Harei 21 bilan 5 thun 1945, Wa Hồ meng Cao Bằng mai veik Tuyên Quang piah tacei pato bruk cách mạng dalam taneh ia. Wa pilih xã Tân Trào, huyện Sơn Dương ngak ban ine bhum peih paha, ngak labik cách mạng.  Labik daok camereip di Wa tuk mai Tân Trào nan lac sang ong Nguyễn Tiến Sự, tuk nan ngak Chủ nhiệm Việt Minh xã Tân Trào. Amuk Hoàng Thị Mai, anek metau kumei di ong Sự brei thau: Tuk mai ngak anek metau, amuk hu thau rilo dalikan ka Wa dalam tukvak Wa daok di sang tamaha amuk. Di labik ini, lingiu tuk ngak bruk, Wa bhian nao haong Nguyễn Tiến Sự tal dom sang dalam palei, rivang sirah, alin hadiah pandap ka dom ong muk taha, dom anek naih. Harei nan, bhap bini dalam palei ieu Wa meng angan biak anit ranam lac  “Ong Ké”. Amuk Hoàng Thị Mai khan lac:

“Tamaha dahlak khan lac, tuk bahrau mai, Wa daok di labik ini, họp di labik 1 adit. Dahlau deih oh thau lac Wa, ieu lac ong Ké min. Tagok lán hu  1 adit..Wa ruak. Tamaha likei kumei saong pasang dahlak mek jru brei menyum, Wa abih ruak. Tamaha dahlak ngak lisei ia bloh pasang dahlak ba tagok. Tamaha dahlak kan kandah min abih hatai daong ka cách mạng”.

Tal bilan 8 thun 1945, tuk bruk mesruh pacang Japon daok chreih chrai tagok, peih tabiak jalan ka bruk Tổng khởi nghĩa dang tagok meblah karja, Chủ tịch Hồ Chí Minh hu tacei pato brei samar pataom peih Quốc dân Đại hội Tân Trào piah padang Rajaei lâm thời cách mạng, pan akaok bruk cách mạng di bhap bini drei. Ong Hoàng Ngọc, thun ini umo 79 thun, daok di palei Tân Lập, xã Tân Trào hadar veik: Dalam akaok sahneng di sa anek anaih umo bahrau 10 thun tuk nan, dom urang jakar mai hu mbaok dalam Quốc dân Đại hội daok di sang ong saong dom sang karei. Bhap bini mbang hagait, urang jakar mbang nan. Dalam tuk Nyom roya daok rah tabiak, kapul urang lambaok ka bhap bini Tân Trào hu mai salam Nyom roya saong ong Hoàng Ngọc hu mbaok dalam kapul uraniah. Ong khan lac: bhap bini kan kathaot, oh hu hagait lô, min jak gauk pataom brah, pataom menuk saong sa drei limo uan Rajaei cách mạng lâm thời bahrau hu pilih ruah.

 “Kol dahlak lac bangsa Tày, tapa saman  đô hộ mboh rambah lô. Hadei di tuk cách mạng mai, hu Đảng, Bác Hồ pato pakai bruk cách mạng, bhap bini dom bangsa kol dahlak chreih chrai lô, uan tabuan lô. Taong abih gauk pataom tame daong ka cách mạng. Hu hagait jeng ba tabiak daong saong ngak cách mạng. Wa Hồ lac yau habar, urang jakar cách mạng ndom yau habar, kol dahlak jeng ngak tui abih”

Daok ngan saong amuk Nông Thị Mơ, yaom lac umo labaih 90, meta sabil, tanye oh daok mehit cambaih, min dom hagait rah tabiak dalam dom harei Wa Hồ saong dom urang jakar cách mạng mai daok di Tân Trào jeng daok hu amauk kanal cambaih. Tuk nan, amuk saong adei sa-ai kumei dalam palei hu daong ka cách mạng meng bruk saok brah raong lin. Bruk saok brah rah tabiak dalam chreih chrai, drah samar. Amuk Mơ daok kanal panuac kakei di Wa tuk nan lac “ saok brah jeng lac taong khamang, saok brah raong lin mbang trei tian meng taong hu kol khamang. Dalam dom harei rah tabiak nyom roya, amuk hu brei bruk tahanek lisei duh ka nyom roya:

 “Bilan 8, Nyom roya Tân Trào dahlak hu brei bruk tahanek lisei duh ka menuac di ong Ké, hu 8 urang tahanek. Bloh cei lac harei ini nyom roya, pilih ruah Rajaei. Tuk nan ieu lac Wa, Wa lac ieu đồng chí hu ye.  Mai sang huak lisei oh khan brei thei dalam sang thau. Nyom roya salah bloh sa tukvak urang ba gauk mai veik Thái Nguyên”.

Meng hatai jia tame Đảng, nao tui Đảng, bhap bini Tân Trào, ceik glai Tân Trào hu raong padauk, pacang caga ka cách mạng, khik caga siam mekre ka Đảng, ka Wa Hồ, ka cách mạng dalam dom harei dahlau di tuk khởi nghĩa. Labik ini, lac pasak tacei pato dang tagok meblah karja dalam taneh ia, rik daong biak praong tame jayah di bruk Cách mạng bbilan 8 praong glaong di bangsa./.