Kubo liệt sĩ tỉnh Kiên Giang jao brei bruk dut iek ADN talang duah angan je di 27 liệt sĩ di Trung đoàn 20,Quân khu 9

Hội đồng jien bilan negar birau pathau khan tagok Rajaei, likau brei khik bruk bayar jien bilan biar abih yau urak ini tal thun abih 2021. Hội đồng jien bilan negar taong yaom, bruk ngak tabiak pandap panda, pablei salih di dom daonh nghiep daok gaok rilo kan kandah. Hadei tukvak rilo doanh nghiep tuk ngak tuk padeih dalam quý I, ye camereip trun dalam quý II, quý III. Yau nan ye, urang ngak, doanh nghiep saong Karja klah rabha ka gauk dom kan kandah saong ngak brei raidiuk urang ngak hu tani tanat; ba mbuan lagaih ka doanh nghiep yam tapa kan kandah, piah pabah prein khang pasiam veik dom kan kandah di jit ruak Covid-19; gam tui nan, jeng ba mbuan lagaih ka urang ngak hu bruk ngak, atau hu mbuan lagiah piah tame ngak bruk gilac veik.

Tal tuk vak ni, ban  Đà Nẵng hu bayar jien  an sinh xã hội tui sarak  42 di rajaei song sarak 15 di Thủ tướng rajaei ka jiak  117 ribau urang saong yaom jien abih tih labaih  124 tỷ đồng. Langiu di dom urang nan, Đà Nẵng dok hu dong ka dom urang  mbang tui sarak  di  Hđbhap bini ban Đà Nẵng ka labaih  2.500 urang saong yaom jien abih tih labaih  3,2 tỷ đồng. Ủy ban Mặt trận negar dom pakat  di ban Đà Nẵng bhain peih bruk pasang iek, ngak catang bruk bayar jien ni . Dom phuong, xa hu khan brei thau cambaih laih angan dom urang hu daong nan, patagok bruk pasang iek di bhap bini ka urang halei hu mbang tui.

Harei 30/ 8, di taneh Kubo liệt sĩ tỉnh Kiên Giang, Mentri Lao động - Thương binh saong Xã hội pambuak saong tỉnh Kiên Giang peih bruk brei thau, jaok brei bruk dut iek ADN talang duah angan je di 27 liệt sĩ di Trung đoàn 20, Quân khu 9 var klak rup drei ka taneh ia tuk mesruh metak saong kol Mỹ daong taneh ia. Nan lac dom urang liệt sĩ palei di Hải Phòng, Nam Định, Ninh Bình, Thanh Hóa, Hà Nam, Lạng Sơn, Hải Dương, Bắc Ninh, Hòa Bình, Nghệ An, Phú Thọ. Cục urang buh prein yawa ka taneh ia, Mentri Lao động – Thương binh saong Xã hội jao brei sarak dut iek ADN thau ka angan je  talang liet si ka gauk gar di dom urang nan.

Harei  30/8, di ban raya  Hồ Chí Minh, Ủy viên mintri  Chính trị, Phó Thủ tướng Thường trực Chính phủ Trương Hòa Bình hu mai rivang, tadhau yhut dom urang pal akaok  Giáo hội Phật giáo Việt Nam song bhap bini  Phật tử di tuk uan roya Vu Lan - báo hiếu (PL 2564 ). Phó Thủ tướng Thường trực Trương Hòa Bình ndom lac, Phật giáo di  Việt Nam meng di tuk tabiak rai tuk halei jeng nao gam song bangsa  jeng sa bianah oh meda kurang hu di dakrai bangsa. Makna siam mekre di bilan  Vu Lan- báo hiếu biak lagaih song ilamu meng kan di bangsa ka bruk pok kakuh ong muk, ong kei, padang talei rohim boh sang meng kan khang kajap rik dong tame bruk dak padang taneh ia meng dahlau deih mbiah tal urak ni .

Sang iek ruak Chợ Rẫy hu taduan saong jru ruak ka 5 urang ruak metai jalan suak yawa hadei tuk mbang pandap pate dalam pa-op di Minh Chay. Tapa dut iek vi sinh di Viện Vệ sinh dịch tễ ban raya HCM mboh hu vi khuẩn  Clostridium botulinum. Urak ini, abih 5 urang nan iek ruak meng mac suak yawa; salih 5 mbang darah harei salih harei padeih saong prein yawa hu siam jang, Sang iek ruak kakei bhap bini brei khik hacih sa-at pandap mbang, mbang dom janih taneh riak tatthak. Plaik njiak dom pandap mbang caik pa-op ngak meng tangin oh tapa tiệt trùng. Mban khik iek pandap mbang hacih sa-at daok tacei pato ka Cục khik iek pandap mbang hacih sa-at pasang iek saong brei mek dom pandap nan.

Hadei di tuk tatuak drei ka bruk likau padeih ngak di  Thủ tướng Japon  A-bê Sin-dô (Abe Shinzo ) Harei sut adit dahlau  (28/8), bhap bini dok caik hatai mong tame mbang pakacah tagok ngak  Chủ tịch Đảng Dân chủ Tự do , jeng hu makna lac tagok ngak  Thủ tướng salih ka ong Abe. Đảng Dân chủ Tự do hu ieu pataom sa mbang ginum biai  Quốc hội lâm thời dalam harei  17/9 anak tal piah palih ruah  Thủ tướng bahrau ka Japon. Thủ tướng bahrau taduan ngak luac tuk vak dok veik labaih  sa thun  dalam vaktu di Thủ tướng Abe. 

Mbiah tal 6h page 31/8 tui tukvak Việt Nam, abih tih urang njom ruak SARS-CoV-2 jalan suak yawa iew lac Covid-19 di dunya lac 25.374.149,  dalam nan hu  850.047 urang metai.  Dom taneh ia jeng hu mboh 17.696.093 urang dhit ruak, urang ruak trak lac 61.373  saong 6.827.891 urang ruak hu daok kham taong ruak. Ấn Độ urak ini lac taneh ia hu rilo urang njom ruak birau saong metai kayua Covid-19 tagoik samar abih di dunya , yam tapa Mỹ saong Brazil -  lac dua negar hu jaik  40% dalam taong abih urang ruak di dunya. Dom urang ilamu brei thau, dom urang njom Covid-19 di Ấn Độ tagaok khang dalam tukvak tapa kayua 3 bruk lac pakhang bruk dut iek, peih pabah mbang gilac veik bruk ngak mbang saong bhap bini takik caga ruak.

Tui jalan ngak hu rajei Prang brei thau adit dahlau, tong abih sang bac di negar Prang hu peih pambah mbang piah taduan jiak  13 triệu anek saih dalam harei 1/9, yaom lac bruk njom mbak  virus dok rah tabiak di Prang.  Akaok pato megru  Prang Jean-Michel Blanquer brei thau, gah pato megru Prang  caga ka thun bac bahrau min oh  lac tong abih dom tal bac jeng peih pambah mbang veik hu siam mekre , abih di nyu nan lac, di 2 ban prong abih di Prang  lac ban ine  Paris song ban  Marseille.  Nan ye tui ong  Blanquer, negar Prang njauk ramik caga kreih pambah mbang sang bac halei tuk njauk kreih. Bruk njom mbak  virus Sars-CoV-2 di Prang  dok di tanut glong , meyah hu patrun hasit dut song puac adit tapa. Yau ye dalam harei  so 30/08, negar Prang dok hu  5413 urang njom bahrau./.

Urang lang: Ái Nghiêm – Hani Pha – 31/08 10:33:53