Pathau mikva saong taong abih gauk! Labaih 15 thun ngak bruk dân vận, pambuak kajap saong bhap bini di dom buôn, taha palei Y Hơ Ê Ban (bhian ieu lac ây H’Nhap), daok di buôn Knia 4, xã Ea Bar, huyện Buôn Đôn, tỉnh Đắk Lắk hu bhap bini jia tui saong iek praong. Ong jeng lac urang rik daong khik ramik ilamu Ê Đê tapa bruk peih tal pato me-in alat ragam meng kan ka rai rah ranaih. H Xíu, urang vak di rayo sap ndom VN daok di Tây Nguyên hu khan ka ong.  

Baoh sang praong jaik 100 m2 di amí Na Sa, daok di buôn Knia 4, xã Ea Bar, huyện Buôn Đôn, tỉnh Đắk Lắk barau hu ngak bloh di akaok thun ini. Langiu bruk kham merat di abih menuac dalam sang, nyu daok hu meng bruk jak ba di taha palei Y Hơ Ê Ban. Amí Na Sa hadar veik, dahlau daih, kayua pang tui panuac pachot ka rai diuk sanang sane di negar langiu, kurang thau nan ye diuk pasang saai vượt biên tapa campuchia. Hadei di dom harei daok rambah rambup dalam glai, diuk pasang saai hu  mai veik palei. Tuk nan, kayua hu taha palei Y Hơ bhian tapa rivang, pachreih ba, 2 diuk pasang meng thau hu, kham merat ngak mbang, patagok kinh tế.

 “Drei pang urang pachruh pajak, oh thau hagait, tok mehit lac hu nao Mỹ, oh ngak bruk glaih glar bo hu kaya meda mehit yau nan drei nao tui…”

Oh eng hagait sang amí Na Sa, buôn Knia, xã Ea Bar jeng hu ralo menuac kayua pang tui panuac pacuh pajarak, hu mbaok tame bruk ngak brei srau kadau puk palei, vượt biên sung hukum. Taha palei Y Hơ Ê Ban saong urang jakar dom pakat ralo mbang mai tal sang ndom meyai, tacei jalan siam. Tapa nan, livik livik harei daong ka bhap bini thau bruk siam saong ngak tui. Ong Y Sen Kbuôr, akaok UB bhap bini xã Ea Bar, huyện Buôn Đôn brei thau, karja palei tuk halei jeng taong yaom glaong dom rik daong di taha palei Y Hơ:

 “Ong lac taha palei abih hatung hatian hong mikva. Ka sa, ong pathau khan jak ba mikva ka bruk an ninh chính trị di puk palei. Ka dua ong jeng hu rik daong dalam bruk pasiam veik ilamu banagsa…”

Thun ini umo labaih 70 thun, min taha palei Y Hơ jeng abih hatai jai saong bhap bini di dom puk palei. Ong daok kham merat khik ramik ilamu bangsa Ê Đê tapa bruk peih tal pato me-in dom janih alat ragam banagsa ka rai ranaih. Meng thun 2004 tal urak ini, hu labaih 100 ayut ranaih hu ong tacei pato, dalam nan hu rilo urang me-in naih ralo janih alat ragam bangsa, hu mbaok parang me-in duh ka tuai damuai di dom labik DL. Ong khan lac, ong biak iek praong ilamu di bangsa saong mboh lac meyah oh hu pato veik ye mbuan si lahik nao.

“Dahlak ngak bruk dân vận hu 15 thun, urak ini padeih ye, min rup dahlak, dalam akaok saneng di dahlak tuk halei  jeng sangka tal bhap bini…”

Tỉnh Đắk Lắk urak ini hu 446 urang hu pok ngak taha palei , dalam nan hu 398 urang gam ngak akaok palei, akaok buôn. Dom urang yau taha palei Y Hơ lac urang hu angan je dalam dom puk palei, lac talei pambuak bruk di pakat ủy, karja saong mikva, rik daong tame bruk khik kajap an ninh chính trị, dak padang puk palei dak harei dak salih barau./.