Labaih pluh thun dahlau, sang taha Ríp (bangsa Ba Na) daok pak palei Dzng Rơ, xã Kon Gang, huyện Đác Đoa, tỉnh Gia Lai lac sang biak kan kathaot di palei, di xã. Meng hatai kham merat yam tabiak truh kan kathaot saong thau yam tapa kan kandah, urak ini sang taha Ríp oh lac yam tagok ngak meda bo daok jeng sa dalam dom mô hình patagok kinh tế tiêu biểu di puk palei. Dalam kadha “Kareih camin palei negar” harei ini, daa mikva saong taong abih gauk pang kadha vak angaok Báo Nhân dân brei thau ka kareih camin ngak mbang naih jioy ini:

Taha Ríp thun ini jaik 60 thun, taha urak ini daok lac kareih camin dalam bruk ngak mbang piah ka mikva dalam palei Dzng Rơ ngak tui.

Hadhar tal tukvak kan kandah di sang drei ngan haong pluh urang anek, taha lac: gaok tuk mai, dua klau adit sang meng hu van lisei huak trei. Ngak miat bo oh ginup mbang, nao nyim mesre miat mboh rambah ralo, taha khang hatai salih bruk pala drak oh hu kein laba tapa dom janih phun hu yaom kinh tế glaong jang. Pala cà-phê mboh jeng, pala iek amariak kalu mboh jeng, taha khang hatai peih prong mblang taneh pala amariak kalu. Saong hatai caong khin ngak meda di taha hu jeng biak. Meng dom gheng pala amariak kalu, blaoh tal yaok rituh gheng, urak ini sang taha Ríp hu  1.200 gheng amariak kalu hu pala dalam bein taphia sang. Taha Ríp pala hareik lamen raong limo, van limo 5 drei hu taha buh jien padai, pren yava tame iek glang, mek khak limo piah buh ka bein amariak kalu di drei. Mong bein amariak kalu that hijao, yau brei mboh dahlau ka sa mùa bội thu, taha kuhria dalam hatung lac: "Gam haong 4 ha cà-phê saong raong limo, thun ini jien mek tame labaih 400 triệu đồng". Taha klao lac, dom thun ini mai, jien mek tama grap tanat meng bruk raong glang, pala drak.

Sua tangi ka ilamu yam tapa kan kandah piah ngak meda, taha Ríp ndom lac: kham merat hu mbaok tame dom tal pato pathram ka phun pala, raong glang di xã, huyện peih tabiak; nao bac megru ilamu di dom labik karei, saong duah tapuk, báo piah bac piah thau ka dom jalan ngak mbang ba mai kein laba ye ngak mblah tui... Kadha praong di abih nan lac, thau salih phun pala, khang hatai buh jien tame pala phun amariak kalu, phun hu mong yau phun ngak meda angaok bhum taneh Tây Nguyên.

Phaok Akaok Uỷ ban bhap bani xã Kon Gang Phạm Văn Hảo brei thau: "Meng dom ilamu ngak mbang naih jioy di drei, taha Ríp hu jak ba, daong brei,  tacei pato mikva dalam palei ngak mbang, tabiak truh kan kathaot yam tagok ngak meda. Taha Ríp daok abih hatai dalam dom bruk xã hội di puk palei saong lac urang pambuak pagam talei gul pataom mikva dalam puk, dalam palei". Thun 2014, taha Ríp hadah mbaok meta hu nao pathau khan điển hình di huyện Đác Đoa ka kareih camin ngak mbang naih jioy./.