Sa asal kadha prong hu Trung ương ginum biai, brei panuac di Nyaom biai mbang ni, lac bruk pasiam veik, pabak  quy định ka 47 thun 2011 di  MBan Chấp hành Trung ương ka dom bruk urang Đảng oh brei ngak. Brei panuac di nyaom biai Trung ương 4 (mbang 13), Tổng Bí thư Nguyễn Phú Trọng ndom lac dom quy định ka dom bruk  urang đảng oh brei ngak meda lac dok lagaih, min dom kadha di anak meta ka oh ginup cambaih laih, hu asal kadha kan pandar, ngak kan kandah tuk pasang iek bruk ngak suan di urang  Đảng brei pabak, pasiam veik. Tapa 10 thun peih ngak sarak Trung ương 4 mbang 11 song mbang 12 brei mboh lac dom bruk suy thoái, tiêu cực di urang jakar, urang đảng, công chức, viên chức ngak suan hu mboh song hu langyah. Ni lac jalan piah ka Trung ương duah thau, palih ruah dom bruk cambaih laih piah pabak tame Quy định ka 47 pabak bruk padang ngak, paglong chất lượng kapul urang jakar,  urang đảng dalam tuk vak bahrau.

Ban raya HCM urak ini hu jaik 100.000 anek saih daok gar veik di dom tỉnh, ban tuk nao palei padeih hè atau hu amaik ame payua nao palei palaih jit COVID-19. Tui tacei pato bahrau abih di Sở Jalan mbak Pajeng ba TP.HCM,  urak ini rahra meda tut angaok taduan raok anek meng dom tỉnh mai veik ban raya. Sở meda pasang iek langyah saong khan brei thau bruk nan tapa email dalam 48 mon kuhria meng tuk taduan hu harak đơn. Pambuak tal bruk nao mai di uraniah tuk dom ban peih pabah mbang veik, lambaok Mintri Y tế brei thau, uranaih ala 18 thun oh ka hu klauk vaccine caga COVID-19, nan ye meyah oh hu bruk samar drah hagait, njauk plaih ka anek naih tabiak jalan.

Mintri  Y tế bahrau brei thau tui pathau khan di dom tỉnh ban meng akaok thun tal ni  dalam negar hu  50.473 urang ruak pandiak tabiak drah, dalam nan hu 18 urang metai. Glong abih lac Bình Phước  hu  6 urang metai. Dut song tuk vak ini thun  2020, urang njom trun, min urang metai tagok  5 urang. Mintri  Y tế khan lac urak ni dok lac tuk jit ruak pandiak tabiak drah. Urang njom yaok adit daok tagok, abih di nyu nan lac di Hà Nội song dom  tỉnh ban gah merong. Cục Y tế pacang caga (mintri Y tế) hu ieu sở y tế dom  tỉnh, ban di trung ương pataom tame tacei ba bruk pacang caga jit ruak pandiak tabiak drah pak di labik, oh caik ka jit rah tabiak, pambak khang, dui atah, patrun patakik  di abih urang metai.

Cục Pajeng ba jalan kapal haok Việt Nam brei thau, daok caga brei par veik 10 jalan par, lac jalan par di TPHCM haong dom tỉnh: Thanh Hóa, Khánh Hòa, Phú Yên, Bình Định, Phú Quốc, Thừa Thiên-Huế, Nghệ An haong jalan par Thanh Hóa haong Khánh Hòa, Buôn Ma Thuột, Phú Quốc. Dom jalan par hu peih veik hadei di tuk hu panuac njauk hatai gauk di dua labik par nao saong mai, dom mblang kapal haok pambuak tal jalan par. Dalam tuk camereip, tuai agaok kapar haok brei daok atah di gauk.

Yaom lac dok huac kanda min rilo drah pasa prong saong drah pasa meng kan  di ban raya HCM daok patagok pandap blei tame song peih pambah mbang raok tuai. Dahlau di nan UBND TPHCM song Sở Công thương hu harak tacei pato, kakei dom quận, huyện duah jalan peih veik drah pasa min brei khik hu siam mekre dalam bruk pacang caga jit Covid-19. Urak ni, dom jabat  kinh tế quận, huyện song ban Thủ Đức dok samar ngak ka nyu salah jalan meda ngak hu tui Bộ  tiêu chí song hu panuac ieu  urang pablei salih tut angan piah samar ba dom drah pasa meng kan  peih ngak gilac veik dalam tuk “siam mekre bahrau” meng harei  10-10.  

Mesup ini 7/10 di Pakistan, karja taneh ia ini brei thau ka bruk megei baoh taneh khang 5,7 độ richter ngak brei takik di abih 20 urang metai haong labaih 200 menuac njauk rambus, dalam nan hu rilo menuac njauk rambus trak. Mbang megei baoh taneh 5,7 độ richter rah tabiak di gah meraong Pakistan di tuk dah page, atah di ban Quetta, pasak tỉnh Balochistan di Pakistan 102 km nao gah Đông - Đông Bắc. Bruk daong, duah gaok rilo kan kandah kayua jalan mbak nao mai oh siam, kurang điện saong kurang riyak di động. Megei baoh taneh ngak brei lahik điện bhum nan. Urak ini, karja jeng daok kham merat jhul samar bruk daong, duah menuac gaok bala.

Thụy Điển song  Đan Mạch harei kabroi brei thau lac meda brei padeih bruk  klauk vắc-xin pacang  COVID-19 di Hãng jru Mô-đơ-na (Moderna) ka nyaom dom urang ranaih umo kayua dom tác dụng phụ. Jabat y tế Đan Mạch brei thau lac padeih bruk klauk  vắc-xin ka dom urang umo ala  30 thun kayua mboh lac hu bruk patagok viêm cơ tim song viêm màng ngoài tim di dam dara song urang ranaih umo hu klauk jru pacang. Jabat ni brei thau lac hu bruk pambuak gauk cambaih laih, abih di nyu  hadei di mbang klauk vắc-xin Mô-đơ-na mbang ka 2, yaom lac bruk oh siam biak takik. Urak ni, 2 taneh ia ni hu panuac ieu klauk  vắc-xin Phai-dơ Bai-ô-en-tếch (Pfizer/BioNTech) salih ka nyaom urang ni.

Tapa roh duah ka “Tanut pasiam veik Đông Nam Á” di Cty dữ liệu ADA - Australia brei mboh lac, bruk pasiam veik pablei salih di Indonesia, taneh ia bhian gaok kan kandah khang meng jit praong Covid-19- lac samar abih dalam bhum. Tui kuhria mboh di ADA, bruk pasiam veik pablei salih di Indonesia hu tal 91% di bilan 10 thun 2021.  Dom tuai mai tal labik pablei pandap mbang menyum tagok 110% duk haong dahlau di tuk hu jit praong. Langiu di nan, dom tuai nao tal pasak blei pandar hu rilo veik yau dahlau. Bruk pasiam veik gah pablei salih di Indonesia hu jhul tagok meng hu bruk samar drah brei tagok bruk klauk vaccine Covid-19 di rajaei saong bruk brei takik nao mai di bol bhap rahra dalam tukvak peih ngak dom bruk brei takik ngak di bhap bini meng harei 3/7 tal urak ini./. 

Urang lang: M.P & H.Pha -  07/10/2021