Ban raya HCM hu peih prong bruk mek mẫu dut iek meneing di mblang radeih

Tal mesup ini (17/2), hu 40 tỉnh, ban dalam taneh ia brei anek saih dom pakat padeih bac hadei di Tết piah pacang caga Covid-19. Dom tinh ban hu panuac ieu sang bac peih pato saong bac tui njauk danak dak thun bac 2020-2021 tui jalan lagaih, rilo meng lac pato online. Mintri pato megru brei thau, dalam taneh ia hu 9 anek saih, SV saong 1 gru njom Covid-19. Dalam mbang jit ruak akaok thun 2020, labaih 22 triệu anek saih, SV dalam taneh ia njauk salih tapa bac online, tapa rayo papar binguk jaik 3 bilan.

Harei ni, ban raya HCM hu peih prong bruk mek mẫu dut iek meneing di mblang radeih, mblang kapal. Bruk pasang iek urang mai meng bhum jit dalam negar tal ban raya HCM hadei di tuk Tết hu peih ngak meng harei 14/2, ngan song 2.147 mẫu hu mek meneing di mblang kapan haoh, dalam nan 1.607 mẫu âm tính, 540 mẫu dok cang kết quả. Ban raya HCM jeng hu peih labik brei dok karei ka nyaom urang mbuan si njom glong mai meng bhum jit, caga taduan urang brei dok karei.

Kreik pabah mbang di mbang giao dịch mesup akaok thun sak kubao 2021 (17/2), darak pasar chứng khoán Việt Nam mboh hu siam lagaih tuk abih 2 sàn jeng hijao. Chỉ số VN-Index tagok 27,85 điểm, jeng 1.142,78 điểm tuk kreik pabah mbang. Abih sàn hu 366 mã tagok, 70 mã trun saong 44 mã dang yaom. Abih tih yaom giao dịch mbang akaok thun hu biak glaong, labaih 9.600 tỷ đồng di abih 2 sàn giao dịch. Abih di nyu nan lac, gah đầu tư taneh ia lingiu blei angaok Sở Giao dịch chứng khoán TPHCM labaih 344 tỷ đồng.

Jala pandiak harei ni (17/2), Bộ chỉ huy Bộ đội Biên phòng Bình Thuận brei thau, urak ni dok 2 urang tong ikan angaok kapan ikan gaok bala dok lahik, nan lac thuyền trưởng Lê Văn Một song sa urang tong ikan angan Trần Văn Bé. Sruh kapan tong ikan số hiệu BTh 89272 njauk riyah khang, hangin prong tong kram di beir harei 15/2, tuk ni angaok kapan hu 7 urang tong ikan. 2 urang hu dong sraong tagok, hu ba tame sang iek ruak. Daok atau di 3 urang metai hu kak tame dom phao bè, thung katak palao seik angaok tasik, urak ni oh ka duah mboh.

Tal mon 11 meteh jala harei ini 6 bingun Tết, gah daong duah menuac njauk bala Công an TP Thủ Dầu Một, tỉnh Bình Dương hu duah mboh 2 adei sit metai di sa danao ia daok gah likuk labik ngak kong. Tui panuac khan, mesup harei nan, sa kapul adei sit umo meng 5 tal 13 thun tabiak labik danao ia daok di gah likuk labik ngak kong Đại Đăng piah me-in sambai. Pak ini, 3 adei oh patuah blait takai laik trun ia, tok hu 1 adei kumei umo 13 thun caluai tame hu. Danao ia ini daok di labik joa menuac, jaik tapen TP.Thủ Dầu Một haong ban sit Tân Uyên, bhian rah tabiak rilo mbang mblung ia.

Tui blah yaok pataom dunya Worldometers, kuhria tal mesup 17/2, jit prong Covid-19 njom mbak ruak ka labaih 110 triệu urang, ngak brei labaih 2 triệu 420 rabau urang metai. Yaom lac mboh hu trun khang bruk njom mbak di virus corona, min Mỹ jeng dok dang akaok angan dom negar njauk jit ruak, patui di nan lac Brazil. Dalam tuk nan, Anh hu duah mboh biến thể nCoV bahrau biak jhak hu angan B1525 meng langyah bộ gien di 10 negar. Tal urak ni negar Anh hu 32 urang njom janih virut ni.

Sa Cty Một padang mbang ngui hu angan ieu lac BioSerenity pambuak bruk haong dom urang ilamu Prang bahrau roh duah, patagok hu sa janih khẩu trang y tế meda halang saong pametai hu SARS-CoV-2 jeng yau dom biến thể di virus. Dalam 5 minit camereip, pataih pacang mbaok nan halang hu tal 99,9% virus; dalam 2 mon camereip, dom vi rút hu halang lac 99,96%. Anak meta, rahra Prang meda kakei blei hu janih khẩu trang y tế bhian pandar meng harei 16/2, dalam tuk cang janih pataih pacang mbaok siam jang, tui kuhria lac meng harei 22/2.

Harei kabroi (16/2), ceik apui Etna di palao Sicily di Italia – boh ceik pui dok ngak bruk glong abih di châu Âu nyu pruh nham thạch gam thun mun par glong tagok langik. Urang jakar Italia brei kreik pambah mbang mblang kapan haoh dunya di ban Catania kayua haluk patau song bau dhan thun mun pacang kaveik meta mong, saong daok brei pasang iek catang di 3 palei ala takai ceik pui. Mbang jiak di abih ceik pui Etna pruh tabiak lac thun 2017 song mbang pruh khang di abih lac di thun 2009./.

Urang lang: M. Phương – Hani Pha – 17/02