xơ đăng hu khik ramik, patagok. Xã Đăk Long hu 5 palei ye taong abih dom palei jeng padang hu Sang rông njauk tui ilamu meng kan di amuk kei urang Xơ đăng, hu labik ngak adat, hu labik bac da-a ka bhap bini. Dom kapol main kong chieng, tamia xoang hu khik ramik saong patoa veik  ka dom rairah dam dara. Dom bruk ngak meng kan yau pak yot, menyim khan bai…daok peih tabiak jalan lagaih ka urang Xơ đăng  di labik ini patagok kinh te./.

Urang lang: A.Nghiem-30/8/2021