Dalam yaok pluh baoh sang toul tabung kriak oh daok bhong kayua pandiak hajan di mikva urang Khmer puk Tầm Phô, xã Tân Đông, huyện taphia negar Tân Châu, tỉnh Tây Ninh, hu sa baoh sang toul praong laneng lanoi hu ngak meng kayau quý, hu sarak bingu la biak mekre meta, tabung sang tauk kriak bhong lac sang di ong Chum Chòm Ram. Ong Ram lac urang akaok puk, tari trieng ngak mbang, kaya meda abih duk saong dom baoh sang karei di puk ini. Ong khan lac, “Karja hu brei taneh daok, hamu saong apuh nan ye sang ong  kham ngak padai, palA bei, tabau saong cao su. Meng nan, sang ông oh daok kurang anak , kurang lakuh, hu jien blei tame mac li-ua, radaih pajeng…piah ngak mbang. Langiu di ong Ram, dalam puk Tầm Phô daok hu rilo baoh sang karei jeng kham ngak mbang saong patagok radiuk ginup meda tagok. Yau sang sa-ai Thạch Thanh Lợi.

Dahau diah, sang sa-ai lac baoh sang kathaot, oh hu taneh pala drak, dua diuk pasang nao duah ngak mbang apah, duah jien diuk tapa harei. tal thun 2015, tuk mesre hu phun jien daong patagok bruk ngak mbang di Danak dak 135, raidiuk sang sa-ai Lợi dak harei dak pagrap tanat saong yam tapa truh kan kathaot:

“ Dahlak mesre hu 30 trieu oh mek jien laba blei hu 3 drei limo raong. Meng phun jien oh laba nan, dahlak raong saong pablei hu laba pluh dom trieu.  Dahlak pah taneh hamu ngak padai, yaok thun dahlak mek hu meng 30 tal 40 trieu dong. Thun 2017, dahlak likau tabiak truh kathaot.”

Xã Tân Đông hu labaih 530 baoh sang urang dom bangsa takik gam saong labaih 2.000 menuac. Meng hu bruk daong ba di tỉnh Tay Ninh, huyen Tan Chau saong bruk kham merat di mikva, ralo sang hu bruk ngak mbang tani tanat, ginup meda jang. Meng thun 2017 tal ini, labaih 40.000 mbang urang di Tân Đông hu mesre phun jien laba lap piah ngak mbang, pablei salih, kuhria abih labaih 45 tỷ đồng. 7 bilan tapa, xã hu alin 13 baoh sang jum pataom brei ka dom sang urang kathaot. Dom dam dara jeng hu tame ngak bruk ka nong truong cao su di palei, jien bikan labaih 5 trieu dong. Ong Trần Tấn Sung, Akok UBMTTQ VN xã Tân Đông lac: “

“ Bhap bini pak ini thau cambaic ka sarak, jaln ngak di Karja, diuk rai siam mekre, daong ba gauk.  Dom puk urang bangsa takik, mikva ngak siam bruk khik  caga puk paga siam mekre”

 Daok puk Cam, xã Suối Dây, huyện Tân Châu hu 365 baoh sang urang Cam. Mikva thau kuhria sahaneng oh daok cang pagam pambak tame bruk daong di Karja bo  kham ngak mbang. Rilo boah sang kham raong limo, pala hareik, pala bei saong nao duha ngak apah di rilo labik piah raong baoh sang di drei. Meng nan, bruk bac da-a di anek bik jeng hu mikva sangka brei bac tal labik tal dhua. Mbiah tal ini, hu labaih 35 anak kamuan urang Cam hu bac tamat cao đẳnmg, đại học mai ngak bruk di palei. Thun 2017, puk Cam hu 11 baoh sang urang tapa truh kathaot. Daok la anak sang birau daok mbau pahe sơn hu padang ngak taphia sang kreim la-a dahlau diah, sa-ai Thị Doul daok di puk Cam, xã Suối Dây, huyện Tân Châu, tỉnh Tây Ninh bui sambai lac: Dahlak hu karja daong brei 30 triệu đồng, sang buh tame 10 trieu tra, padang hu sang apcang pandiak pacang hajan.

“ Hu sang daok ye dahlak kham ngak mbang piah tapa truh kathaot khang kajap.”

 Urak ini, tỉnh Tây Ninh daok hu 152 baoh sang urang bangsa takik daok kathaot. Thun 2018, tỉnh daok brei buh jien tame labaih 20 tỷ đồng piah peih ngak Danak dak bruk ngak negar patruN kathaot khang kajap, dalam nan, jien daong patagok kaya nong ngak mbang, pala drak di dom xã dalam Danak dak 135, bhum urang bangsa takik lac jaik 17,8 tỷ đồng. Anak tal, tỉnh meda kuhria daong huyện Tân Châu peih ngak danak dak raong limo menek. Piah daong bruk ngak mbang ka urang kathaot hu tabiak truh  kathaot khang kajap, meng ini tal thun 2020, tỉnh Tây Ninh meda brei paglaong jien daong ka urang hu tame Danak dak patagok bruk pala drak parilo bruk ngak mbang saong pambak praong bruk patruN kathaot khang kajap dalam tỉnh. Tui nan, urang tame danak dak angaok nan bo daok di dom xã dalam Danak dak 135 hu brei patagok jien daong. Baoh saong kathaot lac urang lao động bangsa takik hu daong ralo di abih lac 15 trieu dong ka yaok baoh sang; baoh sang jaik kan kathaot lac urang lao động bangsa takik hu daong ralo di abih 13 trieu dong ka yaok baoh sang. Daok baoh sang birau tabiak truh kathaot lac urang bangsa takik,  yaom daong ralo di abih lac 11 trieu dong… Ông Nguyễn Văn Quá, Phó Giám đốc Sở Lao động Thương binh và Xã hội tỉnh Tây Ninh lac:

“ Tukvak anak tal, gah  Lao động saong gah ngak nong brei pambuak bruk khang kajap, piah ngak habar  pathau khan, tacei pato, lang yah ka dom baoh sang urang  di danak dak  hu thau hu mboh dom kein laba tuk tame danak dak ini.”

 Taong abih dom sarak di tỉnh Tây Ninh brei ka baoh sang urang kathaot, dalam nan hu urang bangsa takik yau ye: y tế, bac da-a, duah bruk ngak, bac bruk ngak, mesre phun jien, pasiam veik sang daok, daong jien điện…daok hu peih ngak dalam tukvak 2018-2020 saong dom thun hadei di nan. Langiu di nan, tỉnh daok brei ngak bruk patrun kan kathaot khang kajap piah ngak brei urang kathaot, baoh sang kathaot taduan hu sarak patrun kathaot siam di abih dalm tukvak anak tal./.