Yaok thun hu peih ngak di mblang bein Ban raya 

Mai veik ban sit Phước Long hadei di 45 thun peih paha, mbaok meta di labik ini hu rilo salih bharau. Jalan ĐT 741 meng pasak ban Đồng Xoài mai ban sit Phước Long hu peih praong, tapak, mekre. Dom jalan sit nao tame dom xã, phường di ban sit jeng hu tuh bê tông, sang danaok jiak taphia gauk. Phước Long hu padang Pasak hành chính saong khu đô thị bahrau praong labaih 96ha, hu taong yaom lac mekre, bahrau abih di tỉnh Bình Phước.

Ong Trương Duy Điểu (ndih tapui thun 1950), dahlau daih ngak Chủ tịch UB bhap bini huyện Phước Long, urak ini lac ban sit Phước Long khan lac, 45 thun dahlau, ong meng Quảng Bình tame ini ngak urang jakar ngak nong. Tuk nan labik ini biak joa lange, takik menuac sia. Hadei di mesruh metak, jalan mbak tayah tayac, nao mai tui jalan haluk randaih bhong; bruk ngak mbang, pala drak oh ka hu pasiam veik, raidiuk gaok biak rilo kan kandah. Tapa 45 thun dak padang saong patagok, Phước Long brei mboh labik dang di sa ban daok cakrok:

 “Tuk camereip labik ini biak kan kandah, lac labik glai klo, pandiak dom gam gam rah tabiak. Min meng bruk kham merat di Đảng, di abih rahra, sa hatung hatai haong gauk, bruk kinh tế xã hội hu cakrok biak rilo duk saong vaktu bahrau peih paha”

Thau lac patagok kinh tế-xã hội tui jalan ngak kong, dịch vụ, du lịch, ngak nong lac takai juak, dom thun tapa, ban sit Phước Long pataom tame ngak dom danak dak praong piah pasiam raidiuk di bhum bhap bini bangsa saong padang ngak palei pala bahrau, ba bhum ngak kong jeng pasak di gah ngak asar pa-ok blait di Bình Phước.

Meng dom jalan ngak praong, cambaih laih, tal urak ini, jien mek tame kadung jien karja tỉnh dak harei dak tagok samar, vaktu 2016-2020 ngak hu saong ngak tapa tanut ba tabiak di tỉnh saong Sarak nyaom roya Đảng bộ ban sit jao brei meng 5% tagok. Tal thun 2019, Phước Long hu jaik 1.000 labik ngak kong, pablei salih, dịch vụ hu 4.200 labik…

Lingiu kinh tế, gah ilamu-xã hội jeng hu sangka saong hu cakrok biak rilo. Dalam nan, dom sang bac, tal bac hu padang ngak khang kajap, siam mekre, pabak siam bruk pato pakai, bac da-a ngan saong 8/23 sang bac mek hu chuẩn pakat negar. Meyah thun 2010 Phước Long bahrau hu 5,13 bác sĩ brei ka pluh rabau rahra ye urak ini tagok hu 9,1 bác sĩ ka pluh rabau rahra, bruk iek ruak, taong ruak hu glaong tagok.

Rilo labik ilamu, me-in sambai hu padang tagok, yau ye: Pasak ilamu, thể dục thể thao, mblang bein 6/1, Miuyim sajarah ilamu Phước Long... pabak hatai caong me-in sambai dak harei dak glaong di bhap bini. Sarak urang buh prein ka taneh ia, an sinh xã hội jeng hu ban sit ngak siam. Dom sang kan kathaot dalam ban sit trun tui yaok thun saong tal abih thun 2019 daok 0,48%.

Ong Phạm Thụy Luân, Akaok UB bhap bini ban sit Phước Long brei thau, pakat Đảng, Karja saong bhap bini ban sit Phước Long, tỉnh Bình Phước daok kham merat ba ban sit jeng ban ka 3, yam tagok jeng ban praong, pataom tame patagok tui jalan lac ban sit pasak gah brak di tỉnh Bình Phước:

“Kol dahlak patagok Phước Long jeng pasak kinh tế, ilamu, du lịch saong dịch vụ. Tui jalan ngak yau nan, kol dahlak pataom tame peih praong bhum kinh tế saong đô thị di ban sit nao dom gah, dalam nan hu gam gah địa giới hành chính, gah quy hoạch đô thị”

Maong veik canah jalan 45 thun blaoh meng mboh lac, bhum “taneh pui” ini “oh ndih var” angaok jayah. Dalam bruk mesruh taong Mỹ daong taneh ia, ini lac labik biak hu yaom di bhum Đông Nam bộ, lac labik pacang caga di kol khamang gah brak Bei Gon. Kayua yau nan ye, peih paha Phước Long jeng lac mbang taong khang, lavik, meng harei 21/12/1974 tal harei 6/1/1975. Dalam mbang taong ini, bộ đội chủ lực di Sư đoàn 7, hu: Trung đoàn 141, 165, 201, 271 saong Trung đoàn pháo binh 210 metai lahik biak rilo. Trung tá Võ Hữu Minh, dahlau daih ngak Phó Tham mưu Sư đoàn 7 hadar veik, hadei di rilo harei melam taong tame, tỉnh Phước Long hu peih paha abih, peih tabiak pabah mbang gah Đông Nam bộ pambuak haong Tây Nguyên, trun Bei Gon saong Tây Nam bộ:

 “Phước Long nao mai biak kan kandah. Mbang taong rah tabiak labaih 1 adit, kol khamang gam gam taong veik, bộ đội drei metai biak rilo. Mbang taong Phước Long bộ đội drei taong tame 1 ban sit di khamang. Ini lac sa jak jeng praong, khang gah jalan sahaneng, taong tapak tame sruh di Mỹ-ngụy”

Meng labik mesruh bak mbom mìn, 45 thun hadei di mesruh metak, Phước Long daok mbeik drei yam tagok, salih ka drei sa blah ao bahrau haong rup binguk bahrau ka bruk cakrok patagok khang kadang, sami samar, kaya meda, siam mekre saong văn minh. Pakat Đảng, Karja, urang lin saong rahra dalam tỉnh daok kham merat vak veik dom kadha daoh jayah dalam bruk hit, ngak mbang saong dak padang puk palei dak harei dak kaya meda, siam mekre yau panuac daoh “nao tapa Sông Bé oai hùng, mai Phước Long padang ja yah”, hu sarak dalam tame hatung hatai di yaok urang tuk ndom tal Phước Long./.

Urang lang: Mousaphuong -30/4