Oh kuhria pandiak atau hajan, yaok page harei 7? yaok adit, anai sinh viên Đỗ Thu Hà jeng hu mbaok di Kapul urang sup meta Quận Cầu Giấy piah pato sap Anh oh mek jien ka dom adei sit sup meta. Tal bac di anai Hà biak karei tuk anai saong anek saih jeng oh maong mboh mbaok gauk. Min tal bac tuk halei jeng bak hatai anit ranam gauk di dom urang hu thar vak yau gauk. Baoh hatai di urang dang pato bac saong dom anek saih dalam tal bac nan jeng hu sa hatai jia khang tame  rai diuk. Meda lac kayua nan ye, dalam labaih sa thun tapa, labaih 10 anek saih di tal bac ini oh ka thei padeih bac mbang halei. Tui nan, harei ini tapa harei diah, anai gru Thu Hà ba dom adei nao tapa sup melup, khang hatai yam tal harei hadei.Adei Vũ Đức Khiêm – Anek saih di tal bac ini, lac: “Adei bac haong gru Hà hu 4 bilan paje, anai pato biak gheih. Anai pato ka khaol adei meng yaok panuac, tal tuk kaol adei kanar hu meng luai. Adei caong hu bac haong anai gru ralo jang.”

 Ndih tapui tabiak siam mekre yau dom uranih karei, min tuk umo 7 thun, Hà njauk thoái hóa võng mạc, livik livik harei oh daok mboh hagait. Min meng hatai anit ranam di gauk gar adei sa-ai dalam sang saong ayut sahabat, Hà var nao bruk sup meta di drei saong diukrai siam mekre haong rai diuk bahrau. Tal urak ini, Hà nao mai daok dang yau menuac oh sup meta, saong daok daong hu amaik ngak ralo bruk dalam sang meng tahanek lisei, puh ramik sang danaok tal papah khan ao … Dalam bac da-a, meng kham merat abih drei, Hà tuk halei jeng mek hu thành tích glaong. 12 thun gam, Đỗ Thu Hà thun halei jeng mek hu angan anek saih naih jioy, mek hu ralo giải thưởng dalam mbang pakacah anek saih jioi Văn pakat cụm Hoàn Kiếm. Abih di nyu nan lac, tal nac 11, Hà hu mbaok tame pakacah thách thức Công nghệ thông tin brei ka urang jaoh jo bhum châu Á -Thái Bình Dương saong mek hu giải 3. Lingiu di nan, Hà daok lac thí sinh duy nhất hu palih ruah tapak tame sang bac Đại học Ngoại ngữ meng bruk bac da-a di drei.

Ngan haong menuac siam mekre, piah bac joi sap Anh lac bruk kan, daok ngan haong urang sup meta ye kan jang biak rilo mbang. Yau nan min, Thu Hà tuk halei jeng dang akaok tal bac ka bruk bac da-a, abih di nyu nan lac môn sap Anh. Hà hu mbaok tame bac biak ralo tal bac  kỹ năng brei ka urang sup meta, kỹ năng pato pakai ka anek saih biak karei.  Piah hu rilo jang ilamu dalam bruk pato pakai, Hà daok eng drei bac megru meng dom anai gru cei gru, nyim adei sa-ai blei sách báo ka dom asal kadha chuyên ngành, kiến thức xã hội blaoh nyimurang puac piah thu băng, hadei di nan vak tabiak chữ nổi, pataom mek ilamu piah pato pakai ka dom adei. Thu Hà khan lac: “Tuk drei caga tài liệu ka dom adei bình thường ye drei tok taong mac bloh in tabiak. Daok dom adei sup meta ye drei njauk vak angaok ba-ar nổi ka adei nan. Drei nao tal labik nan, caik tangin adei tame akhar nan, tacei pato adei jalan puac, jalan vak saong makna di akhar nan.”   

Meng kham merat abih drei di umo ranaih, abih di nyu lac hatai anit ranam di dom urang hu thar vak yau gauk, Hà saong dom anek saih di drei samar klah rabha haong gauk. Mong dua palak tangin gilun nao gilun mai angaok yaok baoh akhar nổi dalam tapuk pato ka dom adei, meng mboh cảm phục nghị lực di anai gru daok ranaih umo ini. Tapa nan, kadha bo dom adei sit taduan hu meng anai gru di drei oh lac akhar haroh saoh, bo daok lac pren khang yam tame raidiuk, hatai jia oh tuk halei taduan lah kan kandah. Ong Nguyễn Văn Đức – Phaok akaok Kapul urang sup meta Cầu Giấy brei thau:  “Hà bahrau tame Hội hu labaih 1 thun min mboh adei biak abih hatai haong bruk ngak di Hội, daong  ka dom kamuan bac sap Anh. Dom kamuan nao sang amaik ame sua tangi saong mboh anek drei bac da-a siam nan ye biak takre. Tapa nan, Hội jeng daong labik pato, saong daong brei abih dom hagait Hà caong khin dalam bruk pato pakai.”

Vil val rup di Hà urak ini oh daok me-om sa sambo màu juk. Thu Hà daok hu dui ba dom thar vak oh patuah dalam rai diuk, gam saong adei yam tapa sup melup meng dom bruk ngak sit sot min bak makna siam mekre./.