Tal bac caluai ia di danao ia mblang bein Lê Thị Riêng, quận 10, ban raya HCM 

Tal bac caluai ia oh mek jien ka adei uranaih matui madar, daok ban glai ban klo di danao ia mblang bein Lê Thị Riêng, quận 10, ban raya HCM di masup page puac adit tuk halei jeng bui sambai. Sap klao chrieh bui ngak brei hadah tagok mbaok meta di dom adei uranaih matui madar, daok ban glai ban klo. Nan jeng lac pandap alin hadaih ndung bak rilo hatai anit ranam bo kapul “caluai haong dom ayut” ba mai ka dom adei dalam labaih 2 thun ni mai.

Saai Lương Ngọc Duy, dahlau dieh lac vận động viên caluai ia di kapul pacacah pakat negar, hu 27 thun pambuak saong bruk pacacah, lac sa dalam dom urang dang pato. Saai Duy brei thau, bilan 2/2018, dalam sa mbang nao rivang sa baoh sang di baha Diệu Giác, quận 2, mboh dom adei sang kan kandah saong jaik abih dom adei oh thau caluai ia, nan ye caong daong dom adei pabak dom ilamo piah daong khik caga rup drei eng. Saai Duy jia lac bac caluai ia jeng lac jalan daong ka dom adei mboh bui sambai, khang hatai jia jang dalam raidiuk: “Tuk camriep ye kapul gaok rilo kan kandah kayua kurang danao caluai ia, min urak ni hu gru Phạm Hữu Tâm di liên đoàn thể thao ala ia di ban raya HCM daong ka dom danao caluai ia, nan ye kapul hu pato caluai ia oh mek jien di rilo danao caluai ia di ban raya HCM”.

Tal urak ni, kapul "caluai saong dom ayut " hu pato caluai ia oh mek jien ka 800 ranaih meng 6 thun tagok. Dom adei hu pato lý thuyết caluai ia cơ bản, pasram caluai ia ala ia, jalan langyah tuk gaok bruk kan kandah. Rilo adei tuk tapa tal bac blaoh jeng eng drei caluai biak naih, taom gaok ndom puac jeng gheih jang.

Adei Vũ Trần Đăng Khoa, 10 thun, mai meng sang anit ranam Ánh Sáng, quận 3 brei thau lac, adei biak takre bac caluai ia min kayua lac uranaih matui madar nan ye oh hu jien nao bac yau dom ayut samu umur haong gauk. Kayua yau nan ye tuk hu mbaok tame bac di kapul "caluai saong dom ayut ", Khoa biak uan tabhuan: “Adei biak takre bac caluai ia, bac caluai ia di labik ni adei mboh biak bui sambai kyua hu main haong rilo ayut, hu thau caluai ia, hadei 2 bilan bac urak ni adei thau caluai ia”.

Jeng hu bui sambai yau adei Đăng Khoa, adei Phạm Trường Duy, mai meng baoh sang anit ranam Ánh Sáng, quận 3 brei thau: “Nan lac mbang camriep adei bac caluai ia, dom cei, nai pato adei caluai, urak ni adei caluan hu ye, hu main haong dom ayut nan ye adei biak bui sambai”.

Ayut Lê Nguyễn Thanh Tâm, sa urang dalam kapul "caluai saong dom ayut khan lac, oh hadar abih dom bruk sambai dalam luac vaktu hu mbaok tame pato caluai ia ka dom adei sit. Mbang camriep rilo adei huac oh khin trun ia, yaok urang njauk duah abih jalan piah ngak brei dom adei mboh sahanang hatai. Dom adei bac suai, bac dahlau var hadei min puac abih jeng thau caluai dalam bruk uan tabuan di nai gru, cei gru: “Tuk mboh dom adei yaok harei pasram megru, yaok harei dom adei praong tagok, blaoh dom adei meng oh thau caluai jeng caluai hu nan lac bruk bui sambai di drei dalam raidiuk. Drei bhian main haong dom adei nan ye jeng daong ka dom adei mboh jia tame rup drei jang saong hu rilo bui sambai dalam raidiuk jang”.

Urak ni, kapul "caluai saong dom ayut" daok pato caluai brei saoh ka uranaih anek matui di dom danao caluai ia yau ye: Nguyễn Thị Minh Khai, Yết Kiêu, quận 1; kalup kapul caluai ia Chánh Hưng, quận 8; danao caluai ia Hải Quân, quận Bình Thạnh; danao caluai ia di pasak pasram rup pabhap Thủ Đức, mblang bein Lê Thị Riêng - Quận 10. Anak tal, kapul meda pambuak gauk peih ka dom adei main ngoại khóa, bac viek ka ilamo pasram rup pabhap piah cak rok patagok rup pabhap. Dom bruk sit min biak hu makna, ngak pambak tabiak rilo bruk siam mekre dalam rahra./.

Urang lang: Thu Thảo – 03/08